ໂດຍ: ພຸດທະພອນ
ບໍລິສັດ ອາຊີ-ໂປຕາສ ສາກົນ ບໍລິຈາກເງິນ 300 ລ້ານກີບ ເພື່ອການກຸສົນ ສະແດງເຖິງຄວາມຮັກອັນສູງສົ່ງຂອງ ອາຊີ-ໂປຕາສ ສາກົນ ເພື່ອຊິວິດການເປັນຢູ່ຂອງແມ່ຍິງ ແລະ ເດັກນ້ອຍຜູ້ທຸກຍາກທີ່ຢູ່ເຂດຫ່າງໄກສອກຫຼີກໃນ ສປປ ລາວ
ງານການກຸສົນ ເພື່ອຊ່ວຍເຫຼືອແມ່ຍິງ ແລະ ເດັກນ້ອຍຜູ້ທຸກຍາກທີ່ຢູ່ເຂດຫ່າງໄກສອກຫຼີກ ໄດ້ຈັດຂຶ້ນຢ່າງຄຶກຄື້ນທີ່ນະຄອນຫຼວງວຽງຈັນເມື່ອບໍ່ດົນມານີ້. ໂດຍມີ ທ່ານ ນາງ ນາລີ ສີສຸລິດ ພັນລະຍາປະທານປະເທດແຫ່ງ ສປປ ລາວ ປະທານຄະນະທີ່ປຶກສາສະມາຄົມຫັດຖະກຳລາວ ແລະ ໃຫ້ກຽດເຂົ້າຮ່ວມມອບໃບກຽດຕິຄຸນຂອງ ທ່ານ ນາງ ປານີ ຢາທໍ່ຕູ້ ຮອງປະທານປະເທດ ພ້ອມດ້ວຍບັນດາຄອບຄົວການນໍາ, ບັນດາທູຕານຸທູດ, ອົງການຈັດຕັ້ງສາກົນ, ພ້ອມດ້ວຍມວນຊົນ, ບໍລິສັດ, ຫ້າງ, ຮ້ານ ແລະ ຜູ້ໃຫ້ການສະໜັບສະ ໜູນເຂົ້າຮ່ວມ.
ໃນງານການກຸສົນຄັ້ງນີ້, ບໍລິສັດ ອາຊີ-ໂປຕາສ ສາກົນ ໄດ້ປະກອບສ່ວນເປັນເງິນ 300 ລ້ານກີບ ຊຶ່ງເປັນການຊ່ວຍເຫຼືອຊີວິດການເປັນຢູ່ໃຫ້ດີຂຶ້ນ ສໍາລັບແມ່ຍິງ ແລະ ເດັກນ້ອຍຜູ້ທຸກຍາດທີ່ຢູ່ເຂດຫ່າງໄກສອກຫຼີກໃນລາວ. ເງິນບໍລິຈາກໃນງານການກຸສົນຄັ້ງນີ້, ຈະນໍາໃຊ້ເຂົ້າໃນໂຄງການຫ່ວງໃຍໄປເຖິງ ປະຈໍາປີ 2023 ປະກອບມີ: ຊ່ວຍເຫຼືອແມ່ຍິງ ແລະ ເດັກນ້ອຍໃນບັນດາແຂວງ, ເຂດ, ບ້ານ ທີ່ຖືກໄພນໍ້າຖ້ວມ, ສ້ອມແປງເຮືອນ ແລະ ໂຮງຮຽນ; ປະກອບສ່ວນເຄື່ອງມືການແພດ (ເຄື່ອງຊ່ວຍຫາຍໃຈ ຫ້ອງ ICU) ແລະ ຢາປົວພະຍາດໃຫ້ ໂຮງໝໍ ແລະ ສຸກສາລາ; ມອບທຶນການສຶກສາໃຫ້ນັກຮຽນເກັ່ງຈາກຄອບຄົວທຸກຍາກຂາດເຂີນ ແລະ ແຜນຊຸກຍູ້ປະກອບສ່ວນທົ່ວສັງຄົມອື່ນໆ.
