ໂຄງການນີ້, ມີເປົ້າໝາຍ ເພື່ອສົ່ງເສີມການຜະລິດ ກະສິກຳ ຄົບວົງຈອນ ໂດຍເນັ້ນການປູກພືດ ເປັນສິນຄ້າ ເປັນຕົ້ນ ປູກຫຍ້າເປັນອາຫານສັດ ແລະ ການລ້ຽງສັດ ປະເພດງົວ, ແກະ, ແບ້. ພາຍໃຕ້ບົດບັນທຶກຄວາມເຂົ້າໃຈນີ້ ທາງອົງການປົກຄອງແຂວງອັດຕະປື ແລະ ບໍລິສັດ ໂກເບັນດອກຄຳ ພະລັງງານສີຂຽວ-ກະສິກຳ ກຣຸບ ຈຳກັດ ຈະຮ່ວມມືກັນ ໃນການວາງແຜນການສຶກສາ ວິເຄາະຄວາມເໝາະສົມຂອງພື້ນທີ່, ປຽບທຽບຕົ້ນທຶນຜົນຕອບແທນ ແລະ ວາງແນວທາງການພັດທະນາ ໂຄງການຢ່າງຍືນຍົງໃນອານາຄົດ. ໂຄງການດັ່ງກ່າວນີ້, ຄາດວ່າຈະເປັນການປະກອບສ່ວນພັດທະນາເສດຖະກິດ ທາງດ້ານອຸດສາຫະກຳ - ກະສິກໍາ ປູກພືດ ແລະ ລ້ຽງສັດ ເພື່ອສ້າງຜົນຜະລິດໃຫ້ມີສະບຽງອາຫານ ສະໜອງຮັບໃຊ້ພາຍໃນ ເພື່ອທົດແທນການນໍາເຂົ້າ ແລະ ສົ່ງອອກ, ນໍາເຕັກໂນໂລຢີຂັ້ນສູງ ທີ່ທັນສະໄໝຂະໜາດໃຫຍ່ມາໃຫ້ຊາວກະສິກອນໄດ້ມີອາຊີບຄົງທີ່, ເປັນການສ້າງວຽກເຮັດງານທໍາ ແລະ ສ້າງລາຍໄດ້ມາໃຫ້ປະຊາຊົນ. ພ້ອມທັງຍົກລະດັບການກະເສດ ຢູ່ 3 ເມືອງ ຂອງແຂວງອັດຕະປື ໃຫ້ມີຄວາມໝັ້ນຄົງ ແລະ ຍືນຍົງ.
ພິທີລົງນາມເຊັນບົດບັນທຶກຄວາມເຂົ້າໃຈດັ່ງກ່າວນີ້, ໄດ້ຈັດຂຶ້ນໃນວັນທີ 6 ສິງຫາຜ່ານມາ ທີ່ໂຮງແຮມຮວງແອັງອັດຕະປື, ຕາງໜ້າຝ່າຍອົງການປົກຄອງແຂວງອັດຕະປື ລົງນາມໂດຍ ທ່ານ ມີໄຊ ສີສະແຫວງສຸກ ວ່າການຫົວໜ້າພະແນກແຜນການ ແລະ ການລົງທຶນແຂວງ, ທ່ານ ກົງໃຈ ສີດາວົງ ຫົວໜ້າພະແນກກະສິກຳ ແລະ ປ່າໄມ້ແຂວງ, ທ່ານ ສຸວັນສີ ແກ້ວວີເສີດ ຫົວໜ້າພະແນກ ຊັບພະຍາກອນທຳມະຊາດ ແລະ ສິ່ງແວດລ້ອມແຂວງ, ມີຕາງໜ້າອົງການປົກຄອງເມືອງສາມັກຄີໄຊ, ເມືອງໄຊເສດຖາ, ເມືອງຊານໄຊ, ຝ່າຍບໍລິສັດລົງນາມໂດຍ ທ່ານ ເຊຍ ລານ ຍີ້ນ ອຳນວຍການ ບໍລິສັດ ໂກເບັນດອກຄຳ ພະລັງງານສີຂຽວ-ກະສິກຳ ກຣຸບ ຈຳກັດ, ທ່ານ ຫວັດສະດີ ຂຸມເພັດສະວົງ ຜູ້ອຳນວຍການໃຫຍ່ບໍລິສັດ ໂກເບັນດອກຄຳ, ໂດຍຊ້ອງໜ້າ ທ່ານ ທະນູໄຊ ບັນຊາລິດ ຮອງເຈົ້າແຂວງອັດຕະປື ພ້ອມດ້ວຍພາກສ່ວນທີ່ກ່ຽວຂ້ອງ ເຂົ້າຮ່ວມເປັນສັກຂີພິຍານ.
(ຂ່າວ-ພາບ: ມະນີວອນ).
ຄໍາເຫັນ