ພິທີເປີດໂຄງການໄດ້ຈັດຂຶ້ນພາຍຫຼັງ ກອງປະຊຸມຄະນະຊີ້ນໍາໂຄງການ (PSC) ຄັ້ງປະຖົມມະລືກ ຊຶ່ງເຂົ້າຮ່ວມໂດຍຄະນະຊີ້ນຳຈາກກະຊວງອຸດສາຫະກຳ ແລະ ການຄ້າ, ກະຊວງການເງິນ, ກະຊວງກະສິກຳ ແລະ ສິ່ງແວດລ້ອມ, ທະນາຄານແຫ່ງ ສປປ ລາວ ພະແນກໂຍທາທິການ ແລະ ຂົນສົ່ງ ແຂວງຜົ້ງສາລີ, ພະແນກກະສິກຳແຂວງຈຳປາສັກ, ພະແນກອຸດສາຫະກໍາ ແລະ ການຄ້າ 6 ແຂວງເປົ້າໝາຍ, ຕົວແທນຈາກ ທະນາຄານ ADB ແລະ ຄູ່ຮ່ວມງານ.
ໂຄງການ SASSP ມີງົບປະມານ 63 ລ້ານໂດລາ, ໂດຍການສະໜອງທຶນໃນຮູບແບບເງິນກູ້ ແລະ ຊ່ວຍເຫຼືອ ຈາກທະນາຄານພັດທະນາອາຊີ 30 ລ້ານໂດລາ, ກອງທຶນ (AIF) ASEAN Infrastructure Fund 10 ລ້ານໂດລາ, ກອງທຶນ ACGF (ASEAN Catalytic Green Finance Facility 10 ລ້ານໂດລາ, ກອງທຶນພັດທະນາອາຊີ Asian Development Fund 5 ລ້ານໂດລາ ແລະ ກອງທຶນ Green Climate Fund through the Community Resilience Partnership Program 8 ລ້ານໂດລາ. ໂຄງການໄດ້ຮັບອະນຸມັດຢ່າງເປັນທາງການໃນວັນທີ 10 ກັນຍາ 2025 ແລະ ມີກຳນົດການຈັດຕັ້ງປະຕິບັດຈົນຮອດວັນທີ 31 ທັນວາ 2030.
ເປົ້າໝາຍສຳຄັນຂອງໂຄງການ ແມ່ນການເພີ່ມໂອກາດເຂົ້າເຖິງແຫຼ່ງທຶນ, ພັດທະນາວິສາຫະກິດກະສິກຳ, ເສີມສ້າງຄວາມໝັ້ນຄົງດ້ານອາຫານ-ໂພຊະນາການ ແລະ ຍົກລະດັບສິນຄ້າກະສິກຳສູ່ຕະຫຼາດສົ່ງອອກ, ພ້ອມຮັບມືກັບຜົນກະທົບຈາກການປ່ຽນແປງດິນຟ້າອາກາດ ໂດຍມີ 4 ແຜນງານຫຼັກຄື:
ແຜນງານທີ 1: ການບໍລິການທາງດ້ານການເງິນ, ດ້ານວິຊາການ ແລະ ໂພຊະນາການ ສຳລັບຜູ້ປະກອບການດ້ານກະສິກຳ ຂະໜາດນ້ອຍ ໃຫ້ສາມາດເຂົ້າເຖິງເງິນກູ້ໄດ້ສູງເຖິງສຸດ 2,000 ໂດລາ ຜ່ານສະຖາບັນການເງິນທີ່ເຂົ້າຮ່ວມໂຄງການຂອງ ກອງທຶນສົ່ງເສີມການເຂົ້າເຖິງແຫຼ່ງທຶນໃນ ສປປ ລາວ. ນອກນັ້ນ, ກໍຍັງມີໜ້າວຽກທີ່ຕິດພັນກັບ ການພັດທະນາຄຸນນະພາບດ້ານໂພຊະນາການ ໂດຍມີການຮ່ວມມືກັບ ອົງການອາຫານໂລກໃນການຈັດຕັ້ງປະຕິບັດ ໃນ 105 ບ້ານ ໃນຂອບເຂດເປົ້າໝາຍໂຄງການ.