ທ່ານ ນາງ ນາລີ ສີສຸລິດ ໄດ້ກ່າວໃນພິທີວ່າ: ໄດ້ຕີລາຄາສູງເຖິງຄວາມໝາຍຄວາມສໍາຄັນ ຂອງງານຫັດຖະກໍາ-ເດີນແບບເພື່ອການກຸສົນໃນຄັ້ງນີ້ ແລະ ໄດ້ຊົມເຊີຍຕໍ່ທຸກພາກສ່ວນທີ່ສະໜັບສະໜູນຊ່ວຍເຫຼືອໃນຄັ້ງນີ້ ແລະ ທ່ານໄດ້ກ່າວອີກວ່າ: ການນໍາຂອງລາວ ຍາມໃດກໍເອົາໃຈໃສ່ຕໍ່ກັບແມ່ຍິງ ແລະ ເດັກນ້ອຍທີ່ທຸກຈົນ, ກິດຈະກໍາເພື່ອການກຸສົນ ແມ່ນສອດຄ່ອງກັບທິດທາງການຊີ້ນໍາຂອງພັກ ແລະ ລັດ, ຊ່ວຍໃຫ້ປະເທດກ້າວສູ່ຄວາມສີວິໄລ, ຊ່ວຍໃຫ້ປະຊາຊົນຫຼຸດພົ້ນອອກຈາກຄວາມດ້ອຍພັດທະນາ. ໝາກຜົນທີ່ໄດ້ຮັບແມ່ນທັນເວລາ ແລະ ໃຫ້ປະຊາຊົນຫຼຸດພົ້ນອອກຈາກຄວາມທຸກຍາກ, ກ້າວໄປສູ່ຄວາມຮັ່ງມີ ແລະ ສົ່ງເສີມປະຊາຊົນບັນດາເຜົ່າໃຫ້ມີການພັດທະນາຂຶ້ນເລື້ອຍໆ.
ໃນການປະກອບສ່ວນ ຂອງ ບໍລິສັດອາຊີ-ໂປຕາສ ສາກົນ, ທ່ານ ຖຸງ ຢຸງເຫີງ (Tong Yongheng) ຮອງອໍານວຍການ ໄດ້ກ່າວວ່າ: ການສະສົມຄຸນງາມຄວາມດີເປັນການຫຼໍ່ຫຼອມຄວາມຮັກອັນຍິ່ງໃຫຍ່, ທຸກຢາດເຫື່ອຈະລວມກັນເປັນພະລັງມະຫາສານ ໃນກິດຈະກໍາການກຸສົນເພື່ອຊ່ວຍເຫຼືອແມ່ຍິງ ແລະ ເດັກນ້ອຍທີ່ທຸກຈົນ. ອາຊີ-ໂປຕາສ ສາກົນ ໃນນາມເປັນວິສາຫະກິດ ທີ່ພັດທະນາຢູ່ ສປປ ລາວ ໄດ້ປູກຝັງຄວາມຮັກອັນຍິ່ງໃຫຍ່ມາໂດຍຕະຫຼອດ, ພາຍໃຕ້ທິດນໍາຂອງແນວຄິດການພັດທະນາ ການເຄົາລົບ, ການເຊື່ອມໂຍງ, ການປະຕິບັດຕົວຈິງ ແລະ ການຊະນະທັງຄູ່, ໄດ້ຕັ້ງໜ້າປະຕິບັດຄວາມຮັບຜິດຊອບຕໍ່ສັງຄົມ ແລະ ຕອບແທນຄືນໃຫ້ແກ່ສັງຄົມລາວ, ບົນເສັ້ນທາງການສະແຫວງຫາຄວາມສຸກໃຫ້ແກ່ປະຊາຊົນ ແລະ ການອຸທິດຕົນເພື່ອສັງຄົມ, ທາງບໍລິສັດຍິນດີທີ່ຈະຮ່ວມກັບທຸກວົງຄະນະຍາດໃນສັງຄົມ ເພື່ອສົ່ງເສີມວຽກງານສາທາລະນະປະໂຫຍດ ແລະ ພາລະກິດສັງຄົມຕ່າງໆ ໃຫ້ມີການພັດທະນາຢ່າງມີປະສິດທິຜົນຍາວນານ. ໃນອະນາຄົດ, ບໍລິສັດຈະຢຶດໝັ້ນໃນທາງປະຕິບັດ, ພ້ອມທີ່ໃຫ້ຄວາມຮັກຄວາມເມດຕາ, ຈະຖືການປະຕິບັດໃຫ້ຫຼາຍຂຶ້ນ ແລະ ຂະຫຍາຍຜົນປະໂຫຍດໃຫ້ກວ້າງຂຶ້ນເປັນເປົ້າໝາຍ, ໃນຖານະເປັນຜູ້ຊ່ວຍແຮງໜຶ່ງ ປະກອບສ່ວນກໍາລັງແຮງຢ່າງຕັ້ງໜ້າຄວາມຈະເລີນຮຸ່ງເຮືອງຂອງສັງຄົມລາວ. ດັ່ງທີ່ຮູ້ນໍາກັນ, ອາຊີ-ໂປຕາສ ສາກົນ ແມ່ນວິສາຫະກິດລະດັບສາກົນ ທີ່ດໍາເນີນທຸລະກິດດ້ານການຂຸດຄົ້ນແຮ່ເກືອໂປຕາສ, ຜະລິດ ແລະ ຈໍາໜ່າຍຝຸ່ນໂປຕາສ ຊຶ່ງໄດ້ນໍາໃຊ້ເງິນທຶນຂອງຕົນ, ຂໍ້ເດັ່ນດ້ານເຕັກໂນໂລຊີ ແລະ ຄວາມສາມາດໃນການຄຸ້ມຄອງ ເພື່ອພັດທະນາເປັນຖານການຜະລິດ ຝຸ່ນໂປຕາສ ທີ່ໃຫຍ່ທີ່ສຸດໃນອາຊີຕາເວັນອອກສ່ຽງໃຕ້, ອອກແຮງຊຸກຍູ້ການພັດທະນາຫັນອຸດສາຫະກໍາເປັນທັນສະໄໝຂອງລາວ. ບໍລິສັດ ບໍ່ພຽງແຕ່ເປັນຜູ້ຊ່ວຍແຮງໃຫ້ເສດຖະກິດຂອງລາວໃນຂົງເຂດບໍ່ແຮ່ເທົ່ານັ້ນ, ແຕ່ຍັງມີຄວາມກະຕືລືລົ້ນໃນພາລະກິດດ້ານສັງຄົມ ແລະ ຊີວິດການເປັນຢູ່ຂອງປະຊາຊົນອີກດ້ວຍ, ຈາກສະຖິຕິທີ່ບໍ່ທັນຄົບຖ້ວນ, ການຊ່ວຍເຫຼືອເງິນທຶນ ໄດ້ຊ່ວຍເຫຼືອບັນເທົາຢ່າງກວ້າງຂວາງ ຊຶ່ງປົກຄຸມທັງດ້ານວັດທະນະທໍາ, ການສຶກສາ, ການປ້ອງກັນຄວາມສະຫງົບ, ກິລາ, ກະສິກໍາ, ການແກ້ໄຂຄວາມທຸກຍາກ ແລະ ອີກຫຼາຍກິດຈະກໍາ, ຜ່ານການຈັດຕັ້ງກອງທຶນພິເສດ, ການຊ່ວຍກໍ່ສ້າງເສັ້ນທາງ, ຂົວ ແລະ ໂຄງລ່າງພື້ນຖານຕ່າງໆ, ການໃຫ້ທຶນສະໜັບສະໜູນກິດຈະກໍາທາງວັດທະນະທໍາ ແລະ ກິລາ, ການນໍາມາຊຶ່ງທາງດ້ານເຕັກໂນໂລຊີທີ່ກ້າວໜ້າ ແລະ ປະສົບການ, ການຊ່ວຍເຫຼືອກໍ່ສ້າງໂຮງຮຽນ, ການບໍລິຈາກປຸ໋ຍ ແລະ ແນວພັນພືດ ແລະ ການເຄື່ອນໄຫວທາງສັງຄົມອື່ນໆ, ພວກເຮົາໄດ້ຊ່ວຍເຫຼືອແກ້ໄຂບັນຫາຮີບດ່ວນ ແລະ ຈໍາເປັນທີ່ສຸດໃນການພັດທະນາຂອງລາວ. ຮູບແບບການແກ້ໄຂຄວາມທຸກຍາກດ້ວຍການຜະລິດ ທີ່ນໍາມາປະຕິບັດໃນບ້ານທຸກຍາກ ຢູ່ທ້ອງຖິ່ນທີ່ຕັ້ງໂຄງການ ໄດ້ປະສົບຄວາມສໍາເລັດໃນການກະຕຸ້ນທ່າແຮງຂອງການຫັນກະສິກໍາເປັນທັນສະໄໝໃນທ້ອງຖິ່ນ, ຂັບເຄື່ອນໃຫ້ປະຊາຊົນທັງໝົດຫຼຸດພົ້ນອອກຈາກຄວາມທຸກຍາກ ແລະ ກ້າວເຂົ້າສູ່ຄວາມຮັ່ງມີ, ທັງດຶງດູດຄວາມສົນໃຈໃນການຮຽນຮູ້ໃຫ້ແກ່ພາຍໃນ ແລະ ຕ່າງປະເທດ. ເມື່ອບໍ່ດົນມານີ້, ອາຊີ-ໂປຕາສ ສາກົນ ໄດ້ປະກອບສ່ວນຊ່ວຍເຫຼືອສາທາລະນະປະໂຫຍດສັງຄົມຢ່າງຕໍ່ເນື່ອງ, ສົ່ງເສີມກິດຈະກໍາຕ່າງໆກ້າວໄປສູ່ລະດັບໃໝ່. ໃນຕົ້ນເດືອນນີ້, ອາຊີ-ໂປຕາສ ສາກົນ ແລະ ກະຊວງປ້ອງກັນຄວາມສະຫງົບ ຂອງ ສປປ ລາວ ໄດ້ລົງນາມ ບົດບັນທຶກຄວາມເຂົ້າໃຈກ່ຽວກັບໂຄງການທຶນອຸດໜູນຊ່ວຍເຫຼືອວຽກງານປ້ອງກັນຄວາມສະຫງົບ ໂດຍແຕ່ລະປີ ບໍລິສັດ ຈະໃຫ້ທຶນ 300.000 ໂດລາ ເພື່ອປະຕິບັດນະໂຍບາຍຕໍ່ນາຍ ແລະ ພົນຕຳຫລວດ, ນັກປະຕິວັດອາວຸໂສ, ພະນັກງານ ບໍານານ, ຜູ້ໄດ້ຮັບບາດເຈັບ, ເສຍອົງຄະ ແລະ ຄອບຄົວຜູ້ເສຍຊີວິດໃນການປະຕິບັດໜ້າທີ່ ແລະ ມີຜົນງານຕໍ່ປະເທດຊາດ.
