ອັດຕະປື ປັບປຸງການຄຸ້ມຄອງ-ບໍລິຫານລັດ ມີປະສິດທິພາບ ແລະ ສັກສິດ ຄຸ້ມຄອງລັດດ້ວຍກົດໝາຍ

ໃນໄລຍະກາງສະໄໝຜ່ານມາ, ແຂວງອັດຕະປື ໄດ້ຍົກສູງປະສິດທິພາບການປົກຄອງ-ການຄຸ້ມຄອງບໍລິ ຫານລັດ ໃຫ້ມີຄວາມກະທັດຮັດ, ວ່ອງໄວ ແລະ ເຂັ້ມງວດ ສັງຄົມໄດ້ຮັບການປົກປ້ອງ ຢ່າງມີຄວາມສັກສິດ ຕາມທິດການຄຸ້ມຄອງລັດດ້ວຍກົດໝາຍ.
ແຂວງໄດ້ເລັ່ງໃສ່ປັບປຸງສັບຊ້ອນ ແລະ ມອບຮັບວຽກ ໃຫ້ໄປຕາມສາຍຕັ້ງ ແລະ ທິດກະທັດຮັດ, ໂອນໜ້າວຽກລະຫວ່າງຂະແໜງການດ້ວຍກັນເຊັ່ນ: ພະແນກອຸດສາຫະກຳ-ການຄ້າ ແລະ ພະແນກກະສິກຳ-ປ່າໄມ້, ຄະນະສະເພາະກິດ ຕາມຄຳສັ່ງ ເລກທີ 15 ກັບບັນດາຂະແໜງການ, ຂົງເຂດກະສິກຳ-ປ່າໄມ້ ກັບຊັບພະຍາກອນທຳມະຊາດ ແລະ ສິ່ງແວດລ້ອມ ໃນຂົງເຂດວຽກງານທີ່ດິນ ແລະ ອື່ນໆ. ປັບປຸງກົງຈັກການຈັດຕັ້ງ 28 ພາກສ່ວນ ເທົ່າກັບ 100%; ການປັບປຸງແມ່ນໄປຕາມທິດຂອງພັກ ແລະ ລັດຖະບານ ໄດ້ກຳນົດໃຫ້ກະທັດຮັດ, ສົມເຫດສົມຜົນແຕ່ໃຫ້ມີຄຸນນະພາບ, ໂດຍສະເພາະຂັ້ນຂະແໜງ ແລະ ໜ່ວຍງານ, ທຽບໃສ່ກົງຈັກຂັ້ນແຂວງໄລຍະຜ່ານມາສາມາດລຸດລົງໄດ້ 21 ຂະແໜງ;ພ້ອມກັນນັ້ນ ກໍຮັບຮອງມະຕິຕົກລົງ ແລະ ຂໍ້ຕົກລົງ ວ່າດວ້ຍການຈັດຕັ້ງ ແລະ ການເຄື່ອນໄຫວ ຂອງບັນດາພາກສ່ວນຕ່າງໆໄດ້ທັງໝົດ 23 ພາກສ່ວນທີ່ຮັບຮອງແລ້ວ. ສໍາເລັດການຮັບຮອງພາລະບົດບາດແລ້ວ 11 ພາກສ່ວນ, ຍັງອີກ 11 ພາກສ່ວນຍັງບໍ່ທັນໄດ້ປັບປຸງ. ສຳເລັດການກວດຖານຂໍ້ມູນລັດຖະກອນ ໃນ 5 ເມືອງ ດ້ວຍລະບົບຄຸ້ມຄອງລັດຖະກອນ ແບບເອເລັກໂຕຣນິກ ແລະ ກວດກາຂໍ້ມູນພະນັກງານ-ລັດຖະກອນ ຂອງບັນດາພະແນກການອ້ອມຂ້າງແຂວງ, ອົງການທຽບເທົ່າ ເພື່ອອອກບັດພະນັກງານ-ລັດຖະກອນ.   ສຳເລັດກອງປະຊຸມຄົ້ນຄວ້າແກ້ໄຂເຂດແດນເຊື່ອມຕໍ່ ລະຫວ່າງແຂວງອັດຕະປື ກັບ ແຂວງເຊກອງ, ສຳລັບເຂດແດນເຊື່ອມຕໍ່ລະຫວ່າງແຂວງອັດຕະປື ກັບແຂວງຈຳປາສັກ, ປັດຈຸບັນ,ຢູ່ໃນຂັ້ນຕອນຄົ້ນຄວ້າປຶກສາຫາລືເຈລະຈາລາຍງານລັດຖະບານ ແລະ ກະກຽມເປີດກອງປະຊຸມຮ່ວມກັນ ເພື່ອຄວາມເປັນເອກະພາບ. ສືບຕໍ່ສັງລວມໜ້າວຽກບັນດາພະແນກການ ເອົາເຂົ້າໃນວຽກງານບໍລິການຜ່ານປະຕູດຽວ ເພື່ອຄວາມສະດວກໃນການບໍລິ ການສັງຄົມ; ຫັນເປັນທັນສະໄໝ ໃນການບໍລິຫານລັດ ດ້ວຍລະບົບອີເລັກໂທຣນີກ.
ໄລຍະນີ້ ແຂວງກໍາລັງຄົ້ນຄ້ວາ ກໍານົດຫົວຂໍ້ ເພື່ອສ້າງເປັນນິຕິກຳລຸ່ມກົດໝາຍຈໍານວນໜຶ່ງ ຕິດພັນກັບວຽກຄຸ້ມຄອງນໍາໃຊ້ຊັບພະຍາກອນເປັນຕົ້ນ: ແຮ່ຊາຍ ແລະ ແຮ່ຕິດພັນ ເພື່ອໃຫ້ເມືອງມີສິດໃນການຄຸ້ມຄອງນໍາໃຊ້ ແລະ ຮັບຜິດຊອບ, ຄົ້ນຄວ້າບັນດາຫົວໜ່ວຍຊົດເຊີຍຜົນກະທົບຕ່າງໆ ໃນເຂດສຳປະທານ ແລະ ເຂດການຜະລິດຂອງປະຊາຊົນ.

                     ຂ່າວ: ຕະວິນຍານ