ແຕ່ນີ້ຫາປີ 2025 ຮອດກອງປະຊຸມທ້າຍສະໄໝ ບໍລິຄໍາໄຊຈະສືບຕໍ່ຈັດຕັ້ງປະຕິບັດວຽກງານ 3 ສ້າງໃຫ້ມີປະສິດທິຜົນ ເພື່ອສ້າງເປັນບາດລ້ຽວໃໝ່ໃນການແບ່ງຂັ້ນຄຸ້ມຄອງ.
ທ່ານ ກອງແກ້ວ ໄຊສົງຄາມ ເຈົ້າແຂວງບໍລິຄໍາໄຊ ກ່າວວ່າ: ການປະເມີນການສ້າງແຂວງເປັນຫົວໜ່ວຍຍຸດທະສາດ 7 ດ້ານ ແຕ່ປີ 2020-2022 ແຂວງບໍລິຄໍາໄຊ ສາມາດບັນລຸໄດ້ 6 ດ້ານ (ຄື: ດ້ານທີ 1,2,3,4,5,6) ແລະ ບໍ່ບັນລຸ 1 ດ້ານ (ຄື: ດ້ານທີ 7 ວຽກງານປ້ອງກັນຊາດ (ປກຊ) - ປ້ອງກັນຄວາມສະຫງົບ (ປກສ), ສະເລ່ຍ 7 ດ້ານທົ່ວແຂວງບັນລຸ 59 ຕົວຊີ້ບອກ ເທົ່າກັບ 89,39%, ບໍ່ບັນລຸ 7 ຕົວຊີ້ບອກ ເທົ່າກັບ 10,60%. ສໍາລັບການປະເມີນເມືອງເປັນຫົວໜ່ວຍເຂັ້ມແຂງຮອບດ້ານຕາມ 5 ດ້ານ: ເມືອງທີ່ບັນລຸ 5 ດ້ານ ຍັງບໍ່ທັນມີເມືອງໃດບັນລຸ, ເມືອງບັນລຸ 4 ດ້ານ, ມີ 2 ເມືອງຄື: (ເມືອງທ່າພະບາດ ແລະ ບໍລິຄັນ); ເມືອງບັນລຸ 3 ດ້ານ, ມີ 4 ເມືອງຄື: (ເມືອງປາກຊັນ, ເມືອງປາກກະດິງ, ເມືອງຄໍາເກີດ ແລະ ເມືອງວຽງທອງ); ເມືອງບໍ່ບັນລຸຈັກດ້ານມີ 1 ເມືອງຄື: (ເມືອງໄຊຈໍາພອນ); ການປະເມີນບ້ານເປັນຫົວໜ່ວຍພັດທະນາ 4 ດ້ານຄື: ທົ່ວແຂວງມີ 284 ບ້ານ, ບ້ານບັນລຸ 4 ດ້ານມີ 228 ບ້ານກວມ 80,28% ທຽບໃສ່ປີ 2020 ເພີ່ມຂຶ້ນ 52 ບ້ານ ເທົ່າກັບ 18,30%;
ທ່ານ ກອງແກ້ວ ໄຊສົງຄາມ ກ່າວເນັ້ນຕື່ມອີກວ່າ: ເພື່ອສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ; ແຂວງບໍລິຄໍາໄຊ ຈະເອົາໃຈໃສ່ນໍາພາຊີ້ນໍາຢ່າງໃກ້ຊິດ ໂດຍສະເພາະໄດ້ຜັນຂະຫຍາຍຄໍາແນະນໍາ ເລກທີ 05/ພນ ມາເປັນຄໍາແນະນໍາ ເລກທີ 03/ຂບຊ; ຈັດຕັ້ງຝຶກອົບຮົມວິທີ ແລະ ຂັ້ນຕອນການປະເມີນຕາມແບບຟອມໃໝ່ ໃຫ້ບັນດາພະແນກການ, ອົງການ ແລະ ຂັ້ນເມືອງສໍາເລັດ, ແຕ່ງຕັ້ງຄະນະຮັບຜິດຊອບການປະເມີນ ແລະ ກອງເລຂາ 3 ສ້າງ ຊ່ວຍວຽກແຕ່ລະຂັ້ນ, ມີບົດບາດເປັນເສນາທິການໃນການສະຫຼຸບສັງລວມວຽກງານ 3 ສ້າງໃຫ້ແກ່ການນໍາ, ໄດ້ຈັດຕັ້ງເຜີຍແຜ່ເຊື່ອມຊຶມນິຕິກຳກ່ຽວກັບວຽກງານ 