 |
ສະຫາຍ ນາງ ມີນາພອນ ໄຊສົມພູ ໄດ້ກ່າວວ່າ: ຊຸດຝຶກອົບຮົມວຽກງານຕິດຕາມ, ເກັບກຳສະພາບແນວຄິດ-ຫາງສຽງສັງຄົມ ໃນຄັ້ງນີ້ ມີຄວາມໝາຍຄວາມສຳຄັນຫຼາຍ ຕໍ່ຂົງເຂດວຽກທິດສະດີຂອງພັກ ເວົ້າລວມ, ເວົ້າສະເພາະຕໍ່ວຽກງານການເມືອງ-ແນວຄິດຂອງພັກ, ເຊິ່ງພື້ນຖານຂອງການອົບຮົມເທື່ອນີ້ ແມ່ນການຜັນຂະຫຍາຍມະຕິກອງປະຊຸມໃຫຍ່ຄັ້ງທີ XII ຂອງພັກ, ມະຕິກອງປະຊຸມໃຫຍ່ ຄັ້ງທີ XII ຂອງອົງຄະນະພັກແຂວງ, ພ້ອມທັງມະຕິກອງປະຊຸມວຽກງານການເມືອງ-ແນວຄິດ ທົ່ວປະເທດຄັ້ງທີ V ໃຫ້ເກີດດອກອອກຜົນ, ທັງແມ່ນໜ້າທີ່ຄວາມຮັບຜິດຊອບຂອງຄະນະພັກທຸກຂັ້ນ ຈະຕ້ອງໄດ້ພ້ອມກັນຮັບຮູ້, ເຂົ້າໃຈຢ່າງເລິກເຊິ່ງ ແລະ ຈັດຕັ້ງປະຕິບັດຢ່າງເຂັ້ມງວດ, ການເກັບກຳຫາງສຽງສັງຄົມ ແມ່ນການທ້ອນໂຮມເອົາທັດສະນະຂອງມະຫາຊົນຊັ້ນຄົນຕ່າງໆ ທີ່ມີຕໍ່ການນໍາພາ-ຊີ້ນໍາຂອງພັກແຕ່ລະໄລຍະ, ແມ່ນທັດສະນະຕໍ່ບັນດາເຫດການ, ປະກົດການທີ່ເກີດຂຶ້ນໃນສັງຄົມ ທັງດ້ານຕັ້ງໜ້າທີ່ຄວນເສີມຂະຫຍາຍ ແລະ ອັນທີ່ຫຍໍ້ທໍ້ທີ່ຄວນປັບປຸງແກ້ໄຂ ລາຍງານຂັ້ນເທິງ ເພື່ອຄົ້ນຄວ້າວິທີການແກ້ໄຂໃຫ້ສອດຄ່ອງ ແລະ ທັນການ, ພາຍຫຼັງອົບຮົມໄປແລ້ວ ບັນດາສະຫາຍຈະຮັບຮູ້ເຂົ້າໃຈເນື້ອໃນການຕິດຕາມ, ເກັບກຳ ແລະ ການນໍາໃຊ້ຫາງສຽງສັງຄົມເຂົ້າໃນການນໍາພາ-ຊີ້ນໍາ ກໍຄືການສຶກສາອົບຮົມການເມືອງ-ແນວຄິດ.
ສະຫາຍ ນາງ ມີນາພອນ ໄຊສົມພູ ຍັງໄດ້ຮຽກຮ້ອງໃຫ້ບັນດາສຳມະນາກອນພ້ອມກັນເສີມຂະຫຍາຍຄວາມຮັບຜິດຊອບການເມືອງ, ສຸມທຸກສະຕິບັນຍາຂອງຕົນເຂົ້າໃນການຄົ້ນຄວ້າ, ປຶກສາຫາລືແລກປ່ຽນບົດຮຽນໃນ ແຕ່ລະຫົວຂໍ້ຢ່າງເລິກເຊິ່ງ ເພື່ອຮັບປະກັນການຈັດຕັ້ງປະຕິບັດເຂົ້າໃນວຽກງານການນໍາພາ-ຊີ້ນໍາ ໃນຂົງເຂດວຽກງານຂອງພັກ ກໍຄືໜ້າທີ່ຄວາມຮັບຜິດຊອບ ເຮັດໃຫ້ການແກ້ໄຂຫາງສຽງສັງຄົມວ່ອງໄວທັນເຫດການ ແລະ ສົມເຫດສົມຜົນ ຮັບປະກັນໃຫ້ສັງຄົມມີຄວາມສະຫງົບ ແລະ ມີຄວາມເປັນເອກະພາບກັບແນວທາງນະໂຍບາຍຂອງພັກ ແຕ່ລະໄລຍະ.
ຊຸດອົບຮົມຄັ້ງນີ້ ສຳມະນາກອນ ທີ່ເຂົ້າຮ່ວມ ຈໍານວນ 31 ທ່ານ, ຍິ່ງ 4 ທ່ານ ຈະໄດ້ຮຽນຮູ້ 4 ເນື້ອໃນສໍາຄັນ ຄື: 1) ບັນຫາພື້ນຖານກ່ຽວກັບແນວຄິດ-ຫາງສຽງສັງຄົມ; 2) ວິທີການເກັບກໍາ ແລະ ນຳໃຊ້ສະພາບແນວຄິດ-ຫາງສຽງສັງຄົມ; 3) ຕາງໜ່າງເພື່ອນຮ່ວມງານ ແລະ 4) ວຽກງານຄົ້ນຄວ້າ ແລະ ສັງລວມ.
ຂ່າວ: ທິດປະສົງ
ຄໍາເຫັນ