ໃນປີ 2024 ສະພາບເສດຖະກິດມະຫາພາກພາຍຂອງແຂວງ ບໍລິຄໍາໄຊ ອາດຈະຍັງສືບຕໍ່ພົບຄວາມຫຍຸ້ງຍາກ ແລະ ມີສິ່ງທ້າທາຍຫຼາຍດ້ານ ຊຶ່ງຈະສົ່ງຜົນກະທົບຕໍ່ການພັດທະນາເສດຖະກິດ-ສັງຄົມ ພາຍໃນແຂວງ.
ແຕ່ເຖິງຢ່າງໃດກໍ່ຕາມ ເພື່ອສ້າງພື້ນຖານທີ່ໜັກແໜ້ນໃຫ້ແກ່ການຫັນໂຄງປະກອບເສດຖະກິດ ການພັດທະນາໄປຕາມທິດຂະຫຍາຍຕົວດ້ວຍຈັງຫວະເຕີບໂຕທີ່ໝັ້ນທ່ຽງ, ສົມດຸນ, ນໍາພາແຂວງໃຫ້ໄປຕາມທິດທາງຂອງການພັດທະນາແບບຍືນຍົງ (SDGs) ເຂົ້າໃນການພັດທະນາຂະແໜງການຕ່າງໆ, ຮັບປະກັນໃຫ້ສະພາບພາຍໃນແຂວງສືບຕໍ່ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ, ເປັນລະບຽບຮຽບຮ້ອຍໂດຍພື້ນຖານ, ການພັດທະນາ, ການດໍາເນີນທຸລະກິດ ແລະ ການລົງທຶນຂອງເອກະຊົນພາຍໃນ ແລະ ຕ່າງປະເທດ ໂດຍລວມໃຫ້ສືບຕໍ່ມີບັນຍາກາດທີ່ດີ.
ໃນປີ 2024 ນີ້ ແຂວງບໍລິຄໍາໄຊ ຈຶ່ງກໍານົດ ທິດທາງ ແຜນການພັດທະນາເສດຖະກິດ-ສັງຄົມ ຊຶ່ງກ່ອນອື່ນໝົດແມ່ນເຮັດວຽກງານປ້ອງກັນຊາດ-ປ້ອງກັນຄວາມສະຫງົບ ມີຄວາມເຂັ້ມແຂງຍິ່ງຂຶ້ນ ໂດຍສືບຕໍ່ສຸມໃສ່ ຈັດຕັ້ງປະຕິບັດ 4 ໜ້າທີ່ໃຫຍ່, 26 ແຜນງານ ແລະ 4 ແຜນງານໃຫຍ່ 41 ໂຄງການ ຂອງກະຊວງປ້ອງກັນປະເທດ ແລະ ກະຊວງປ້ອງກັນຄວາມສະຫງົບວາງອອກ, ຈັດຕັ້ງປະຕິບັດວາລະແຫ່ງຊາດ ກ່ຽວກັບການແກ້ໄຂບັນຫາຢາເສບຕິດໃຫ້ເຂົ້າສູ່ລວງເລິກ, ສືບຕໍ່ແກ້ໄຂບັນຫາ 4 ເຖື່ອນ ແລະ ຈັດຕັ້ງປະຕິບັດ 9 ຫົວຂໍ້ສໍາມະນາວິທະຍາສາດ ເພື່ອແກ້ໄຂບັນດາໜໍ່ແໜງທີ່ກໍ່ຄວາມບໍ່ສະຫງົບທາງດ້ານການເມືອງ ແລະ ປະກົດການຫຍໍ້ທໍ້ພາຍໃນແຂວງໃຫ້ຫຼຸດໜ້ອຍຖອຍລົງ, ພ້ອມທັງຮັບປະກັນໃຫ້ແຂວງມີຄວາມເປັນລະບຽບຮຽບຮ້ອຍ, ຄວາມສະຫງົບປອດໄພ ໃຫ້ໄດ້ 100% ໃນການກະກຽມໃຫ້ແກ່ການເປັນເຈົ້າພາບ ແລະ ການເປັນປະທານກອງປະຊຸມອາຊຽນ ສປປ ລາວ ປີ 2024.