3 ສ້າງ, ລົງຊຸກຍູ້ ແລະ ຕິດຕາມວິທີການປະເມີນການສ້າງເມືອງເປັນຫົວໜ່ວຍເຂັ້ມແຂງຮອບດ້ານຕາມ 5 ດ້ານ ແລະ ສ້າງບ້ານເປັນຫົວໜ່ວຍພັດທະນາຕາມ 4 ດ້ານ ແລະ ຊຸກຍູ້ບັນດາພະແນກການຂອງແຂວງໃນການແບ່ງຂັ້ນຄຸ້ມຄອງ, ມອບສິດ, ມອບວຽກໃຫ້ເມືອງຫຼາຍຂຶ້ນ; ແຂວງ, ເມືອງ ແລະ ບ້ານຈະໄດ້ເອົາໃຈໃສ່ປັບປຸງ ແລະ ຂະ ຫຍາຍພື້ນຖານໂຄງລ່າງຮັບໃຊ້ການຜະລິດ ແລະ ຊີວິດການເປັນຢູ່ຂອງປະຊາຊົນເຊັ່ນ: ຖະໜົນຫົນທາງ, ໄຟຟ້າ, ນໍ້າສະອາດ, ຊົນລະປະທານຮັບໃຊ້ການຜະລິດ, ສູນບໍລິການເຕັກນິກກະສິກໍາ (ບາງຈຸດ), ໂຮງຮຽນ, ສຸກສາລາ ແລະ ສະຖານບໍລິການອື່ນໆທີ່ຈໍາເປັນ.
ແຂວງຈະສືບຕໍ່ຕັ້ງໜ້າແກ້ໄຂຄວາມທຸກຍາກຂອງປະຊາຊົນ ເຂດຊົນນະບົດ ແລະ ຫ່າງໄກສອກຫຼີກດ້ວຍມາດຕະການສົ່ງເສີມການຜະລິດກະສິກຳ ແລະ ອື່ນໆ. ສູ້ຊົນແກ້ໄຂຄວາມທຸກຍາກຂອງປະຊາຊົນ ເຂດຊົນນະບົດ ແລະ ຫ່າງໄກສອກຫຼີກຮອດປີ 2025 ແກ້ໄຂຄອບຄົວທຸກຍາກໃຫ້ເຫຼືອ 1,26%; ແກ້ໄຂບ້ານທຸກຍາກໃຫ້ເຫຼືອ 5,98% ສ້າງຄອບຄົວພັດທະນາໃຫ້ໄດ້ 3.823 ຄອບຄົວ ເທົ່າກັບ 92,99%, ສ້າງບ້ານພັດທະນາໃຫ້ໄດ້ 31 ບ້ານ ເທົ່າກັບ 86,97% ຂອງຈໍານວນບ້ານທັງໝົດ. ສ້າງຊົນນະບົດໃໝ່ ແລະ ບ້ານໃຫຍ່ກາຍເປັນສີສັນຕົວເມືອງນ້ອຍເຊັ່ນ: ເຂດທົ່ງແສນ, ໜອງກອກ, ຈອມທອງ, ບ້ານບໍ່, ປະກາດເປັນເມືອງພົ້ນທຸກໃຫ້ໄດ້ 2 ເມືອງຄື: ວຽງທອງ ແລະ ໄຊຈຳພອນ. ສູ້ຊົນປະກາດເປັນເມືອງພັດທະນາໃຫ້ໄດ້ 2 ເມືອງຄື: ປາກຊັນ ແລະ ທ່າພະບາດ. ເສີມຂະຫຍາຍມູນເຊື້ອວັດທະນະທໍາບັນດາເຜົ່າທີ່ເປັນວັດຖຸ ແລະ ບໍ່ເປັນວັດຖຸໃຫ້ຍືນຍົງ, ສ້າງບ້ານຕົວແບບຕິດພັນກັັບການທ່ອງທ່ຽວໃຫ້ໄດ້ 7 ບ້ານ, ສ້າງບ້ານວັດທະນຳທຳໃຫ້ໄດ້ຕື່ມ 19 ບ້ານ, ຄອບຄົວວັດທະນະທຳໃຫ້ໄດ້ຕື່ມ 6.643 ຄອບຄົວ, ປົກປັກຮັກສາເອກະລັກວັດທະນະທໍາ, ສະຖານ-ວັດຖຸບູຮານ ແລະ ປັບປຸງຊີວິດ, ວັດທະນະທໍາບັນດາເຜົ່າ ຄຽງຄູ່ການພັດທະນາເສດຖະກິດ ແລະ ຫັນໄປສູ່ວິຖີຊີວິດທີ່ກ້າວໜ້າ.
ຂ່າວ: ວັນໄຊ ຕະວິນຍານ
ຄໍາເຫັນ