ບໍລິສັດ GDMS ຮ່ວມກັບ ກຕສ ສືບຕໍ່ຮ່ວມມືພັດທະນາ ແລະ ບໍລິການສູນຂໍ້ມູນດີຈີຕອນ

ຖືໄດ້ວ່າເປັນການບໍລິການຄລາວ (Cloud Service) ຄັ້ງທໍາອິດໃນ ສປປ ລາວ ແລະ ເປັນການສົ່ງເສີມໃຫ້ຜູ້ຊົມໃຊ້ຮັບຮູ້ ແລະ ເຂົ້າໃຈເຖິງຜົນປະໂຫຍດຂອງການນໍາໃຊ້ ຄອມພິວເຕີຄລາວ (Cloud Computing).ບໍລິສັດ ໂກໂບ້ດີຈີຕອນເມເນຈິເມັ້ນ ໂຊລູເຊິນ ຈຳກັດ(GDMS)ເປັນຜູ້ໃຫ້ບໍລິການຄລາວ (Cloud Service) ຜູ້ທໍາອິດໃນ ສປປ ລາວຊຶ່ງມາພ້ອມກັບປະສົບການອັນຍາວນານດ້ານການບໍລິການນີ້ ໄດ້ແກ່: ການໃຫ້ຝາກເວັບໄຊ (Web Hosting), ການໃຫ້ເຊົ່າລະບົບຄລາວຈໍາລອງ (VPS ແລະ VPC), ການໃຫ້ບໍລິການຮັບຝາກອຸປະກອນເຊີເວີ(Server Colocation),Kubernetes, ການສໍາຮອງຂໍ້ມູນ ແລະ ການກູ້ຄືນຄວາມເສຍຫາຍ (Backup and Disaster Recovery), ການສື່ສານແບບຄົບວົງຈອນ (UnifiedCommunications), CDN, Cybersecurity Solution ແລະ ການບໍລິການດ້ານອື່ນໆ. ນອກນັ້ນ, ທາງ GDMS ຍັງມີ ສູນຂໍ້ມູນດີຈີຕອນ Data Center ທີ່ ບ້ານດອນຕິ້ວເມືອງໄຊເສດຖານະຄອນຫຼວງວຽງຈັນ. ເພື່ອເປັນການຮັບປະກັນດ້ານຄວາມປອດໄພຂອງຂໍ້ມູນ ແລະ ສອດຄ່ອງກັບລະບຽບກົດໝາຍ ຂອງ ສປປລາວ, ພ້ອມທັງເປັນການຊຸກຍູ້ໃຫ້ເກີດມີການພັດທະນາໃນທ້ອງຖິ່ນ ໂດຍສະເພາະແມ່ນ e-Government, e-Commerce ແລະ e-Learning.
ທ່ານ Mathieu Ploton Chief Technical Officer ໃຫ້ສໍາພາດເມື່ອບໍ່ດົນມານີ້ວ່າ: GDMS ສ້າງຕັ້ງຂຶ້ນທີ່ ປະເທດສິງກະໂປ ໃນປີ 2019 ແລະ ມີຄວາມຊໍານານດ້ານການບໍລິການຄລາວແບບຄົບວົງຈອນ (Sovereign Cloud Solutions), ໂດຍແນໃສ່ຂົງເຂດ ພາກລັດ ແລະ ຂະແໜງການເງິນ. ພ້ອມນີ້,GDMS ຍັງໄດ້ເລັງເຫັນຄວາມສໍາຄັນຂອງການຮັກສາຂໍ້ມູນໄວ້ໃນທ້ອງຖິ່ນກໍຄືພາຍໃນປະເທດ. ສະນັ້ນ, ທາງບໍລິສັດຈຶ່ງມີການຮອງຮັບບັນດາບໍລິການດ້ານຄອມພິວເຕີຄລາວ (Cloud computing services) ໂດຍດໍາເນີນງານພາຍໃນຂອງປະເທດນັ້ນໆ. ປັດຈຸບັນ ທາງບໍລິສັດ ແມ່ນເປີດຫ້ອງການເພື່ອດໍາເນີນງານຢູ່ທີ່ ປະເທດມຽນມາ, ລາວ, ຫວຽດນາມ ແລະ ກົງໂກ. ສໍາລັບຜົນງານພົ້ນເດັ່ນທີ່ຜ່ານມາ ຂອງ GDMS ປະກອບມີ:
1.    ການເປີດໂຕລະບົບໂຄງລ່າງພື້ນຖານທີ່ທັນສະໄໝ ໃນ ສປປ ລາວ, ພາຍຫຼັງທີ່ມີການເຊັນລົງນາມ ວ່າດ້ວຍ ໂຄງການພັດທະນາ ແລະ ໃຫ້ບໍລິການສູນຂໍ້ມູນດີຈີຕອນ ການແກ້ໄຂເລື່ອງດີຈີຕອນ (Digital Solutions) ໂດຍການນໍາໃຊ້ສູນຂໍ້ມູນ LEED ທີ່ສ້າງຂຶ້ນພາຍໃຕ້ການຮ່ວມມືລະຫວ່າງ ລັດຖະບານແຫ່ງ ສປປ ລາວ ແລະ ລັດຖະບານ ຍີ່ປຸ່ນ.