ກ່ຽວກັບເສດຖະກິດແຂວງຄາດຄະເນອັດຕາການຂະຫຍາຍຕົວຕາມແຜນດັດແກ້ ລວມຍອດຜະລິດຕະພັນພາຍໃນ (GPP) ປີ 2024 ຢູ່ໃນລະດັບ 4,5% ຂຶ້ນໄປ, ຄິດເປັນມູນຄ່າ 9.392,14 ຕື້ກວ່າກີບ, ສະເລ່ຍຕໍ່ຫົວຄົນ ປະມານ 27.036.308 ກີບ ໃນນັ້ນ: ຂະແໜງກະສິກໍາ ຂະຫຍາຍຕົວ 2,5% ກວມເອົາ 28,08% ຂອງ GPP; ຂະແໜງອຸດສາຫະກໍາ ຂະຫຍາຍຕົວ 3,8% ກວມເອົາ 44,69% ຂອງ GPP ແລະ ຂະແໜງບໍລິການຂະຫຍາຍຕົວ 7,3% ກວມເອົາ 27,22% ຂອງ GPP.ຄາດໝາຍດ້ານລາຍຮັບ ລວມທັງໝົດ 1.419,26 ຕື້ກີບ,ຮັບພູດສູນກາງ: 729,00 ຕື້ກີບ, ລາຍຮັບພູດທ້ອງຖິ່ນ 690,26 ຕື້ກີບ,ແຜນລາຍຈ່າຍ 424,72 ຕື້ກີບ ແລະ ແຜນດຸນດ່ຽງງົບປະມານ (ລາຍຮັບ-ລາຍຈ່າຍ)ໃຫ້ສູນກາງ 265,54 ຕື້ກີບ.
ສືບຕໍ່ຈັດຕັ້ງຜັນຂະຫຍາຍມະຕິຕົກລົງຂອງກົມການເມືອງສູນກາງພັກສະບັບເລກທີ 19/ກມສພ ແລະ ມະຕິຕົກລົງຂອງ ຄະນະປະຈໍາພັກແຂວງ ສະບັບເລກທີ 390/ຄປພ.ຂບຊ ວ່າດ້ວຍການແຕ່ງຕັ້ງຄະນະສະເພາະກິດ ຮັບຜິດຊອບແກ້ໄຂບັນຫາເຄັ່ງຮ້ອນ ຂອງເສດຖະກິດ-ການເງິນ, ບັນຫາເງິນເຟີ້, ອັດຕາແລກປ່ຽນ ແລະ ຄາລາສິນຄ້າພາຍໃນແຂວງ.
ຕໍ່ກັບການຜະລິດເຂົ້ານາປີ 2024 ແຜນການ 37.301 ຮຕ ຜະລິດຕະພາບ 3,95 ຕ/ຮຕ, ຜົນຜະລິດ 147.372 ໂຕນ; ນາແຊງ 1.964 ຮຕ, ຜະລິດຕະພາບ 4,92 ຕ/ຮຕ, ຜົນຜະລິດ 9.660 ໂຕນ; ເຂົ້າໄຮ່ 1.410 ຮຕ ຜະລິດຕະພາບ 1,65 ຕ/ຮຕ ຜົນຜະລິດ 2.333 ໂຕນ; ການຜະລິດເຂົ້າເປັນສິນຄ້າ ແຜນການ 13.088 ຮຕ, ຜົນຜະລິດ 52.344 ໂຕ, ມູນຄ່າ 345,47 ຕື້ກີບ, ການຜະລິດພືດເປັນສິນຄ້າ ແຜນການ 22.962 ຮຕ, ຜົນຜະລິດ 296.997 ໂຕນ, ມູນຄ່າ 1.002,10 ຕື້ກີບ.
