ບ້ານປາກແຄນ ສໍາເລັດບັ້ນຝຶກອົບຮົມ-ຫັດແອບບ້ານປ້ອມໝັ້ນສູ້ຮົບເອກະລາດ 

ພິທີປິດບັ້ນຝຶກອົບຮົມ-ຫັດແອບບ້ານປ້ອມໝັ້ນສູ້ຮົບເອກະລາດ ບ້ານປາກແຄນ ເມືອງເງິນ ແຂວງໄຊຍະບູລີ ໄດ້ຈັດຂຶ້ນໃນວັນທີ 14 ພຶດສະພາຜ່ານມາ ທີ່ສະໂມສອນບ້ານດັ່ງກ່າວ ພາຍຫຼັງທີ່ໄດ້ເປີດອົບຮົມມາແຕ່ວັນທີ 2 ພຶດສະພາຜ່ານມາ ໂດຍການເປັນປະທານຂອງສະຫາຍພັນໂທ ພອນສະຫວັນ ວໍລະສັກ ຫົວໜ້າກອງບັນຊາການປ້ອງກັນຄວາມສະຫງົບ(ປກສ)ເມືອງ, ມີຄະນະພັກ-ຄະນະບັນຊາ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
    ສະຫາຍ ພັນຕີ ບຸນທັນ ໄຊຍະລາດ ຮອງຫົວໜ້າການທະຫານ ກອງບັນຊາການທະຫານເມືອງໄດ້ຜ່ານບົດສະຫຼຸບຕີລາຄາການຝຶກອົບຮົມ-ຫັດແອບຄັ້ງນີ້ວ່າ: ຊຸດອົບຮົມຄັ້ງນີ້ມີຜູ້ເຂົ້າຮ່ວມທັງໝົດ 57 ສະຫາຍ, ໃນນີ້ພາກການເມືອງບັນລຸໄດ້ 85%, ພາກການທະຫານບັນລຸໄດ້ 87%, ພາກບ້ານປ້ອມໝັ້ນບັນລຸໄດ້ 90%, 
    ຕອນທ້າຍພິທີ ສະຫາຍ ພັນໂທ ພອນສະຫວັນ ວໍລະສັກ ໄດ້ໃຫ້ກຽດໂອ້ລົມ ພ້ອມທັງຮຽກຮ້ອງໃຫ້ກໍາລັງປ້ອງກັນຊາດຍົກສູງສະຕິລະວັງຕົວຕໍ່ກົນອຸບາຍຫັນປ່ຽນໂດຍສັນຕິຂອງກໍາລັງອິດທິປໍລະປັກ, ສືບຕໍ່ພົວພັນຮັດແໜ້ນຄວາມສາມັກຄີລະຫວ່າງກໍາລັງປ້ອງກັນຊາດ-ປ້ອງກັນຄວາມສະຫງົບ ແລະ ພໍ່ແມ່ປະຊາຊົນບັນດາເຜົ່າພາຍໃນບ້ານທົ່ວເມືອງ ຫັນລົງກໍ່ສ້າງຮາກຖານເຮັດໃຫ້ສະພາບມີຄວາມສະຫງົບ, ປະຕິບັດ 4 ເນື້ອໃນ 4 ຄາດໝາຍ ຕິດພັນກັບວຽກງານ 3 ສ້າງດ້ວຍການສຶກສາອົບຮົມການເມືອງນໍາພາແນວຄິດໃຫ້ມີຄວາມເລິກເຊິ່ງເຖິງທ່ອງ, ຮຽກຮ້ອງໃຫ້ອົງການປົກຄອງບ້ານ, ກອງຫຼອນຈົ່ງນໍາເອົາເນື້ອໃນຈິດໃຈບັ້ນຝຶກອົບຮົມໃນຄັ້ງນີ້ ໄປຈັດຕັ້ງປະຕິບັດໃຫ້ນັບມື້ເຂົ້າສູ່ລວງເລິກ ແນໃສ່ຮັບປະກັນເຮັດໃຫ້ຂອບເຂດຕົນຮັບຜິດຊອບມີຄວາມສະຫງົບປອດໄພ 100%. 
ຂ່າວ: ຮທ ສົມນຶກ ພູພົມມະຈິດ, ພາບ: ປກຊ ທະຫານເມືອງເງິນ