ບໍລິສັດໂຢປັງ ເຕັກນິກກະສິກໍາສົ່ງເສີມປະຊາຊົນປູກແຕງໂມຢູ່ເມືອງວຽງພູຄາ

ບໍລິສັດໂຢປັງ ເຕັກນິກກະສິກໍາຂາອອກ-ຂາເຂົ້າຈໍາກັດຜູ້ດຽວໄດ້ລົງທຶນເຊົ່າ-ສຳປະທານທີ່ດິນນຳປະຊາຊົນເມືອງວຽງພູຄາແຂວງຫຼວງນ້ຳທາເພື່ອປູກໝາກແຕງໂມ, ສ້າງວຽກເຮັດງານທຳແລະສ້າງລາຍຮັບໃຫ້ປະຊາຊົນທ້ອງຖິ່ນ.
ທ່ານ ນາງ ແສງວອນ ໄຊຍະລີ ປະທານບໍລິສັດໂຢປັງ ເຕັກນິກກະສິກໍາຂາອອກ-ຂາເຂົ້າຈໍາກັດຜູ້ດຽວ ໄດ້ເປີດເຜີຍຕໍ່ສື່ມວນຊົນທ້ອງຖິ່ນວ່າ: ບໍລິສັດໂຢປັງ ເປັນບໍລິສັດໄດ້ສົ່ງເສີມການປູກພືດລະດູແລ້ງ ເປັນຕົ້ນແມ່ນການປູກໝາກແຕງໂມ ແລະ ໝາກຖົ່ວເບີ ຢູ່ເມືອງວຽງພູຄາ ແຂວງຫຼວງນໍ້າທາ, ໄດ້ສໍາປະທານທີ່ດິນນໍາປະຊາຊົນໃນໄລຍະເວລາ 5 ປີ, ໃນນີ້ທາງບໍລິສັດໄດ້ລົງທຶນ100%, ມີ 26 ບ້ານ ໃນເນື້ອທີ່ 400 ກວ່າເຮັກຕາ,ໂດຍໄດ້ນໍາເອົາວິຊາການ ຈາກ ສປ ຈີນຊຶ່ງເປັນຜູ້ທີ່ມີປະສົບການຫຼາຍປີມາປະຈໍາຢູ່ໂຄງການ ເລີ່ມແຕ່ການວິໃຈດິນ,ການໃສ່ຝຸ່ນ,ປຸຍ ແລະ ແນວພັນຂອງໝາກແຕງໂມ,ປີນີ້ໄດ້ນໍາເອົາແນວພັນ ຖຽນວັງມີຈືຕູ້ ຫຼື ໝາກໂມຫວານມາປູກ, ໂດຍໃນປີ 2024 ນີ້ຄາດວ່າຜົນຜະລິດຈະບັນລຸ25-30 ພັນໂຕນ, ສໍາລັບແຮງງານສ່ວນຫຼາຍກໍແມ່ນປະຊາຊົນຢູ່ເມືອງວຽງພູຄາ,ໜ້າວຽກເລີ່ມແຕ່ປູກຈົນຮອດການເກັບກູ້ຜົນຜະລິດ, ສ່ວນຄ່າແຮງງານເລີ່ມຕົ້ນແຕ່ 130.000 ພັນກີບ ຫາ 200.000 ກວ່າກີບຕໍ່ມື້ (ເນື່ອງຈາກວ່າບາງຄົນຮັບຈ້າງເປັນມື້ເປັນຊ່ວງໄລຍະ) ແລະ ປີ 2025 ທາງບໍລິສັດຈະໄດ້ມີການຂະຫຍາຍພື້ນທີ່ຕື່ມອີກ,  ພ້ອມນີ້ທາງບໍລີສັດກໍໄດ້ສົ່ງເສີມປະຊາຊົນປູກຫມາກຖົ່ວເບີ ໂດຍແມ່ນບໍລິສັດເປັນຜູ້ລົງທືນ 100% ໂດຍບໍ່ໄດ້ຈ່າຍຄ່າເຊົ່າດິນ,ສ່ວນແຮງງານ ແລະ ເນື້ອທີ່ດິນແມ່ນຂອງປະຊາຊົນ,ພາຍຫຼັງທີ່ປະຊາຊົນເກັບກູ້ແລ້ວ ທາງບໍລິສັດຈະເກັບຊື້ໃນລາຄາທີ່ໄດ້ຕົກລົງກັນໄວ້ໃນສັນຍາ. ນອກຈາກນີ້ຖ້າຫາກປະຊາຊົນ ມີພື້ນທີ່ເຂດເນີນສູງທີ່ເໝາະສົມ ກໍສາມາດພົວພັນທາງບໍລິສັດເພື່ອ ສົ່ງເສີມ ການປູກໝາກເດືອຍ ແລະ ສາລີຕື່ມອີກ.  
ປະທານບໍລິສັດໂຢປັງ ເຕັກນິກກະສີກໍາຂາອອກ-ຂາເຂົ້າຈໍາກັດຜູ້ດຽວ ຍັງໄດ້ຮຽກຮ້ອງມາຍັງປະຊາຊົນຊາວຢູ່ເມືອງວຽງພູຄາ ຈົ່ງອໍານວຍຄວາມສະດວກໃຫ້ແກ່ບໍລິສັດຜູ້ລົງທຶນໃນການສໍາປະທານເນື້ອທີ່ດິນເພື່ອປູກໝາກແຕງໂມ ແລະ ຖົ່ວເບີ ເພື່ອໃຫ້ປະຊາຊົນມີວຽກເຮັດງານທຳແລະມີລາຍຮັບເຂົ້າຄອບຄົວ. 
ຂ່າວ: ມຸນຕີ