ຄາດຄະເນຕົວເລກຂາຍຍົກ 1.063,16 ຕື້ກີບ, ຂາຍຍ່ອຍ 1.161,51 ຕື້ກີບ, ມູນຄ່າເກັບຊື້ຜະລິດຕະພັນພາຍໃນແຂວງໃຫ້ໄດ້ 441,40 ຕື້ກີບ.ຂຶ້ນທະບຽນອອກໃບຕາດິນໃຫ້ໄດ້ 20.056 ຕອນ.ຈັດຕັ້ງປະຕິບັດໂຄງການປັບປຸງ ແລະ ຂະຫຍາຍທາງ 13 ໃຕ້ 2 ສັນຍາ ທີ່ຍັງບໍ່ທັນສໍາເລັດ ແລະ ແກ້ໄຂການສັນຈອນ, ສຸມໃສ່ຊີ້ນໍາ ຕິດຕາມການຈັດຕັ້ງປະຕິບັດໂຄງການກໍ່ສ້າງທາງ ເທດສະບານປາກຊັນ 2 ສັນຍາ ທາງເບີ 5-6, ສືບຕໍ່ຕິດຕາມໂຄງການກໍ່ສ້າງຂົວຂ້າມນໍ້າຂອງແຫ່ງທີ 5 ປາກຊັນ-ບຶງການ; ສືບຕໍ່ໂຄງການພັດທະນາຕົວເມືອງຕາມແລວເສດຖະກິດເຂດອະນຸພາກພື້ນ ລຸ່ມແມ່ນໍ້າຂອງໂຄງການ GMS4 ທີ່ຍັງບໍ່ທັນສໍາເລັດ 2 ໂຄງການ.ປັບປຸງນິຕິກໍາ 2 ສະບັບ ທີ່ຈະສະເໜີສະພາປະຊາຊົນແຂວງ ພິຈາລະນາຮັບຮອງ ຄື: ຮ່າງຂໍ້ຕົກລົງ ວ່າດ້ວຍເຂດສະຫງວນທີ່ດິນແຄມນໍ້າ ທົ່ວແຂວງ, ຂໍ້ຕົກລົງ ວ່າດ້ວຍການຄຸ້ມຄອງ,ນະໂຍບາຍ ແລະ ຫົວໜ່ວຍທົດແທນ ເຂດພັດທະນາ ອ່າງຫ້ວຍສຽດ.
ສໍາລັບທິດທາງແຜນການໃນຂົງເຂດວັດທະນະທໍາ-ສັງຄົມແມ່ນສູ້ຊົນປະຕິບັດເປົ້າໝາຍດ້ານການພັດທະນາແບບຍືນຍົງ (SDGs) ຕາມຄາດໝາຍທີ່ວາງໄວ້ ໂດຍສຸມໃສ່ 15 ຄາດໝາຍຫຼັກ ຂອງວຽກງານສຶກສາ ແລະ 11 ຕົວຊີ້ບອກ ຂອງວຽກງານສາທາລະສຸກ. ຊຸກຍູ້ຂະບວນການສິລະປະ-ວັນນະຄະດີ ແລະ ໂຄງການກໍ່ສ້າງຫໍຫຼັກເມືອງຂອງແຂວງ ເພື່ອກະກຽມສະເຫຼີມສະຫຼອງວັນສ້າງຕັ້ງແຂວງ ຄົບຮອບ 40 ປີ ໃຫ້ທັນຕາມກໍານົດເວລາ.ສືບຕໍ່ເກັບກໍາຂໍ້ມູນຜູ້ໄດ້ຮັບການຝຶກວິຊາຊີບ ແລະ ພັດທະນາສີມືແຮງງານ ໃຫ້ໄດ້ 250 ຄົນ ແລະ ຂຶ້ນທະບຽນຜູ້ຕ້ອງການມີວຽກເຮັດງານທໍາໃຫ້ໄດ້ 250 ຄົນ. (ໂດຍ: ຕະວິນຍານ)
ຄໍາເຫັນ