 |
ນາຍບ້ານໆນາທານກ້ວຍ ໄດ້ລາຍງານກ່ຽວກັບການກະກຽມໃນການສ້ອມແປງເສັ້ນທາງທີ່ເປ່ເພ ແລະ ກໍ່ສ້າງທາງເບຕົງວ່າ: ຍ້ອນສະພາບເສັ້ນທາງເຂົ້າບ້ານ ມີຄວາມຫຍຸ້ງຍາກ ແລະ ມັກເກີດນ້ຳຖ້ວມ ເຮັດໃຫ້ການສັນຈອນໄປ-ມາມີຄວາມລຳບາກ. ອົງການປົກຄອງບ້ານ ແລະ ປະຊາຊົນພາຍໃນບ້ານ ໄດ້ມີຄວາມເປັນເອກະພາບສົມທົບທຶນຮອນ, ແຮງງານ ເຂົ້າໃນການກໍ່ສ້າງເສັ້ນທາງເບຕົງ, ໂດຍໄດ້ຮັບການຊີ້ນໍາຈາກຄະນະນໍາຂອງເມືອງ ແລະ ຫ້ອງການກ່ຽວຂ້ອງ ສົມທົບຄິດໄລ່ແຜນງົບປະມານນຳໃຊ້, ມາດຖານການກໍ່ສ້າງ, ຕາມແຜນຄາດຄະເນຈະກໍ່ສ້າງ ມີລວງຍາວທັງໝົດ 800 ແມັດ ມີມູນຄ່າເກືອບ 2 ຕື້ກີບ, ຄາດໝາຍຈັດຕັ້ງປະຕິບັດ 5 ປີ ນັບແຕ່ປີ 2026 ເປັນຕົ້ນໄປ.
 |
ໃນໄລຍະເລີ່ມຕົ້ນນີ້ ໄດ້ກໍານົດເອົາຈຸດໜ້າໂຮງຮຽນປະຖົມບ້ານນາທານກ້ວຍ ໄລຍະ 100 ແມັດ, ຄາດຄະເນມູນຄ່າ ປະມານ 200 ລ້ານກີບ, ຊຶ່ງໄດ້ໃຊ້ແຮງງານຄວາມສາມັກຄີຂອງປະຊາຊົນ ເພື່ອແກ້ໄຂ ແລະ ຮັບປະກັນສາມາດໄປ-ມາໄດ້ ໃນເວລາຝົນຕົກ, ນ້ຳຖ້ວມ. ນອກນັ້ນ, ກໍໄດ້ໝູນໃຊ້ຫີນກ້ອນໃຫຍ່ຕາມລຳຫ້ວຍເພື່ອສ້າງກັນເຈື່ອນປະມານ 100 ແມັດກ້ອນ, ປະຊາຊົນພາຍໃນບ້ານ ກໍໄດ້ຕັ້ງໜ້າປະກອບສ່ວນໃນແຕ່ລະຫຼັງຄາເຮືອນ ຕາມເງື່ອນໄຂທີ່ໄດ້ເອກະພາບກັນ ໄດ້ທັງໝົດຈຳນວນ 52 ລ້ານກວ່າກີບ
ພິທີດັ່ງກ່າວໄດ້ຈັດຂຶ້ນ ໃນວັນທີ 30 ມັງກອນຜ່ານມາ, ທີ່ຈຸດກໍ່ສ້າງເສັ້ນທາງເບຕົງເສີມເຫຼັກ ບ້ານນາທານກ້ວຍ ໂດຍການເຂົ້າຮ່ວມຂອງ ທ່ານ ສະໄໝ ໂພທິສານ ຄະນະປະຈໍາພັກແຂວງ ເລຂາຄະນະບໍລິຫານງານພັກເມືອງ, ທ່ານ ບຸນສາ ຄ່ຽມມະນີຂັນໄຊ ປະທານຄະນະກຳມະການປົກຄອງເມືອງ, ມີການນໍາຂອງແຂວງ, ເມືອງ, ພະແນກການ, ອົງການທຽບເທົ່າອ້ອມຂ້າງແຂວງ, ເມືອງ ຕະຫຼອດຮອດ ປະຊາຊົນພາຍໃນບ້ານ ແລະ ພາກສ່ວນໃຫ້ການອຸປະຖໍາ ເຂົ້າຮ່ວມ.
 |
ໂອກາດນີ້, ທ່ານ ສະໄໝ ໂພທິສານ ກໍໄດ້ມອບເງິນຈຳນວນ 16 ລ້ານກວ່າກີບ, ພ້ອມດ້ວຍພາກສ່ວນຈາກພະແນກການ, ອົງການທຽບເທົ່າອ້ອມຂ້າງແຂວງ, ຫ້ອງການອ້ອມຂ້າງເມືອງ ແລະ ພາກສ່ວນທຸລະກິດ ກໍໄດ້ປະກອບສ່ວນ ເຂົ້າໃນການກໍ່ສ້າງທາງເບຕົງ ບ້ານນາທານກ້ວຍ.
(ພາບ-ຂ່າວ: ວິໄລວອນ ສິດທິໄຊ)
ຄໍາເຫັນ