ໃນທ້າຍເດືອນຕຸລາ, ອາຊີ-ໂປຕາສ ສາກົນ ໄດ້ຈັດພິທີມອບ-ຮັບທຶນຊ່ວຍເຫຼືອຄູ ແລະ ນັກຮຽນຄັ້ງ ທໍາອິດຂອງລາວ ໂດຍມີ ທ່ານ ພຸດ ສິມມາລາວົງ ລັດຖະມົນຕີກະຊວງສຶກສາທິການ, ບັນດາການນໍາລະດັບສູງ ແລະ ຊື່ມວນຊົນ ໄດ້ເປັນສັກຂີພິຍານໃນຄັ້ງນີ້ດ້ວຍ, ທຶນຊ່ວຍເຫຼືອດ້ານການສຶກສາຈໍານວນ 700.000 ໂດລາ ທີ່ບໍລິສັດສະໜັບສະໜູນ ໄດ້ຖືກໂອນໄປຍັງກະຊວງສຶກສາທິການ ເພື່ອຊ່ວຍເຫຼືອຄູ ແລະ ນັກຮຽນ-ນັກສຶກສາໃນເຂດທຸກຍາກ, ນັກຮຽນທຸກຍາກໃນວິທະຍາໄລຕ່າງໆ ແລະ ກໍ່ສ້າງບຸກຄະລາກອນເຕັກນິກວິຊາການ.
ໃນໄລຍະປະສົບກັບໄພນໍ້າຖ້ວມປີນີ້, ອາຊີ-ໂປຕາສ ສາກົນ ກໍໄດ້ເຂົ້າໄປຊ່ວຍເຫຼືອທັນທີ ໂດຍແບ່ງອອກເປັນ 3 ງວດ: ສະໜອງສິ່ງຂອງບັນເທົາທຸກທີ່ມີມູນຄ່າ 100 ລ້ານກີບ, 2,5 ຕື້ກີບ ແລະ 1.896,6 ລ້ານກີບ ໂດຍຜ່ານອໍານາດການປົກຄອງທ້ອງຖິ່ນ, ອອກແຮງສະໜັບສະໜູນຢ່າງເຕັມສ່ວນ ເພື່ອຊ່ວຍເຫຼືອປະຊາຊົນໃນການສ້າງສາຄອບຄົວຄືນໃໝ່ ໃນເຂດປະສົບໄພ ເພື່ອສົ່ງມອບຄວາມອົບອຸ່ນ ແລະ ຄວາມຫວັງໄປສູ່ປະຊາຊົນໃນເຂດປະສົບໄພ ຊຶ່ຶ່ງເປັນການສະແດງໃຫ້ເຫັນເຖິງຄວາມເຂັ້ມແຂງ ແລະ ຄວາມຮັບຜິດຊອບຂອງວິສາຫະກິດໃຫຍ່.
ຈິດໃຈແຫ່ງຄວາມຮັກ ເປັນແສງສະຫວ່າງໃຫ້ກັບຄວາມຝັນ, ການກຸສົນໄດ້ເຕົ້າໂຮມຄວາມຫວັງ. ພວກເຮົາເຊື່ອໝັ້ນວ່າ ພາຍໃຕ້ການນໍາພາທີ່ຖືກຕ້ອງຂອງພັກ ແລະ ລັດ, ດ້ວຍຄວາມຫວ່ງໃຍຢ່າງໃກ້ຊິດຂອງບັນດາທ່ານການນໍາ ແລະ ດ້ວຍການຊ່ວຍເຫຼືອຂອງບັນດາວິສາຫະກິດທີ່ຫ່ວງໃຍ, ປະຊາຊົນລາວທີ່ດຸໝັ່ນ ແລະ ພາກພຽນ ຈະກ້າວໄປຂ້າງໜ້າຢ່າງອົງອາດກ້າຫານ ແລະ ສ້າງໜ້າປະຫວັດສາດໃໝ່ແຫ່ງຄວາມຈະເລີນຮຸ່ງເຮືອງ ແລະ ເຂັ້ມແຂງຂອງຊາດ.
ຄໍາເຫັນ