 |
ທ່ານ ວໍລະພົດ ອຸຊຸໄພບູນວົງ ໄດ້ກ່າວລາຍວ່າ: ຕະຫຼອດໄລຍະເວລາການພັດທະນາ ແລະ ກໍ່ສ້າງ ລວມເຖິງການດໍາເນີນງານທາງການຄ້າເຂື່ອນໄຟຟ້າພະລັງນໍ້າໄຊຍະບູລີ ໄດ້ຍົກລະດັບມາດຕະຖານການຜະລິດໄຟຟ້າພະລັງນ້ຳ ໃຫ້ເປັນຕົ້ນແບບຂອງພາກພື້ນ ທັງດ້ານສິ່ງແວດລ້ອມ, ສັງຄົມ, ເສດຖະກິດ ແລະ ຖືກຕ້ອງຕາມຫຼັກການສາກົນ (ESG). ການທີ່ໄດ້ຮັບລາງວັນໃນຄັ້ງນີ້ຖືເປັນກຽດ ແລະ ກໍາລັງໃຈທີ່ລັດຖະບານ ສປປ ລາວມອບໃຫ້ ແລະ ສະທ້ອນເຖິງການດຳເນີນງານທີ່ມີການມຸ່ງໝັ້ນສູ່ຄວາມຍືນຍົງ. ເຂື່ອນໄຟຟ້າພະລັງນໍ້າໄຊຍະບູລີ ເປັນເຂື່ອນໄຟຟ້າປະເພດນໍ້າໄຫຼຜ່ານ (Run-of-River) ເທິງແມ່ນໍ້າຂອງ ໃຊ້ພະລັງງານຈາກການໄຫຼຂອງນໍ້າຕາມທໍາມະຊາດ ບໍ່ມີການກັກເກັບນໍ້າໃນການຜະລິດໄຟຟ້າ ມີກໍາລັງຜະລິດຕິດຕັ້ງ 1,285 ເມກະວັດ ເລີ່ມດໍາເນີນການທາງການຄ້າ ຕັ້ງແຕ່ວັນທີ 29 ຕຸລາ 2019 ສາມາດຜະລິດກະແສໄຟຟ້າຈາກພະລັງນ້ໍາສະເລ່ຍໄດ້ຫຼາຍກວ່າ 7,400 ກິກະວັດຊົ່ວໂມງຕໍ່ປີ ຊຶ່ງນັບເປັນພະລັງງານສະອາດຈາກແຫຼ່ງພະລັງງານໝຸນວຽນ ສາມາດຫຼີກລ່ຽງການປ່ອຍກາສເຮືອນແກ້ວໄດ້ເຖິງ 3 ລ້ານໂຕນ, ກາສກາກໂບນິກທຽບເທົ່າຕໍ່ປີ ຊ່ວຍເສີມສ້າງຄວາມໝັ້ນຄົງດ້ານພະລັງງານໃຫ້ແກ່ ສປປ ລາວ ແລະ ສົ່ງຕໍ່ພະລັງງານສະອາດສູ່ປະເທດເພື່ອນບ້ານ.
ພ້ອມກັນນີ້ ເຂື່ອນໄຟຟ້າພະລັງນໍ້າໄຊຍະບູລີ ນຳໃຊ້ເຕັກໂນໂລຊີທີ່ທັນສະໄໝເພື່ອຮັກສາຄວາມສົມດູນຂອງລະບົບນິເວດ ເຊັ່ນ: ລະບົບທາງປາຜ່ານແບບປະສົມປະສານ ທີ່ເອື້ອໃຫ້ປາ 143 ສາຍພັນ ສາມາດລອຍຂຶ້ນລົງແມ່ນໍ້າຂອງຜ່ານໂຮງໄຟຟ້າໄດ້ຢ່າງປອດໄພ ລວມທັງເປັນໂຮງໄຟຟ້າພະລັງນໍ້າແຫ່ງທຳອິດຂອງແມ່ນໍ້າຂອງ ທີ່ຕິດຕັ້ງປະຕູລະບາຍຕະກອນໜັກ 4 ບານ ແລະ ຕະກອນເບົາ 7 ບານ ແລະ ສ້າງຊ່ອງທາງສັນຈອນເຮືອ ທີ່ຮອງຮັບເຮືອຂະໜາດໃຫຍ່ 500 ໂຕນ ໄດ້ພ້ອມກັນ 2 ລຳ ເພື່ອອຳນວຍຄວາມສະດວກໃນການສັນຈອນທາງນ້ຳຕະຫຼອດທັງປີຖືເປັນຕົ້ນແບບເຂື່ອນໄຟຟ້າພະລັງນໍ້າທີ່ສອດຄ່ອງກັແນວທາງການພັັດທະນາຢ່າງຍືນຍົງຂອງພາກພື້ນແມ່ນໍ້າຂອງ.
