ບັນດາພະແນກການ, ອົງການທຽບເທົ່າ ແຂວງຄໍາມ່ວນ ຮ່ວມຂໍານັບ ແລະ ສັກກະລະບູຊາ ຮູບຫລໍປະທານ ສຸພານຸວົງ

ການເຂົ້າຮ່ວມຂໍ່ານັບ ຢູ່ຕໍ່ໜ້າຮູບຫລໍ່ ຂອງທ່ານ ປະທານສຸພານຸວົງ ແມ່ນຈະໄດ້ດຳເນີນໄປຮອດວັນທີ 31 ມີນາ 2026, ຊຶ່ງບັນດາພະແນກການ, ອົງການທຽບເທົ່າ, ລັດວິສາຫະກິດ ແລະ ພາກສ່ວນຕ່າງໆອ້ອມຂ້າງແຂວງຈະໄດ້ຜັດປ່ຽນກັນເຂົ້າຮ່ວມຂໍ່ານັບໃນແຕ່ລະວັນ. ສະເພາະວັນທີ 17 ມີນາ ປະກອບມີ: ສະພາປະຊາຊົນແຂວງ, ຄະນະຈັດຕັ້ງແຂວງ, ຄະນະກວດກາ ພັກ-ລັດ ແຂວງ, ຄະນະໂຄສະນາອົບຮົມແຂວງ, ຄະນະແນວລາວສ້າງຊາດແຂວງ, ຄະນະບໍລິຫານງານຊາວໜຸ່ມ, ສະຫະພັນກຳມະບານ, ສະຫະພັນແມ່ຍິງ, ສະຫະພັນນັກຮົບເກົ່າແຂວງ ແລະ ໂຮງຮຽນ ມໍຕົ້ນນາໂບ. ເພື່ອສະແດງເຖິງຄວາມເຄົາລົບຮັກ ແລະ ກະຕັນຍູຮູ້ບຸນຄຸນ ຕໍ່ທ່ານປະທານ ສຸພານຸວົງ ຊຶ່ງແມ່ນປັນຍາຊົນຜູ້ຍິ່ງໃຫຍ່ ເປັນເຊື້ອເຈົ້າ ອົງໜຶ່ງທີ່ມີນໍ້າໃຈຮັກຊາດອັນດູດດື່ມ ທີ່ໄດ້ອຸທິດຕະຫຼອດຊີວິດຂອງຕົນ ໃນການຕໍ່ສູ້ຕິດພັນກັບການປະຕິວັດຂອງປະຊາຊົນ ມາແຕ່ຫົວທີ ແລະ ເປັນເວລາທີ່ຍືດເຍື້ອຍາວນານເຄິ່ງສັດຕະວັດ ໂດຍໄດ້ເດີນຕາມອຸດົມການຂອງພັກ, ເປັນຜູ້ຈັດຕັ້ງນໍາພາ ໃນພາລະກິດອັນຍິ່ງໃຫຍ່ ຂອງປະເທດລາວເຮົາ, ເປັນບູລຸດລາວຮຸ່ນທໍາອິດ ທີ່ໄດ້ເອົາຊີວິດຂອງຕົນຜູກພັນກັບການປະຕິວັດຕະຫຼອດມາ, ເປັນຜູ້ນຳທີ່ມີຄວາມຈົງຮັກພັກດີ ຕໍ່ອຸດົມການສັງຄົມນິຍົມ ຢ່າງແທ້ຈິງ, ໂດຍບໍ່ງໍ້ງ່ຽງຕໍ່ຄວາມຫຍຸ້ງຍາກລຳບາກ ມີຄວາມເສຍສະລະສູງ, ບໍ່ຫວາດຫວັ່ນຕໍ່ ກັບການຈັບກຸມຄຸມຂັງຂອງພວກສັດຕູ, ຍາມໃດກໍຕໍ່ສູ້ຄຽງບ່າຄຽງໄຫຼ່ກັບປະຊາຊົນ ດ້ວຍອຸດົມຄະຕິ ປະຕິວັດອັນສູງສົ່ງ ເພື່ອຄວາມເປັນເອກະລາດ, ອຳນາດອະທິປະໄຕ ແລະ ຄວາມວັດທະນາຖາວອນ ຂອງປະເທດຊາດ ເພື່ອຄວາມຢູ່ດີກິນດີຂອງປະຊາຊົນ. ປະທານ ສຸພານຸວົງ ແມ່ນແມ່ທັບຂອງປະຊາຊົນຢ່າງແທ້ຈິງ ໃນບັ້ນຮົບປ້ອງກັນຕົວເມືອງທ່າແຂກ ເປັນບັ້ນ ຮົບທີ່ດຸເດືອດທີ່ສຸດ ໃນປະຫວັດສາດ ຂອງປະເທດລາວເຮົາ ທີ່ໄດ້ຕໍ່ສູ້ ຕ້ານການຮຸກຮານຂອງ ພວກຈັກກະພັດລ່າເມືອງຂຶ້ນແບບເກົ່າ, ຊຶ່ງໄດ້ກາຍເປັນຍອດສູງແຫ່ງຄວາມຄຽດແຄ້ນ ຂອງປະຊາຊົນລາວບັນດາເຜົ່າ ທີ່ບໍ່ອາດຫຼົງລືມໄດ້.

ການເຂົ້າຮ່ວມຂໍ່ານັບ ແລະ ສັກກະລະບູຊາ ຢູ່ຕໍ່ໜ້າຮູບຫລໍ່ ປະທານສຸພານຸວົງ ກໍ່ເພື່ອຈົດຈໍາລໍາລຶກ, ຮໍ່າຮຽນເອົາແບບແຜນການດຳລົງຊີວິດ, ຄຸນສົມບັດສິນທຳປະຕິວັດ, ພ້ອມທັງເສີມຂະຫຍາຍແນວຄິດຊີ້ນໍາຂອງປະທານ ເຂົ້າໃນພາລະກິດປົກປັກຮັກສາ ແລະ ສ້າງສາ ພັດທະນາປະເທດຊາດ ກໍຄືແຂວງຄໍາມ່ວນ ໃຫ້ມີຄວາມຈະເລີນຮຸ່ງເຮືອງ ສີວິໄລ ຂຶ້ນໄປເລື້ອຍໆ. ໂອກາດນີ້, ບັນດາຄະນະຕ່າງໆ ຍັງໄດ້ເຂົ້າຢ້ຽມຊົມ ຫໍວາງສະແດງມູນເຊື້ອ ຊີວິດ ແລະ ພາລະກິດປະຕິວັດ ຂອງທ່ານ ປະທານສຸພານຸວົງຕື່ມ.

(ຂ່າວ: ກອງຄໍາ)