ຊຶ່ງກອງປະຊຸມໄດ້ຄົ້ນຄວ້າ, ປຶກສາຫາລື ແລະ ເປັນເອກະພາບກັນ ຕົກລົງຫຼາຍວຽກງານ ທີ່ເປັນທິດທາງໃຫ້ແກ່ຜູ້ແທນກອງປະຊຸມ ກໍຄືຂະແໜງ ກປ ໄດ້ນໍາໄປຈັດຕັ້ງຜັນຂະຫຍາຍໃຫ້ຖືກຕ້ອງ ແລະ ໄດ້ຮັບຜົນດີ ເພື່ອໃຫ້ປີມ້ວນທ້າຍຂອງແຜນວຽກຂອງຂະແໜງ ໄດ້ມີຜົນສຳເລັດ ແລະ ປະກອບສ່ວນສຳຄັນໃນຜົນຂອງການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX.
ບັນດາວຽກງານທີ່ເປັນທິດທາງໃນການຈັດຕັ້ງຜັນຂະຫຍາຍໃນປີ 2025 ຂອງຂະແໜງ ກປ ຜ່ານການດຳເນີນກອງປະຊຸມເປັນເວລາ 2 ມື້ສາມາດສະຫຼຸບ ແລະ ຕົກລົງວຽກງານທີ່ສຳຄັນຊຶ່ງ ທ່ານ ລິນຄໍາ ດວງສະຫວັນ ລັດຖະມົນຕີກະຊວງ ກປໄດ້ກ່າວໃຫ້ຮູ້ວ່າ: ກອງປະຊຸມໄດ້ສະຫຼຸບຕີລາຄາຜົນການຈັດຕັ້ງປະຕິບັດວຽກງານກປແລະພັດທະນາຊົນນະບົດປະຈໍາປີ 2024 ແລະທິດທາງແຜນການປີ 2025 ແລະການຈັດຕັ້ງປະຕິບັດຂອງຄະນະສະເພາະກິດ 19/ກມສພ (ຄະນະສະເພາະກິດແກ້ໄຂບັນຫາເຄັ່ງຮ້ອນທາງດ້ານເສດຖະກິດ-ການເງິນ, ບັນຫາເງິນເຟີ້ອັດຕາແລກປ່ຽນເງິນຕາ, ລາຄາສິນຄ້າແລະໜີ້ສິນຕ່າງປະເທດ) ໂດຍສະເພາະແມ່ນການສົ່ງເສີມການຜະລິດພາຍໃນເພື່ອຫຼຸດຜ່ອນການນໍາເຂົ້າແລະການລາຍງານກ່ຽວກັບການສ້າງເສດຖະກິດເອກະລາດເປັນເຈົ້າຕົນເອງໃນໄລຍະໃໝ່ຕິດພັນກັບຂະແໜງການ ກປ;ໄດ້ຮັບຟັງການປະກອບຄໍາເຫັນແລະຂໍ້ສະເໜີຈາກບັນດາກົມວິຊາການຂອງກະຊວງ ກປແລະບັນດາກະຊວງທີ່ກ່ຽວຂ້ອງ. ພ້ອມນີ້, ກອງປະຊຸມຍັງໄດ້ເປີດກວ້າງປຶກສາຫາລືດ້ວຍບັນຍາກາດຟົດຟື້ນແລະດ້ວຍຄວາມຮັບຜິດຊອບສູງແລະໄດ້ມີຄໍາເຫັນກ່ຽວກັບບັນຫາຕ່າງໆທີ່ສະສົມມາແລະເປັນສິ່ງອຸດຕັນໃຫ້ແກ່ຂະແໜງ ກປທີ່ແກ້ໄຂຍັງບໍ່ໄດ້.
ຜ່ານການດໍາເນີນກອງປະຊຸມສາມາດສະຫຼຸບແລະຕົກລົງວຽກງານສໍາຄັນດັ່ງນີ້:
1). ກອງປະຊຸມໄດ້ເປັນເອກະພາບແລະຮັບຮອງເອົາບົດສະຫຼຸບຕີລາຄາຜົນສໍາເລັດ, ດ້ານຄົງຄ້າງ, ສາເຫດແລະບົດຮຽນທີ່ຖອດຖອນໄດ້ຕໍ່ການຈັດຕັ້ງປະຕິບັດແຜນພັດທະນາກະສິກໍາ, ປ່າໄມ້ແລະພັດທະນາຊົນນະບົດປະຈໍາປີ2024ແລະທິດທາງແຜນການປີ2025ຈະພ້ອມກັນສຸມໃສ່ຈັດຕັ້ງປະຕິບັດຕາມເນື້ອໃນ4ແຜນງານຄືການຜະລິດຄໍ້າປະກັນສະບຽງອາຫານແລະໂພຊະນາການຊຶ່ງຈະໄດ້ມີການເນັ້ນດ້ານໂພຊະນາການໃຫ້ຫຼາຍຂຶ້ນ;ການຜະລິດກະສິກໍາເປັນສິນຄ້າຕິດພັນກັບການປຸງແຕ່ງຊຶ່ງຈະໄດ້ເນັ້ນໃສ່ການຜະລິດເພື່ອໜອງໂຮງງານປຸງແຕ່ງຂັ້ນຕົ້ນເພື່ອແປຮູບຜະລິດຕະພັນກະສິກໍາແລະເພີ່ມມູນຄ່າ; ການຄຸ້ມຄອງຊັບພະຍາກອນປ່າໄມ້ແລະການພັດທະນາຊົນນະບົດແກ້ໄຂຄວາມທຸກຍາກ.