ໃນດ້ານການຊ່ວຍເຫຼືອສັງຄົມ ເຂື່ອນໄຟຟ້າພະລັງນໍ້າໄຊຍະບູລີ ຍັງໃຫ້ຄວາມສໍາຄັນກັບການພັດທະນາຄຸນນະພາບຊີວິດຊຸມຊົນອ້ອມຂ້າງເຂື່ອນໄຟຟ້າ ທັງການຈັດສັນທີ່ດິນພ້ອມພື້ນຖານໂຄງລ່າງ ພັດທະນາທັກສະອາຊີບໃຫ້ແກ່ປະຊາຊົນ 3,063 ຄົນ ຫຼື 612 ຄົວເຮືອນ ໃນ 15 ໝູ່ບ້ານ ລວມເຖິງການສົ່ງເສີມການຈ້າງງານບຸກຄະລາກອນທ້ອງຖິ່ນ ໂດຍມີພະນັກງານຄົນລາວທັງໝົດ 123 ຄົນ ຫຼື 62% ຂອງຈໍານວນພະນັກງານທັງໝົດ. ການໄດ້ຮັບຫຼຽນໄຊແຮງງານຊັ້ນ II ໃນຄັ້ງນີ້ ບໍ່ພຽງແຕ່ເນັ້ນເຖິງສັກກະຍະພາບຂອງເຂື່ອນໄຟຟ້າພະລັງນ້ຳ ໄຊຍະບູລີ ໃນຖານະຕົ້ນແບບເຂື່ອນໄຟຟ້າພະລັງນ້ຳປະເພດນໍ້າໄຫຼຜ່ານມາດຕະຖານສາກົນ ແຕ່ຍັງເນັ້ນເຖິງບົດບາດຂອງເຂື່ອນໄຟຟ້າພະລັງນໍ້າໄຊຍະບູລີ ໃນການເບິ່ງແຍງສິ່ງແວດລ້ອມ ແລະ ການພັດທະນາສັງຄົມຊຸມຊົນໃນ ສປປ ລາວ ຢ່າງແທ້ຈິງ.
ບໍລິສັດ ໄຊຍະບູລີ ພາວເວີ ຈຳກັດ (XPCL) ເປັນຜູ້ດຳເນີນການເຂື່ອນໄຟຟ້າພະລັງນໍ້າ ໄຊຍະບູລີ ຊຶ່ງເປັນເຂື່ອນໄຟຟ້າພະລັງນໍ້າປະເພດໄຫຼຜ່ານຂະໜາດໃຫຍ່ (Run-of-River) ຊຶ່ງໃຊ້ພະລັງງານຈາກການໄຫຼຂອງນໍ້າຕາມທໍາມະຊາດ ບໍ່ມີການກັກເກັບນໍ້າ ຕັ້ງຢູ່ເທິງແມ່ນໍ້າຂອງໃນ ສປປ ລາວ ມີກຳລັງການຜະລິດຕິດຕັ້ງລວມ 1,285 ເມກາວັດ ໂດຍມີລາຍຮັບໄດ້ຫຼາຍກວ່າ 98% ຈາກການຂາຍໄຟຟ້າໃຫ້ກັບການໄຟຟ້າຝ່າຍຜະລິດແຫ່ງປະເທດໄທ (EGAT) ພາຍໃຕ້ສັນຍາຊື້-ຂາຍໄຟຟ້າໄລຍະເວລາ 29 ປີ ຕັ້ງແຕ່ປີ 2019-2048, XPCL ມີຜູ້ຖືຫຸ້ນຫຼັກ ໄດ້ແກ່ ບໍລິສັດ ຊີເຄ ພາວເວີ ຈໍາກັດ (ມະຫາຊົນ) (42.5%), ບໍລິສັດ ນະທີ ຊິນເນີຍີ່ ຈໍາກັດ (25%), ບໍລິສັດ ຜະລິດ-ໄຟຟ້າລາວ (ມະຫາຊົນ) (20%), ແລະ ບໍລິສັດ ຜະລິດໄຟຟ້າ ຈໍາກັດ (ມະຫາຊົນ) (12.5%).
(ຂໍ້ມູນເຂື່ອນໄຟຟ້າພະລັງນໍ້າ ໄຊຍະບູລີ, ຂ່າວ:ຕຸໄລເພັດ)
ຄໍາເຫັນ