 |
ດ້ານການອອກອາກາດ ວສລ ຮັບຜິດຊອບ 5 ຄື້ນ, ຜະລິດລາຍການເອງ 107 ລາຍການ, ຄູ່ຮ່ວມງານ 23 ລາຍການ, ລວມອອກອາກາດ 50 ຊົ່ວໂມງ/ມື້. ພວກເຮົາໄດ້ຫັນປ່ຽນຮູບແບບໃຫ້ມີພາບຫຼາຍຂຶ້ນ, ຜະລິດຄລິບສັ້ນ ແລະ ໄລ້ສົດຜ່ານ Facebook Page ຂອງ ວສລ ຊຶ່ງມີຜູ້ຕິດຕາມຫຼາຍກວ່າ 177,000 ຄົນ ຊຶ່ງລາຍການທີ່ນິຍົມຫຼາຍມີ: ລາຍການພາກຂ່າວທົ່ວໄປ, ຂ່າວຮອບບ້ານຜ່ານເມືອງ, ຂ່າວຕາມເຫດການມີພາບ ແລະ ໂດຍສະເພາະ “ລາຍການຂັບຂີ່ປອດໄພ” ທີ່ຊ່ວຍໃຫ້ຂໍ້ມູນການສັນຈອນ ແລະ ຫຼຸດຜ່ອນອຸບັດເຫດ ເວົ້າລວມແລ້ວ ວສລ ຍັງແມ່ນພາຫະນະສື່ມວນຊົນທີ່ໃຫ້ຂໍ້ມູນວ່ອງໄວ ທັນເຫດການ ແລະ ກວມເອົາພື້ນທີ່ສ່ວນໃຫຍ່ຂອງປະເທດ.
ເພື່ອປັບປຸງພັດທະນາວຽກງານການກະຈາຍສຽງໃຫ້ຍືນຍົງ ວສລ ຈຳເປັນຕ້ອງປັບປຸງປ່ຽນແປງຕາມຄຳຂວັນທີ່ວ່າ: “ສ້າງບຸກຄະລາກອນ ໃໝ່ຫັນສູ່ເຕັກນິກທັນສະໄໝ, ເນື້ອໃນແຫຼມຄົມວ່ອງໄວ, ປັບປຸງກົນໄກບໍລິການຂະຫຍາຍການຮ່ວມມື” ໂດຍສຸມໃສ່ທິດທາງຄື: ສູ້ຊົນຫັນປ່ຽນວັດຖຸອຸປະກອນເຕັກນິກວິທະຍຸໃຫ້ມີຄຸນນະພາບສູງເປັນລະບົບຄົບຊຸດ ເພື່ອເຊື່ອມໂຍງກັບສາກົນ, ຫັນຈາກລະບົບອານາລັອກ ໄປສູ່ລະບົບດີຈີຕອນ ຢ່າງສົມບູນ ເພື່ອກະຈາຍສຽງໃຫ້ກວມພື້ນທີ່ 95% ຂອງປະເທດ ແລະ ສູ້ຊົນໃຫ້ໄດ້ 100% ໃນປີ 2030, ຍົກສູງຄຸນນະພາບເນື້ອໃນ ຮອດປີ 2030 ປັບປຸງເນື້ອໃນຂ່າວ ແລະ ລາຍການໃຫ້ແຫຼມຄົມ, ວ່ອງໄວ, ມີຫຼາຍຮູບແບບ (ລວມທັງວິທະຍຸມີພາບ) ເພື່ອດຶງດູດຜູ້ຟັງ-ຜູ້ຊົມ ແລະ ເປັນແຫຼ່ງຕອບໂຕ້ຖ້ອຍທຳນອງບິດເບືອນໃສ່ຮ້າຍປ້າຍສີຢ່າງມີປະສິດທິພາບ, ປັບປຸງລະບົບອຸປະກອນດ້ານສຽງ ເຂົ້າສູ່ລະບົບດີຈີຕອນຢ່າງສົມບູນແບບ ໃນປັດຈຸບັນ. ສະນັ້ນ, ຮຽກຮ້ອງໃຫ້ສື່ມວນຊົນແຕ່ລະອົງການມີຄວາມໜັກແໜ້ນເຂັ້ມແຂງ ກ້າວເຂົ້າສູ່ຄຸນນະພາບໃໝ່ ວ່ອງໄວ ທັນສະໄໝ ແລະ ໜ້າເຊື່ອຖືນໍາໃຊ້ເຕັກໂນໂລຊີ ແລະ ປັນຍາປະດິດ (AI) ເຂົ້າໃນການຜະລິດຂ່າວ ແລະ ວິເຄາະຂໍ້ມູນ, ພັດທະນາເນື້ອຫາໃຫ້ມີຄວາມສ້າງສັນ ແລະ ເຂົ້າເຖິງຄົນລຸ້ນໃໝ່, ຜ່ານວີດີໂອສັ້ນ, ສາລະຄະດີພອດແຄສ (Podcast) ຫຼື ການນຳສະເໜີແບບດີຈີຕອນ. ຄຽງຄູ່ກັນນັ້ນ, ຕ້ອງພັດທະນາບຸກຄະລາກອນນັກຂ່າວຮຸ່ນໃໝ່ໃຫ້ມີທັກສະຮອບດ້ານ ທັງດ້ານວິຊາຊີບ, ເຕັກໂນໂລຊີ, ພາສາຕ່າງປະເທດ ແລະ ຈັນຍາບັນວິຊາຊີບ.
 |
ໃນໂອກາດວັນທີ່ມີຄວາມໝາຍສໍາຄັນນີ້, ທ່ານ ນາງ ສິມມະນີ ແກ້ວແກ່ນ ໄດ້ສະແດງຄວາມກະຕັນຍູຮູ້ບຸນຄຸນຢ່າງເລິກເຊິ່ງຕໍ່ ພັກ-ລັດ ທີ່ໄດ້ເອົາໃຈໃສ່ນຳພາ-ຊີ້ນຳຮອບດ້ານ ພ້ອມທັງຂອບໃຈເພື່ອນຮ່ວມງານທຸກພາກສ່ວນ ແລະ ຜູ້ຟັງ-ຜູ້ຊົມ ທຸກທ່ານທີ່ໄດ້ສະໜັບສະໜູນ ວສລ ຕະຫຼອດມາ. ທ່ານ ຍັງໄດ້ຢັ້ງຢືນວ່າ ວສລ ຈະສືບຕໍ່ສຸມໃສ່ພັດທະນາຕົນເອງຢ່າງຮອບດ້ານ ເພື່ອໃຫ້ກາຍເປັນສື່ທີ່ທັນສະໄໝ, ສະໜອງຂໍ້ມູນຂ່າວສານວ່ອງໄວ ແລະ ເປັນປະໂຫຍດແກ່ສັງຄົມ. ຜູ້ອຳນວຍການໃຫຍ່ ວສລ ຍັງໄດ້ຖືໂອກາດນີ້ ອວຍພອນໄຊອັນປະເສີດແກ່ການນຳພັກ-ລັດ, ເພື່ອນຮ່ວມງານ, ບໍລິສັດ, ຫ້າງຮ້ານ ແລະ ຜູ້ຟັງ-ຜູ້ຊົມທຸກທ່ານ ຈົ່ງມີສຸຂະພາບເຂັ້ມແຂງ, ມີຄວາມສຸກ ແລະ ປະສົບຜົນສຳເລັດໃນໜ້າທີ່ວຽກງານ ແລະ ຊີວິດຄອບຄົວທຸກປະການ.
ຄໍາເຫັນ