2).ສືບຕໍ່ເພີ່ມທະວີຄວາມເອົາໃຈໃສ່ໃນການຊຸກຍູ້ສົ່ງເສີມການຜະລິດພາຍໃນໃຫ້ເຂັ້ມແຂງໂດຍສະເພາະເລັ່ງໃສ່ຊຸກຍູ້ການຜະລິດປັດໄຈການຜະລິດໃຫ້ສາມາດຕອບສະໜອງຕໍ່ຄວາມຕ້ອງການ (ຝຸ່ນ, ຫົວອາຫານສັດ...) ແລະສົ່ງເສີມການຜະລິດກະສິກໍາທີ່ມີທ່າແຮງແລະຕະຫຼາດຮອງຮັບເພື່ອສົ່ງອອກດ້ວຍຮູບແບບການຈັດຕັ້ງກຸ່ມການຜະລິດ, ສະມາຄົມແລະສະຫະກອນແບບໃໝ່ ໂດຍການຊຸກຍູ້ຜູ້ປະກອບການທັງພາຍໃນແລະຕ່າງປະເທດເຂົ້າມາມີສ່ວນຮ່ວມໃຫ້ຫຼາຍຂຶ້ນ;
3).ວຽກງານການຜະລິດເປັນສິນຄ້າກໍຄືວຽກງານປຸງແຕ່ງ ກປເຫັນວ່າຍັງມີບາງຂອດທີ່ຈະຕ້ອງໄດ້ຕົກລົງເປັນເອກະພາບໃຫ້ຈະແຈ້ງກັບຂະແໜງການອຸດສາຫະກໍາແລະການຄ້າກ່ຽວກັບບັນດາລາຍການໂຮງງານປຸງແຕ່ງກະສິກໍາທີ່ໄດ້ມອບ-ໂອນເພື່ອເຮັດໃຫ້ການດັດສົມໂຮງງານສອດຄ່ອງກັບຄວາມສາມາດຕົວຈິງໃນການສະໜອງວັດຖຸດິບສົ້ນເຂົ້າແລະສົ້ນອອກ, ການສະໜອງວັດຖຸດິບໃຫ້ໂຮງງານ, ເວົ້າລວມຕ້ອງໄດ້ເອົາໃຈໃສ່ຕື່ມຂອດການຜະລິດວັດຖຸດິບ-ການປຸງແຕ່ງຕິດພັນກັບການຕະຫຼາດ;
4).ວຽກງານຄຸ້ມຄອງຊັບພະຍາກອນປ່າໄມ້ຈະໄດ້ເອົາໃຈໃສ່ຄຸ້ມຄອງ3 ປະເພດປ່າໂດຍແນໃສ່ການຮັກສາປ່າທີ່ມີຢູ່ໃນປັດຈຸບັນໃຫ້ມີເນື້ອທີ່ດິນປ່າໄມ້ແລະປ່າໄມ້ປົກຫຸ້ມໃຫ້ໄດ້70%ຂອງເນື້ອທີ່ທົ່ວປະເທດ, ການອອກໃບທະບຽນທີ່ດິນໃນ3 ປະເພດປ່າແລະກໍານົດເຂດທີ່ດິນປ່າໄມ້ໃຫ້ຈະແຈ້ງລວມທັງການຄຸ້ມຄອງໂຮງງານປຸງແຕ່ງໄມ້, ການປູກໄມ້ແລະການສ້າງລາຍຮັບຈາກສິນເຊື່ອກາກບອນແລະການທ່ອງທ່ຽວທໍາມະຊາດເພື່ອສ້າງວຽກເຮັດງານທໍາໃຫ້ກັບຄົນທ້ອງຖິ່ນ;
5).ວຽກງານພັດທະນາຊົນນະບົດແລະແກ້ໄຂຄວາມທຸກຍາກເຫັນວ່າຂອດການປະສານງານກັບບັນດາຂະແໜງການທີ່ກ່ຽວຂ້ອງຍັງບໍ່ທັນໂລ່ງລຽນເທົ່າທີ່ຄວນຊຶ່ງຕ້ອງໄດ້ຜັນຂະຫຍາຍບັນດາຜົນຂອງການປືກສາຫາລືແລະທິດຊີ້ນໍາຂອງຄະນະຊີ້ນໍາຂັ້ນສູນກາງຕາມຂໍ້ຕົກລົງ121/ນຍ. ນອກຈາກນີ້, ຕ້ອງໄດ້ສືບຕໍ່ປັບປຸງດໍາລັດ348/ນຍລົງວັນທີ 