ໜັງສືພິມ Kyodo News ລາຍງານວ່າ: ເທດສະບານນະຄອນກຽວໂຕ ໄດ້ເລີ່ມນຳໃຊ້ລະບົບພາສີທີ່ພັກແບບໃໝ່ 5 ລະດັບ ຊຶ່ງມີການເກັບຕັ້ງແຕ່ 200 ເຢນ ໄປຈົນເຖິງສູງສຸດ 10,000 ເຢນ (ປະມານ 64.1 ໂດລາ) ຕໍ່ຄົນຕໍ່ຄືນ. ໂດຍເປັນການປັບເພດານພາສີສູງສຸດຂຶ້ນຈາກລະດັບກ່ອນໜ້ານີ້ທີ່ 1,000 ເຢນ. ອີງຕາມຂໍ້ມູນຈາກກະຊວງກິດຈະການພາຍໃນ ແລະ ການສື່ສານ ລະບຸວ່າ: ອັດຕາພາສີ ໃໝ່ນີ້ແມ່ນອັດຕາຄົງທີ່ໆສູງທີ່ສຸດເທົ່າທີ່ເຄີຍເກັບໂດຍອຳນາດການປົກຄອງທ້ອງຖິ່ນໃນປະເທດຍີ່ປຸ່ນ.
ສຳລັບລະບົບພາສີທີ່ພັກ 5 ລະດັບມີອັດຕາດັ່ງຕໍ່ໄປນີ້: ຄ່າທີ່ພັກລາຄາຕໍ່າກວ່າ 6,000 ເຢນ ເກັບ 200 ເຢນ, ຄ່າທີ່ພັກ 6,000 ຫາ 20,000 ເຢນ ເກັບ 400 ເຢນ, ຄ່າທີ່ພັກ 20,000 – 50,000 ເຢນ ເກັບ 1,000 ເຢນ, ຄ່າທີ່ພັກ 50,000 ຫາ 100,000 ເຢນ ເກັບ 4,000 ເຢນ ແລະ ຄ່າທີ່ພັກ 100,000 ເຢນຂຶ້ນໄປ ເກັບພາສີສູງສຸດ 10,000 ເຢນ.
ທັງນີ້, ຄາດຄະເນວ່າການເພີ່ມຂຶ້ນດັ່ງກ່າວຈະຊ່ວຍໃຫ້ນະຄອນກຽວໂຕ ມີລາຍຮັບຈາກພາສີທີ່ພັກໃນປີງົບປະມານ 2026 ເພີ່ມຂຶ້ນຫຼາຍກວ່າສອງເທົ່າ ເປັນປະມານ 13.2 ຕື້ເຢນ ຊຶ່ງຈະຖືກນໍາໃຊ້ເພື່ອສະໜັບສະໜູນອຸດສາຫະກໍາການທ່ອງທ່ຽວ ແລະ ຟື້ນຟູຊັບສິນທາງວັດທະນະທໍາ.
ໃນຂະນະດຽວກັນ, ເມືອງຮິເມຈິ ແຂວງຮຽວໂງະ ໄດ້ຕັດສິນໃຈເພີ່ມຄ່າເຂົ້າຊົມຜາສາດຮິເມຈິ ຊຶ່ງເປັນມໍລະດົກໂລກ ເພີ່ມຂຶ້ນຈາກ 1,000 ເຢນ ເປັນ 2,500 ເຢນ ສຳລັບຜູ້ທີ່ມີອາຍຸ 18 ປີຂຶ້ນໄປ ແລະ ຜູ້ທີ່ບໍ່ໄດ້ອາໄສຢູ່ໃນພື້ນທີ່. ໂດຍລາຍຮັບທີ່ເພີ່ມຂຶ້ນຈະຖືກນຳໃຊ້ເພື່ອບຳລຸງຮັກສາ ແລະ ອະນຸລັກຜາສາດ.
ສະຖິຕິຈາກອຳນາດການປົກຄອງທ້ອງຖິ່ນສະແດງໃຫ້ເຫັນວ່າ: ໃນປີງົບປະມານ 2024 ມີຜູ້ເຂົ້າຊົມຜາສາດຮິເມຈິ ປະມານ 1.53 ລ້ານຄົນ, ເພີ່ມຂຶ້ນຈາກ 1.48 ລ້ານຄົນໃນປີກ່ອນ. ໂດຍໃນຈຳນວນນີ້ເປັນນັກທ່ອງທ່ຽວຕ່າງປະເທດເຖິງ 35.8% ຊຶ່ງເພີ່ມຂຶ້ນຢ່າງຫຼວງຫຼາຍຈາກ 30.6% ໃນປີກ່ອນ.
ຄໍາເຫັນ