 |
ສະຫາຍ ກິແກ້ວ ໄຂຄໍາພິທູນ ໄດ້ຫວນຄືນວັນສ້າງຕັ້ງແນວລາວສ້າງຊາດ ຄົບຮອບ 76 ປີ, ການກໍາເນີດ ແລະ ການເຕີບໃຫຍ່ຂະຫຍາຍຕົວຂອງແນວລາວສ້າງຊາດແຕ່ອາດີດຈົນເຖິງປັດຈຸບັນ, ຜົນງານພົ້ນເດັ່ນຂອງແນວລາວສ້າງຊາດ ແລະ ມູນເຊື້ອອັນສະຫງ່າງາມ ຂອງແນວລາວສ້າງຊາດ ໃນແຕ່ລະໄລຍະຄື: ແນວລາວອິດສະຫຼະ (ປີ 1950 - ປີ 1956), ແນວລາວຮັກຊາດ (ປີ 1956 - ປີ 1979) ແລະ ແນວລາວສ້າງຊາດ (ປີ 1979 - ປັດຈຸບັນ). ສັງລວມແລ້ວ ແນວລາວອິດສະຫຼະເປັນຄັນທຸງເຕົ້າໂຮມຂະບວນການຕໍ່ສູ້ຂອງປະຊາຊົນບັນດາເຜົ່າ, ຜູ້ຊົງຄຸນວຸດທິ, ນັກຮັກຊາດ, ຮັກເອກະລາດ ແລະ ອິດສະຫຼະພາບ; ແນວລາວຮັກຊາດເປັນຄັນທຸງ, ເປັນແກນກາງຂອງແນວໂຮມເອກກະພາບແຫ່ງຊາດ, ເຕົ້າໂຮມຂະບວນການຕໍ່ສູ້ກູ້ຊາດຂອງປະຊາຊົນ ແລະ ກໍາລັງທີ່ຮັກຊາດຕ່າງໆ, ຕໍ່ສູ້ເພື່ອປົກປັກຮັກສາເອກະລາດຂອງຊາດ 12 ຕຸລາ 1945, ເຕົ້າໂຮມກໍາລັງຮັກຄວາມເປັນທຳ ແລະ ຄວາມກ້າວໜ້າຂອງສັງຄົມ ແລະ ສັນຕິພາບ, ເອກະລາດ, ປະຊາທິປະໄຕ, ເອກະ ພາບ, ວັດທະນາຖາວອນ; ແນວລາວສ້າງຊາດ ຍັງສືບຕໍ່ດໍາລົງບົດບາດເປັນຫຼັກແຫຼ່ງແນວໂຮມໂດຍພາຍໃຕ້ການນໍາພາຂອງພັກ ຊຶ່ງແນວລາວໃນໄລຍະໃໝ່ແມ່ນການສ້າງມະຫາສາມັກຄີຂອງປວງຊົນລາວທັງຊາດ ແລະ ການເຕົ້າໂຮມກຳລັງແຮງພັດທະນາປະເທດຊາດ, ເປັນບ່ອນສຶກສາອົບຮົມປະຊາຊົນຊັ້ນຄົນຕ່າງໆ, ພີ່ນ້ອງຄົນລາວຢູ່ຕ່າງປະເທດ ແລະ ອົງການຈັດຕັ້ງສັງຄົມ ເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຕາມແນວທາງນະໂຍບາຍຂອງພັກ.
 |
ການຈັດພິທີປາຖະກະຖາໃນຄັ້ງນີ້, ເພື່ອໃຫ້ຄະນະພັກ-ຄະນະນໍາ ພະນັກງານ-ລັດຖະກອນທົ່ວ ສນຊ ໄດ້ກໍາແໜ້ນ, ຮັບຮູ້-ເຂົ້າໃຈເນື້ອໃນ ຢ່າງເລິກເຊິ່ງ ເພື່ອນໍາໄປຈັດຕັ້ງປະຕິບັດເຂົ້າໃນວຽກງານທີ່ຕົນຮັບຜິດຊອບ.
