 |
ກິດຈະກຳປ່ອຍປາໃນຄັ້ງນີ້ ຈັດຂຶ້ນເພື່ອເປັນການປູກຈິດສຳນຶກໃຫ້ແກ່ທຸກພາກສ່ວນໃນສັງຄົມ ກໍຄືປະຊາຊົນບັນດາເຜົ່າ ໃຫ້ເຫັນໄດ້ເຖິງຄວາມສຳຄັນ ຂອງການອະນຸລັກຮັກສາພັນສັດນ້ຳ ແລະ ຄວາມອຸດົມສົມບູນຂອງລະບົບນິເວດວິທະຍາ ຢູ່ບໍລິເວນອ່າງເກັບນ້ຳຂອງເຂື່ອນໄຟຟ້າ. ທັງນີ້ ກໍເພື່ອແນໃສ່ການເພີ່ມປະລິມານສັດນ້ຳ, ສ້າງຄວາມສົມດຸນໃຫ້ແກ່ທຳມະຊາດ ແລະ ຮັບປະກັນການສະໜອງແຫຼ່ງອາຫານ ທີ່ຍືນຍົງໃຫ້ແກ່ປະຊາຊົນ ໃນທ້ອງຖິ່ນ.
ສຳລັບປາ ທີ່ນຳມາປ່ອຍໃນຄັ້ງນີ້ ປະກອບມີ: ປາປາກ, ປາໃນ, ປານວນຈັນ, ປາສະຫວາຍ, ປານີນ ແລະ ປາກົດ ລວມທັງໝົດ 120,000 ໂຕ, ເຊິ່ງໄດ້ຮັບການສະໜັບສະໜູນ ຈາກບໍລິສັດ ເຂື່ອນໄຟຟ້ານ້ຳກົງ 1.
 |
ໃນໂອກາດດັ່ງກ່າວ, ທ່ານ ເລຂາພັກແຂວງອັດຕະປື ຍັງໄດ້ມີຄຳເຫັນເນັ້ນໜັກ ໃຫ້ອຳນາດການປົກຄອງທຸກຂັ້ນ ພ້ອມດ້ວຍປະຊາຊົນ ແລະ ບໍລິສັດ ຜູ້ພັດທະນາໂຄງການ ເອົາໃຈໃສ່ຮ່ວມກັນຕິດຕາມ, ຄຸ້ມຄອງ ແລະ ປົກປັກຮັກສາ ສັດນ້ຳທີ່ປ່ອຍໄປນັ້ນ ບໍ່ໃຫ້ມີການຫາປາແບບດັບສູນ ຫຼື ນຳໃຊ້ເຄື່ອງມືທີ່ຜິດກົດໝາຍ ເພື່ອໃຫ້ພວກມັນໄດ້ຂະຫຍາຍພັນ ແລະ ສ້າງຄວາມອຸດົມສົມບູນ ໃຫ້ແກ່ອ່າງເກັບນ້ຳແຫ່ງນີ້ ຕະຫຼອດໄປ.
ຂ່າວ: ວິໄລສັກ ແກ້ວຫຼວງໂຄດ
ຄໍາເຫັນ