 |
ທ່ານ ຄອນສະຫວັນ ທອງດີວົງ ໃຫ້ຮູ້ວ່າ: ພາຍຫຼັງໄດ້ຮັບທິດຊີ້ນຳ ແລະ ຄຳແນະນຳຈາກຄະນະກຳ ມະການເລືອກຕັ້ງຂັ້ນເທິງ ອຳນາດການປົກຄອງບ້ານໜອງບຶກໃຕ້ ໄດ້ເລັ່ງຈັດຕັ້ງປະຕິບັດວຽກງານຮອບດ້ານຢ່າງຕັ້ງໜ້າ ເປັນຕົ້ນກະກຽມສະຖານທີ່ປ່ອນບັດ, ກຳນົດບຸກຄະລາກອນຮັບໃຊ້ ແລະ ເກັບກຳສະຖິຕິຜູ້ມີສິດປ່ອນບັດເລືອກຕັ້ງໃຫ້ມີຄວາມລະອຽດຊັດເຈນ.
ປັດຈຸບັນ, ບ້ານໜອງບຶກໃຕ້ ມີຈຳນວນພົນທີ່ມີສິດປ່ອນບັດເລືອກຕັ້ງທັງໝົດ 818 ຄົນ ໂດຍໄດ້ກຳນົດເອົາຫ້ອງການປົກຄອງບ້ານໜອງບຶກໃຕ້ ເປັນໜ່ວຍປ່ອນບັດ ສຳລັບຜູ້ສູງອາຍຸ, ຜູ້ພິການ ຫຼື ຜູ້ທີ່ເຈັບເປັນທີ່ບໍ່ສາມາດເດີນທາງມາປ່ອນບັດໄດ້ດ້ວຍຕົນເອງ, ທາງຄະນະກຳມະການຂັ້ນບ້ານໄດ້ຈັດຕັ້ງ "ໜ່ວຍປ່ອນບັດເຄື່ອນທີ່" ເພື່ອນຳເອົາຫີບໄປບໍລິການໃຫ້ເຖິງເຮືອນ ເພື່ອຮັບປະກັນໃຫ້ພົນລະເມືອງທຸກຄົນໄດ້ໃຊ້ສິດປະຊາທິປະໄຕຂອງຕົນຢ່າງທົ່ວເຖິງ.
ດ້ານການປ້ອງກັນຊາດ-ປ້ອງກັນຄວາມສະຫງົບ ທ່ານນາຍບ້ານຢືນຢັນວ່າ ໄດ້ແຕ່ງຕັ້ງກຳລັງປ້ອງກັນບ້ານ ຕິດຕາມ ກວດກາຢ່າງໃກ້ຊິດ ເພື່ອຄວາມເປັນລະບຽບຮຽບຮ້ອຍ 100% ໃນຂອບເຂດໜ່ວຍປ່ອນບັດ. ພ້ອມກັນນັ້ນ, ກໍໄດ້ນຳໃຊ້ລະບົບໂທລະໂຄ່ງຂອງບ້ານ ເພື່ອໂຄສະນາເຜີຍແຜ່ ແລະ ປຸກລະດົມໃຫ້ປະຊາຊົນເຫັນໄດ້ຄວາມສຳຄັນຂອງການໄປໃຊ້ສິດເລືອກຕັ້ງໃນວັນທີ 22 ກຸມພາ 2026 ທີ່ຈະມາເຖິງນີ້.
 |
ສຳລັບຄະນະກຳມະການ ປະຈຳໜ່ວຍປ່ອນບັດເລືອກຕັ້ງຂັ້ນບ້ານມີທັງໝົດ 15 ທ່ານ, ຊຶ່ງທຸກທ່ານໄດ້ຜ່ານການຝຶກອົບຮົມດ້ານວິຊາການຢ່າງເຂັ້ມງວດ ບໍ່ວ່າຈະເປັນຂັ້ນຕອນການກວດກາລາຍຊື່, ການແນະນຳວິທີການໝາຍບັດທີ່ຖືກຕ້ອງ ເພື່ອຫຼີກເວັ້ນການເກີດບັດຕາຍ (ບັດບໍ່ໄດ້ມາດຕະຖານ) ແລະ ຂັ້ນຕອນການແຍກປະເພດບັດລະຫວ່າງ ສສຊ ແລະ ສສ ນວ ໃຫ້ມີຄວາມຊັດເຈນ ແລະ ໂປ່ງໃສ.
ຕອນທ້າຍ ທ່ານນາຍບ້ານໜອງບຶກໃຕ້ ໄດ້ສະແດງຄວາມເຊື່ອໝັ້ນຢ່າງສູງວ່າ ດ້ວຍການກະກຽມທີ່ຮັດກຸມ ແລະ ຄວາມຕື່ນຕົວຂອງປະຊາຊົນ ການເລືອກຕັ້ງໃນຄັ້ງນີ້ຈະດຳເນີນໄປດ້ວຍຜົນສຳເລັດອັນຈົບງາມ ແລະ ຮັບປະກັນການໄປໃຊ້ສິດໃຫ້ໄດ້ 100%.
ຂ່າວ: ເພັດສະໝອນ
ຄໍາເຫັນ