ພິທີໃນຄັ້ງນີ້, ສະຫາຍ ນັນທະພົນ ລີວັດທະນາ ຮອງຫົວໜ້າກົມຄຸ້ມຄອງພະນັກງານ ຄະນະຈັດຕັ້ງສູນກາງພັກ ໄດ້ຂຶ້ນຜ່ານມະຕິຕົກລົງ ຂອງຄະນະເລຂາທິການສູນກາງພັກ ວ່າດ້ວຍການອະນຸມັດໃຫ້ພະນັກງານການນໍາອອກພັກການ-ຮັບອູດໜູນບໍານານ ໂດຍເຫັນດີໃຫ້ ສະຫາຍ ນາງສີພະຈັນ ນັນທະວົງສາ ກໍາມະການປະຈໍາພັກ ຮອງປະທານ ສນຊ ອອກພັກການ-ຮັບອູດໜູນບໍານານ; ຜ່ານມະຕິຕົກລົງວ່າດ້ວຍການແຕ່ງຕັ້ງ ຫົວໜ້າກົມຈັດຕັ້ງ ສນຊ ໂດຍເຫັນດີແຕ່ງຕັ້ງ ສະຫາຍ ຄໍາຢາດ ຣາຊດາວົງ ເປັນຫົວໜ້າກົມຈັດຕັ້ງ ສນຊ; ຜ່ານມະຕິຕົງລົງວ່າດ້ວຍການແຕ່ງຕັ້ງ ຫົວໜ້າຫ້ອງການ ສນຊ ໂດຍເຫັນດີແຕ່ງຕັ້ງ ສະຫາຍ ວັນດີ ຈັນສົມບັດ ເປັນຫົວໜ້າຫ້ອງການ ສນຊ. ພ້ອມນັ້ນ, ຍັງຜ່ານຂໍ້ຕົກລົງວ່າດ້ວຍການແຕ່ງຕັ້ງພະນັກງານຂັ້ນຫົວໜ້າພະແນກ ຈໍານວນ 6 ສະຫາຍ; ຜ່ານມະຕິຕົກລົງວ່າດ້ວຍການແຕ່ງຕັ້ງຮັກສາການຫົວໜ້າກົມຊັ້ນຄົນ ແລະ ການຈັດຕັ້ງສັງຄົມ ສນຊ ຕື່ມອີກ.
 |
ໂອກາດນີ້, ສະຫາຍ ກິແກ້ວ ໄຂຄໍາພິທູນ ໄດ້ໃຫ້ກຽດໂອ້ລົມ ໂດຍສະເພາະຕໍ່ສະຫາຍ ນາງ ສີພະຈັນ ນັນທະວົງສາ ທີ່ໄດ້ຮັບອຸດໜູນບຳນານ ແມ່ນສະຫາຍໄດ້ສຳເລັດໜ້າທີ່ຕະຫຼອດໄລຍະທີ່ຜ່ານມາ ຂໍຕີລາຄາສູງ ຕໍ່ການເຄື່ອນໄຫວວຽກງານ ຂອງສະຫາຍໄດ້ມີຜົນງານພົ້ນເດັ່ນຫຼາຍດ້ານ ທັງການຈັດຕັ້ງປະຕິບັດວຽກງານໂດຍໄດ້ຮ່ວມກັບໝູ່ຄະນະປັບປູງ, ຊຸກຍູ້ ແລະ ທັງເຮັດວຽກງານນຳພາ-ຊີ້ນຳວຽກ, ສ້າງຄວາມສາມັກຄີພາຍໃນ ທັງສ້າງໄດ້ພື້ນຄວາມໃກ້ຊິດຕິດແທດ ແລະ ຟັງຄຳຄິດຄຳເຫັນຂອງມະຫາຊົນ ທັງຕິດຕາມກວດກາຢູ່ ສນຊ ກໍຄືແນວລາວສ້າງຊາດ ຂັ້ນຕ່າງໆໃນທົ່ວປະເທດ. ສຳລັບບັນດາສະຫາຍ ທີ່ໄດ້ຮັບການແຕ່ງຕັ້ງ ແລະ ຮັບໜ້າທີ່ໃໝ່ ກໍໃຫ້ບັນກົມກອງກ່ຽວຂ້ອງເອົາໃຈໃສ່ອູ້ມຊູຊ່ວຍເຫຼືອ ແລະ ອຳນວຍຄວາມສະດວກ ໃຫ້ບັນດາສະຫາຍເຫຼົ່ານີ້ສາມາດເຄື່ອນໄຫວວຽກງານໄດ້ສະດວກວ່ອງໄວ, ສາມາດເຮັດພາລະບົດບາດໜ້າທີ່ຂອງຕົນຢ່າງມີສະສິດທິພາບປະສິດທິຜົນ.
(ຂ່າວ-ພາບ: ວັນເພັງ)
ຄໍາເຫັນ