2.    ສະໜອງການບໍລິການ ການກູ້ຄືນຄວາມເສຍຫາຍ (Disaster Recovery Service) ໃຫ້ແກ່ ລະບົບແຈ້ງພາສີປະຕູດຽວແຫ່ງຊາດ (Lao National Single Window- LNSW) ຊຶ່ງແມ່ນໜຶ່ງໃນໂຄງການອໍານວຍຄວາມສະດວກດ້ານການຄ້າ ຈັດຕັ້ງປະຕິບັດໂດຍ ສປປ ລາວ.
3.    ເປັນເຈົ້າການ ສໍາລັບບໍລິການຝາກຂໍ້ມູນຂອງໂຄງການຈົດທະບຽນ ແລະ ສະຖິຕິພົນລະເມືອງeCRVS(Civil Registration and Vital Statistics) ແລະ ລະບົບຂໍ້ມູນຂ່າວສານການຄຸ້ມຄອງການສຶກສາ ແລະ ກິລາLESMIS (Lao Education and Sports Management Information System) ໃນ ສປປ ລາວ.
4.    ສະໜັບສະໜູນ ລະບົບ Blockchain ແຫ່ງຊາດລາວ.
ໃນປັດຈຸບັນ,GDMS ກໍຍັງປະສົບກັບບາງບັນຫາ ແລະ ສິ່ງທ້າທາຍ ກ່ຽວກັບການບໍລິການຄລາວ (Public and Private Cloud Service) ໃນ ສປປ ລາວ, ເນື່ອງຈາກວ່າຜູ້ຊົມໃຊ້ຍັງຂາດຄວາມຮັບຮູ້ ແລະ ຄວາມເຂົ້າໃຈກ່ຽວກັບ ຜົນປະໂຫຍດຂອງການບໍລິການດ້ານຄອມພິວເຕີຄລາວ (Cloud computing services). ພ້ອມດຽວກັນນີ້, ດ້ານລາຄາທີ່ສູງ ແລະ ຄຸນນະພາບ ຂອງການເຊື່ອມຕໍ່ດ້ານອິນເຕີເນັດ ແມ່ນສົ່ງຜົນກະທົບຕໍ່ກັບ ປະສິດທິພາບ ແລະ ຄວາມໜ້າເຊື່ອຖື ຂອງການບໍລິການຄລາວ (Cloud Service) ໃນ ສປປ ລາວ. ອີກສິ່ງທ້າທາຍໜຶ່ງກໍຄື ດ້ານລະບຽບການ ແລະ ການປະຕິບັດກົດລະບຽບ ໄດ້ແກ່: ບັນຫາ ດ້ານຂໍ້ມູນ ແລະ ຄວາມເປັນສ່ວນຕົວ, ທັງນີ້ກໍເພື່ອໃຫ້ ສອດຄ່ອງກັບກົດໝາຍ ແລະ ມາດຕະຖານ ໃນທ້ອງຖິ່ນ.
ນອກຈາກທີ່ກ່າວມາຂ້າງເທິງນີ້,GDMS ຍັງໄດ້ໃຫ້ຄວາມຮູ້ ແລະ ຈັດການຝຶກອົບຮົມໃຫ້ແກ່ ພາກສ່ວນກ່ຽວຂ້ອງ ກ່ຽວກັບຂໍ້ດີ ແລະ ແນວທາງການປະຕິບັດ ກ່ຽວກັບການບໍລິການດ້ານຄອມພິວເຕີຄລາວ (Cloud computing services)ໂດຍການຮ່ວມມືກັບ ສູນອິນເຕີເນັດແຫ່ງຊາດ (Lao National Internet Exchange). GDMS ໄດ້ມີການຈັດຕັ້ງເຊື່ອມຕໍ່ໂດຍກົງກັບຜູ້ໃຫ້ບໍລິການດ້ານໂທລະຄົມມະນາຄົມຫຼັກ ໃນ ສປປ ລາວ, ເພື່ອເປັນການຫຼຸດຄວາມຊັກຊ້າ ແລະ ຕົ້ນທຶນການຮັບສົ່ງຂໍ້ມູນທາງອິນເຕີເນັດ; ທ່ານ Mathieu Plotonຍັງກ່າວຕື່ມວ່າ: ໃນຕໍ່ໜ້າ GDMS ແມ່ນຈະສຸມໃສ່ພັດທະນາ ສູນຂໍ້ມູນດີຈີຕອນ LEED ໃຫ້ດີຂຶ້ນ ແລະ ທຽບເທົ່າກັບສາກົນ, ປັບປຸງຄຸນນະພາບ ການບໍລິການ ແລະ ການດໍາເນີນງານພາຍໃນສູນຂໍ້ມູນແລະ ເອົາໃຈໃສ່ຍົກສູງການເຝົ້າລະວັງຄວາມຜິດພາດຂອງລະບົບ 7/24 ຢ່າງບໍ່ຢຸດຢຸດຢັ້ງ.  
(ຂ່າວ-ພາບ: ແສງຈັນ)