ອັດຕະປື ເປີດການນຳໃຊ້ເສັ້ນທາງເຂົ້າຖານທີ່ໝັ້ນຂອງການປະຕິວັດພາກໃຕ້ລາວ

ພິທີເປີດການນໍາໃຊ້ເສັ້ນທາງເຂົ້າຖານທີ່ໝັ້ນຂອງການປະຕິວັດພາກໃຕ້ລາວ ທີ່ບ້ານອຸດົມໄຊ ເມືອງສະໜາມໄຊ ແຂວງອັດຕະປື ໄດ້ຈັດຂຶ້ນຫວ່າງບໍ່ດົນມານີ້, ໂດຍມີ ທ່ານ ພົນໂທ ວັນທອງ ກອງມະນີ ເຈົ້າແຂວງອັດຕະປື, ມີການນໍາຂອງແຂວງ, ເມືອງ, ອຳນາດການປົກຄອງບ້ານ ແລະ ປະຊາຊົນເຂົ້າຮ່ວມ. ທັງນີ້, ກໍເພື່ອເປັນການກະກຽມໃຫ້ແກ່ການສະເຫຼີມສະຫຼອງ ວັນເກີດ ປະທານ ຄຳໄຕ ສີພັນດອນ ຄົບຮອບ 100 ປີ, ທັງເປັນການກະ ກຽມເປີດປີທ່ອງທ່ຽວລາວ 2024ຂອງແຂວງອັດຕະປື ທີ່ຈະມາເຖິງນີ້. 
ໃນພິທີ, ທ່ານ ລັດຕະນະພອນ ເທບສຸວັນ ຫົວໜ້າພະແນກໂຍທາທິການ ແລະ ຂົນສົ່ງແຂວງອັດຕະປື ໄດ້ໃຫ້ຮູ້ວ່າ: ໂຄງການກໍ່ສ້າງເສັ້ນທາງເຂົ້າຖານທີ່ໝັ້ນ ຂອງການປະຕິວັດພາກໃຕ້ລາວ ຢູ່ບ້ານອຸດົມໄຊ ເມືອງສະໜາມໄຊ ໄດ້ເລີ່ມຈັດຕັ້ງປະຕິບັດມາແຕ່ວັນທີ 19 ທັນວາ ປີ 2023, ມາຮອດປັດຈຸບັນ ແມ່ນໄດ້ສຳເລັດແລ້ວ ໂດຍແມ່ນພະແນກໂຍທາທິການ ແລະ ຂົນສົ່ງແຂວງ ຮ່ວມກັບ ບໍລິສັດ ມະຫາໄຊກໍ່ສ້າງສ້ອມແປງຂົວ-ທາງ ແລະ ຊົນລະປະທານ ຈຳກັດ ເປັນຜູ້ຮັບເໝົາການກໍ່ສ້າງ ໃນມູນຄ່າ 4 ຕື້ກວ່າກີບ, ເປັນທາງປູຢາງສອງຊັ້ນ, ກວ້າງ 6 ແມັດ, ຍາວ 2.400 ແມັດ. ພ້ອມນີ້, ຍັງມີໂຄງການກໍ່ສ້າງຂັ້ນໄດທາງຂຶ້ນເຂດທີ່ໝັ້ນຂອງ ປະທານ ຄຳໄຕ ສີພັນດອນ, ເຮືອນເຮັດວຽກ, ເຮືອນນອນ, ເຮືອນຄົວ ແລະ ຮູບຈຳລອງຖານທີ່ໝັ້ນຂອງການປະຕິວັດພາກໃຕ້ ມູນຄ່າ 1,7 ຕື້ກວ່າກີບ.
ທ່ານ ບຸນເສີດ ເສດທິລາດ ຮອງເຈົ້າແຂວງອັດຕະປື ໄດ້ມີຄຳເຫັນ ແລະ ກ່າວເປີດພິທີວ່າ: ພິທີມອບ-ຮັບ ເສັ້ນທາງດັ່ງກ່າວ, ກໍເພື່ອເປັນການລະນຶກເຖິງຄຸນງາມຄວາມດີຂອງຜູ້ນຳທີ່ມີຕໍ່ປະເທດຊາດ ໃນບັ້ນການຕໍ່ສູ້ປົດປ່ອຍປະເທດຊາດ, ໃຫ້ໄດ້ຮັບເອກະລາດ, ອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຊາດລາວເຮົາ.
ຂ່າວ-ພາບ: ທິດປະສົງ