 |
ທ່ານ ລັດສະໝີ ມູນລະສິງ ເລຂາພັກບ້ານນາຍບ້ານໂພນຕ້ອງຈອມມະນີ ໄດ້ໃຫ້ສຳພາດຕໍ່ນັກຂ່າວໜັງສືພິມປະຊາຊົນ ວ່າ: ການເລືອກຕັ້ງສະມາຊິກສະພາແຫ່ງຊາດ (ສສຊ) ຊຸດທີ X ແລະ ສະມາຊິກສະພາປະຊາຊົນຂັ້ນແຂວງ (ສສຂ/ນວ) ຊຸດທີ V ເປັນການປັບປຸງກົງຈັກການຈັດຕັ້ງ ແລະ ບຸກຄະລາກອນໃນລະບົບການເມືອງຢູ່ຂັ້ນສູນກາງ ແລະ ທ້ອງຖິ່ນເພື່ອເຮັດໃຫ້ມີຄວາມເຂັ້ມແຂງ ແລະ ໜັກແໜ້ນສາມາດປະຕິບັດໜ້າທີ່ການເມືອງໃນໄລຍະໃໝ່ຢ່າງມີປະສິດທິພາບ ແລະ ປະສິດທິຜົນ, ເພື່ອປະກອບສ່ວນເຂົ້າໃນການກະກຽມ ແລະ ດໍາເນີນການເລືອກຕັ້ງພ້ອມທັງປຸກລະດົມປະຊາຊົນລາວບັນດາເຜົ່າເຂົ້າຮ່ວມໃຫ້ເປັນຂະບວນຟົດຟື້ນ. ການເລືອກຕັ້ງຖືເປັນປາງບຸນໃຫຍ່ຂອງຊາດ ດໍາເນີນໄປດ້ວຍບັນຍາກາດເບີກບານມ່ວນຊື່ນ, ມີປະຊາທິປະໄຕ, ຖືກຕ້ອງຕາມກົດໝາຍເຮັດໃຫ້ການເລືອກຕັ້ງບັນລຸຜົນສໍາເລັດຕາມຄາດໝາຍທີ່ວາງໄວ້.
ໃນໄລຍະຜ່ານມາ, ບ້ານໂພນຕ້ອງຈອມມະນີໄດ້ໂຄສະນາປະຊາສໍາພັນໃຫ້ປະຊາຊົນຮັບຮູ້ກ່ຽວກັບການເລືອກຕັ້ງ, ຮູ້ຈັກຜູ້ລົງສະໝັກຮັບເລືອກຕັ້ງ ສສຊ, ສສຂ/ນວ ດ້ວຍຫຼາຍຮູບແບບເຊັ່ນ: ໂຄສະນາຜ່ານທາງໂທລະໂຄ່ງໃຫຍ່ຂອງບ້ານ, ສົ່ງຂໍ້ມູນ, ລາຍຊື່ຂອງຜູ້ຮັບສະໝັກເລືອກຕັ້ງລົງໃນກຸ່ມວັອດແອັບຂອງຫົວໜ້າໜ່ວຍຢູ່ພາຍໃນບ້ານ ແລະ ໄດ້ຕິດປະຫວັດການເຄື່ອນໄຫວຂອງຜູ້ລົງຮັບສະໜັກ ສສຊ, ສສຂ ໃສ່ກະດານຂ່າວຢູ່ຫ້ອງການບ້ານ.
 |
ສໍາລັບບ້ານໂພນຕ້ອງຈອມມະນີໄດ້ເກັບກໍາຂໍ້ມູນລາຍຊື່ຜູ້ມີສິດປ່ອນບັດເລືອກຕັ້ງທີ່ມີອາຍຸ 18 ປີຂຶ້ນໄປຢ່າງຄົບຖ້ວນ ແລະ ທົ່ວເຖິງ, ຜູ້ມີສິດປ່ອນບັດຕາມສໍາມະໂນຄົວຢູ່ພາຍໃນບ້ານແຕ່ສາມາດປ່ອນບັດຢູ່ທ້ອງຖິ່ນອື່ນ ແລະ ຜູ້ມີສິດປ່ອນບັດຢູ່ບ້ານໂພນຕ້ອງຈອມມະນີທີ່ມາຈາກທ້ອງຖິ່ນອື່ນ. ພາຍໃນບ້ານໂພນຕ້ອງຈອມມະນີ ມີພົນລະເມືອງທັງໝົດ 3,869 ຄົນ ຍິງ 1,850 ຄົນ. ໃນນັ້ນ, ຜູ້ທີ່ມີສິດປ່ອນບັດອາຍຸ 18 ປີຂຶ້ນໄປມີ 2,247 ຄົນຍິງ 1,231 ຄົນ. ສໍາລັບເຂດເລືອກຕັ້ງທີ 1 ນະຄອນຫຼວງວຽງຈັນມີຜູ້ຮັບສະໝັກເລືອກຕັ້ງເປັນ ສສຊ ຊຸດທີ X ມີ 25 ທ່ານ, ເລືອກເອົາ 19 ທ່ານ, ຂີດອອກ 6 ທ່ານ, ສສ ນວ ຊຸດທີ V ມີ 7 ທ່ານ, ເລືອກເອົາ 5 ທ່ານ ຂີດອອກ 2 ທ່ານ.
ຂ່າວ: ບຸນຕອມ; ພາບ: ບຸນອູ້ມ
ຄໍາເຫັນ