ອັດຕະປື ພັດທະນາວິສາຫະກິດຂະໜາດນ້ອຍ ແລະ ກາງ ໃຫ້ມີຄວາມເຂັ້ມແຂງ

ໃນໄລຍະ 6 ເດືອນຕົ້ນປີ 2023 ນີ້, ແຂວງອັດຕະປື ໄດ້ສຸມໃສ່ພັດທະນາຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ໃຫ້ມີຄວາມເຂັ້ມແຂງ ສາມາດຂຶ້ນທະບຽນວິສາຫະກິດ ປະຕິບັດໄດ້ທັງໝົດ 170 ຫົວໜ່ວຍ, ລວມທຶນຈົດທະບຽນ 441,86 ຕື້ກີບ, ໃນນັ້ນ: ຂັ້ນພະແນກການຄ້າ ອອກອະນຸຍາດ 88 ຫົວໜ່ວຍ, ທຶນຈົດທະບຽນ 435,72 ຕື້ກີບ (ຂຶ້ນທະບຽນໃໝ່ 79 ຫົວໜ່ວຍ, ທຶນຈົດທະບຽນ 230,04 ຕື້ກີບ, ປ່ຽນແປງທະບຽນເກົ່າ 9 ຫົວໜ່ວຍ, ທຶນຈົດທະບຽນ 205,67 ຕື້ກີບ). ໃນຈໍານວນ 170 ຫົວໜ່ວຍລົງທະບຽນໃໝ່ ເປັນການລົງທຶນພາຍໃນ 34 ຫົວໜ່ວຍ, ທຶນຈົດທະບຽນ 138,89 ຕື້ກີບ, ທຶນຕ່າງປະເທດ 54 ຫົວໜ່ວຍ, ທຶນຈົດທະບຽນ 296,82 ຕື້ກີບ. ໃນຈໍານວນນີ້, ຂັ້ນເມືອງ ອອກອະນຸຍາດ ມີ 82 ຫົວໜ່ວຍ, ທຶນຈົດທະບຽນທັງໝົດ 6,14 ຕື້ກີບ.

ມາຮອດປັດຈຸບັນ, ສາມາດຮັບຮອງຜະລິດຕະພັນກາໝາຍໂອດັອບ ໄດ້ 6 ຜະລິດຕະພັນຄື: ຜະລິດພັນຫັດຖະກໍາຫວາຍ ແລະ ໄມ້ປ່ອງ ເຂດຊຳຫຼວງ ເມືອງຊານໄຊ, ຜະລິດພັນແຜ່ນແພຍ້ອມສີທຳມະຊາດ ບ້ານວັງໄຊ ເມືອງຊານໄຊ, ຜະລິດພັນຜ້າກະໂດ ບ້ານສາມັກຄີ ເມືອງສາມັກຄີໄຊ, ຜະລິດຕະພັນແຜ່ນແພຜ້າກະໂດ ບ້ານສີວິໄລ ເມືອງສາມັກໄຊ, ຜະລິດຕະພັນປັ້ນໝໍ້ຫຼໍ່ໄຫ ບ້ານທ່າຫີນ ເມືອງສາມັກຄີໄຊ, ຜະລິດຕະພັນເຫຼົ້າຂາວ ບ້ານຊ້າຍ ເມືອງໄຊເສດຖາ; ສ່ວນອີກ 4 ຜະລິດຕະພັນ ເຊັ່ນ: ເຫຼົ້າບອງໂສມ ເອີເລີຊາ ບ້ານໂພໄຊ ເມືອງໄຊເສດຖາ, ຜະລິດຕະພັນແປຮູບ ໝາກພິກໄທ ເມືອງໄຊເສດຖາ, ກຸ່ມຫັດຖະກຳຈັກສານ ຫວາຍ-ໄມ້ປ່ອງ ບ້ານລະຍາວເໜືອ ແລະ ກຸ່ມຫັດຖະກຳຈັກສານ ຫວາຍ-ໄມ້ປ່ອງ ບ້ານລະຍາວໃຕ້ ເມືອງສາມັກຄີໄຊ ແມ່ນຢູ່ໃນຂັ້ນຕອນການອະນຸມັດ ຂອງກົມສົ່ງເສີມການຄ້າ. 

                                                                                                                              

ຂ່າວ: ຕະວິນຍານ