16ພະຈິກ2017,ໂດຍສະເພາະບັນດາຕົວຊີ້ວັດຕ່າງໆໃຫ້ສອດຄ່ອງແທດເໝາະກັບສະພາບຄວາມເປັນຈິງໃນປັດຈຸບັນແລະໃຫ້ສອດຄ່ອງກັບບັນດານິຕິກໍາທີ່ກ່ຽວຂ້ອງຕື່ມເປັນຕົ້ນແມ່ນຄໍາສັ່ງຂອງກົມການເມືອງສູນກາງພັກເລກທີ097/ກມສພລົງວັນທີ18ກຸມພາ2020, ກົດໝາຍວ່າດ້ວຍການຈັດສັນພູມລໍາເນົາແລະອາຊີບເລກທີ45/ສພຊລົງວັນທີ15ມິຖຸນາ2018;
6).ສໍາລັບວຽກງານການລົງທຶນໃນຂະແໜງການຈະໄດ້ຄົ້ນຄວ້າປັບປຸງແລະຫຼຸດຂັ້ນຂອດຕ່າງໆເພື່ອອໍານວຍຄວາມສະດວກໃຫ້ຜູ້ປະກອບການເຂົ້າມາລົງທຶນໃນຂະແໜງການໃຫ້ຫຼາຍຂຶ້ນ. ໃນນີ້, ອັນສໍາຄັນພາກລັດຈະຕ້ອງໄດ້ມີສ່ວນຮ່ວມໃນການຄຸ້ມຄອງຄຸນນະພາບຫຼືມາດຕະຖານຂອງຜົນຜະລິດ, ຄວາມເປັນທໍາດ້ານລາຄາຕໍ່ຜູ້ຜະລິດ, ຕາຊັ່ງ, ຂອດການຂົນສົ່ງແລະອື່ນໆເປັນຕົ້ນແມ່ນການນໍາໃຊ້ຕູ້ຂົນສິນຄ້າລົດໄຟລາວ-ຈີນຊຶ່ງໄລຍະຜ່ານມາເຫັນວ່າຍັງມີຄວາມຫຍຸ້ງຍາກແລະຕົ້ນທຶນສູງ;
7). ນອກນັ້ນ, ກອງປະຊຸມມີການມອບຄາດໝາຍສູ້ຊົນແລະວຽກງານຈຸດສຸມຕົ້ນຕໍໃຫ້ບັນດາພະແນກ ກປຂັ້ນແຂວງໃນການຈັດຕັ້ງປະຕິບັດທິດທາງແຜນການປີ 2025 ເພື່ອຮັບປະກັນການຄໍ້າປະກັນດ້ານສະບຽງອາຫານ, ຫຼຸດຜ່ອນການນໍາເຂົ້າແລະຜະລິດເປັນສິນຄ້າສົ່ງອອກໂດຍຕິດພັນກັບການປຸງແຕ່ງແລະເພີ່ມມູນຄ່າໄປຕາມທິດເສດຖະກິດເອກະລາດເປັນເຈົ້າຕົນເອງໃຫ້ສໍາເລັດຕາມແຜນການທີ່ກໍານົດໄວ້ເປັນຕົ້ນໂຕເລກຄາດໝາຍສໍາລັບການຜະລິດຄໍ້າປະກັນສະບຽງອາຫານແລະໂພຊະນາການ; ປະເພດພືດບຸລິມະສິດແລະໂຄຕ້າການລ້ຽງງົວເພື່ອການຜະລິດເປັນສິນຄ້າ; ໂຕເລກຄາດໝາຍເພື່ອຄຸ້ມຄ້ອງແລະປົກປັກຮັກສາປ່າໄມ້, ໂຕເລກຄາດໝາຍວຽກງານພັດທະນາຊົນນະບົດແກ້ໄຂຄວາມທຸກຍາກ.
ທັງໝົດກໍແມ່ນບາງຈຸດສໍາຄັນທີ່ກອງປະຊຸມໄດ້ຄົ້ນຄວ້າແລະປຶກສາຫາລືກັນ, ເພື່ອເປັນທິດທາງໃຫ້ແກ່ຜູ້ແທນກອງປະຊຸມ ກໍຄືຂະແໜງ ກປ ໄດ້ນໍາໄປຈັດຕັ້ງຜັນຂະຫຍາຍຕາມຄວາມຮັບຜິດຊອບຂອງແຕ່ລະພາກສ່ວນ ແຕ່ຂັ້ນສູນກາງຮອດທ້ອງຖິ່ນ ໃຫ້ຖືກຕ້ອງ ແລະ ໄດ້ຮັບຜົນດີ.
ຄໍາເຫັນ