ແຜນງານທີ 2: ເສີມສ້າງລະບົບຕ່ອງໂສ້ມູນຄ່າສິນຄ້າກະສິກຳ ທີ່ມີທ່າແຮງສູງ 5 ຊະນິດຄື: ໄມ້ປ່ອງ, ກາເຟ, ຖົ່ວລຽນ, ມັນຕົ້ນ, ແລະ ຊາ. ພາຍໃຕ້ແຜນງານນີ້, ໂຄງການຈະສະໜອງບໍລິການໃຫ້ຄຳປຶກສາດ້ານວິຊາການຕົວຈິງ ກ່ຽວກັບ ການຜະລິດທີ່ທົນທານຕໍ່ການປ່ຽນແປງດິນຟ້າອາກາດ, ເສີມສ້າງຄວາມສາມາດຂອງຜູ້ປະກອບການໃຫ້ສາມາດຮັບການຮັບຮອງ ຄວາມປອດໄພຂອງອາຫານ (GAP, GMP, HACCP), ແລະ ການເຂົ້າເຖິງຕະຫຼາດສົ່ງອອກ. ວິສາຫະກິດຕ່ອງໂສ້ມູນຄ່າກະສິກຳ ຍັງສາມາດເຂົ້າເຖິງແຫຼ່ງທຶນມູນຄ່າສະເລ່ຍ 50,000 ໂດລາ ຜ່ານກອງທຶນສົ່ງເສີມ ຈນກ, ກະຊວງອຸດສາຫະກໍາ ແລະ ການຄ້າ ອີກດ້ວຍ.
ແຜນງານທີ 3: ພັດທະນາພື້ນຖານໂຄງລ່າງທີ່ຕິດພັນກັບການປ່ຽນແປງຂອງສະພາບດິນຟ້າອາກາດ, ວຽກງານກໍ່ສ້າງ ແລະ ການປັບປຸງ ຊົນລະປະທານຂະໜາດນ້ອຍ ແລະ ກໍ່ສ້າງເສັ້ນທາງເຊື່ອມຕໍ່ ໃນແຂວງເປົ້າໝາຍເຊັ່ນ: ຈໍາປາສັກ, ສາລະວັນ, ເຊກອງ, ຫົວພັນ, ຜົ້ງສາລີ, ແລະ ໄຊຍະບຸລີ. ການລົງທຶນ ໃນພື້ນຖານໂຄງລ່າງເຫຼົ່ານີ້ ລວມມີລະບົບ, ວິທີແກ້ໄຂທີ່ອີງໃສ່ທຳມະຊາດ, ຕ້ານທານກັບໄພພິບັດຫຼາຍຊະນິດ, ແລະ ລັກສະນະທີ່ມີສ່ວນຮ່ວມຈາກຊຸມຊົນທ້ອງຖິ່ນ, ຊຶ່ງຈະໄດ້ຈັດການຝຶກອົບຮົມໃນການຊີ້ນຳ, ການດຳເນີນງານ ແລະ ການບຳລຸງຮັກສາ.
ແຜນງານທີ 4: ຮັບຮອງຫ້ອງທົດລອງຄວາມປອດໄພ ດ້ານອາຫານ, ເພື່ອປັບປຸງຫ້ອງທົດລອງ ໃຫ້ມີຄວາມປອດໄພ ດ້ານອາຫານ ແລະ ມີອຸປະກອນທີ່ໄດ້ຮັບມາດຕະຖານ ISO-17025 ຊຶ່ງຈະຊ່ວຍສະໜັບສະໜູນ ການສ້າງຂີດຄວາມອາດສາມາດ ເຮັດໃຫ້ຫ້ອງທົດລອງຂອງລາວສາມາດອອກໃບຢັ້ງຢືນທີ່ໄດ້ຮັບການຍອມຮັບ ໃນລະດັບສາກົນ ສຳລັບການສົ່ງອອກ ສິນຄ້າກະສິກຳປຸງແຕ່ງ.
ອີກໜຶ່ງຈຸດເດັ່ນໃນພິທີ ແມ່ນການລົງນາມສັນຍາສະໜອງທຶນລວມມູນຄ່າ 150 ຕື້ກີບ ຫຼື ປະມານ 7 ລ້ານໂດລາ ລະຫວ່າງກອງທຶນສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ກັບກັບ ທະນາຄານການຄ້າຕ່າງປະເທດລາວ(ມູູນຄ່າ100 ຕື້ກີບ, ທຽບເທົ່າ 4.7 ລ້ານ ໂດລາ) ແລະ ທະນາຄານໄຊງ່ອນເທືອງຕິ່ນ ລາວ (ມູນຄ່າ 50 ຕື້ກີບ, ທຽບເທົ່າ 2.3 ລ້ານ ໂດລາ)
ທຶນດັ່ງກ່າວຈະເປັນອີກກົນໄກສຳຄັນໃນການຊ່ວຍໃຫ້ ວິສາຫະກິດ, ຜູ້ປະກອບການ ແລະ ຕ່ອງໂສ້ມູນຄ່າກະສິກຳ ສາມາດເຂົ້າເຖິງແຫຼ່ງທຶນ ແລະ ຂະຫຍາຍການຜະລິດ.
(ຂ່າວ: ເສດຖະກິດ ການຄ້າ)
ຄໍາເຫັນ