ບົດສັນລະເສີນ ຂອງສະຫາຍ ບຸນທອງ ຈິດມະນີ ກໍາມະການກົມການເມືອງ ຜູ້ປະຈໍາການຄະນະເລຂາທິການສູນກາງພັກ ຮອງປະທານປະເທດ ແຫ່ງ ສປປ ລາວ ກ່າວໃນງານອວຍພອນວັນເກີດ ປະທານ ຄໍາໄຕ ສີພັນດອນ ຄົບຮອບ 100 ປີ (ນະຄອນຫຼວງວຽງຈັນ, ວັນທີ 8 ກຸມພາ 2024)

ຮຽນ: ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດແຫ່ງ ສປປ ລາວ ທີ່ເຄົາລົບ ແລະ ນັບຖື.
         - ບັນດາສະຫາຍ ກົມການເມືອງສູນກາງພັກ ແລະ ຄະນະເລຂາທິ 
  ການສູນກາງພັກ ທີ່ນັບຖື.
     - ບັນດາສະຫາຍ ຜູ້ນໍາພັກ-ລັດ, ອະດີດຜູ້ນໍາພັກ-ລັດ ທີ່ນັບຖື.
     - ປະຊາຊົນລາວບັນດາເຜົ່າທີ່ຮັກແພງ.
     - ສະຫາຍ, ເພື່ອນມິດ ທີ່ຮັກແພງທັງຫຼາຍ.
ໃນທ່າມກາງບັນຍາກາດ ທີ່ທົ່ວພັກ-ລັດ ແລະ ທົ່ວປວງຊົນລາວເຮົາ ຫາກໍສໍາເລັດການສະເຫຼີມ ສະຫຼອງວັນສະຖາປະນາ ສປປ ລາວ ຄົບຮອບ 48 ປີ, ວັນຄ້າຍວັນເກີດ ປະທານ ໄກສອນ ພົມ ວິຫານ ຄົບຮອບ 103 ປີ, ວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ແລະ ໃນຊ່ວງເວລາທີ່ທົ່ວປະເທດ ພວມສືບຕໍ່ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ 11 ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 9 ໃນໄລຍະທ້າຍສະໄໝ ຢ່າງເປັນຂະບວນຟົດຟື້ນ ແລະ ເບີກບານມ່ວນຊື່ນ ນັ້ນ; ມື້ນີ້ ສູນກາງພັກ, ລັດຖະບານ, ສະພາແຫ່ງຊາດ, ແນວລາວສ້າງຊາດ ແລະ ອົງການຈັດຕັ້ງມະຫາຊົນ ຂັ້ນສູນກາງ, ພ້ອມດ້ວຍປະຊາຊົນລາວບັນດາເຜົ່າໃນທົ່ວປະເທດ ໄດ້ພ້ອມກັນຈັດຕັ້ງອວຍພອນວັນເກີດ ປະທານ ຄຳໄຕ ສີພັນດອນ ຄົບຮອບ 100 ປີ. ປະທານ ຄໍາໄຕ ສີພັນດອນ ແມ່ນໜຶ່ງໃນບັນດາສະຫາຍການນໍາຮຸ່ນກໍ່ຕັ້ງ ຂອງພັກເຮົາ, ອະດີດປະທານພັກ-ປະທານປະເທດ, ອະດີດນາຍົກລັດຖະມົນຕີ, ອະດີີດເສນາທິການ-ຜູ້ບັນຊາການກອງທັບປະຊາຊົນລາວ, ອະດີດລັດຖະມົນຕີກະ ຊວງປ້ອງກັນປະເທດ. 
ໃນພິທີອັນສະຫງ່າລາສີ ແລະ ເບີກບານມ່ວນຊື່ນນີ້, ຕາງໜ້າກົມການເມືອງສູນກາງພັກ, ກໍຄືທົ່ວພັກ, ທົ່ວລັດ, ທົ່ວກໍາລັງປະກອບອາວຸດ ແລະ ປະຊາຊົນລາວບັນດາເຜົ່າ ຂໍອວຍພອນໄຊອັນປະເສີດ ແດ່ປະທານ ຄໍາໄຕ ສີພັນດອນ ຈົ່ງມີສຸຂະພາບແຂງແຮງ, ມີຄວາມຜາສຸກໃນຊີວິດສ່ວນຕົວ ແລະ ຄອບຄົວ, ເປັນຮົ່ມໂພຮົ່ມໄຊ ໃຫ້ປະເທດຊາດບ້ານເມືອງຕໍ່ໆໄປ.
ບັນດາສະຫາຍທີ່ນັບຖື ແລະ ຮັກແພງ,
ປະທານ ຄໍາໄຕ ສີພັນດອນ ເກີດເມື່ອວັນທີ 8 ກຸມພາ 1924 ໃນຄອບຄົວຊາວນາທີ່ດຸໝັ່ນຂະຫຍັນພຽນ ຢູ່ບ້ານຫົວໂຂງພະໃຫຍ່, ເມືອງໂຂງ, ແຂວງສີທັນດອນ (ແຂວງຈໍາປາສັກໃນປັດຈຸບັນ). ຍ້ອນໄດ້ຮັບຜົນສະທ້ອນຈາກມູນເຊື້ອຮັກຊາດຂອງຄອບຄົວ ກໍຄືມູນເຊື້ອຕໍ່ສູ້ເດັດດ່ຽວ, ເດັດຂາດບໍ່ຍອມຈຳນົນຂອງປະຊາຊົນລາວບັນດາເຜົ່າ ຕ້ານພວກສັກດີນາລ່າເມືອງຂຶ້ນ ໂດຍສະເພາະຢ່າງຍິ່ງ ຜ່ານການສຶກສາຮ່ຳຮຽນ ແລະ ຮັບລາຊະການ, ຜ່ານການສຳຜັດກັບຊີວິດຕົວຈິງຂອງສັງຄົມ, ປະທານ ໄດ້ຮັບຮູ້ແຈ້ງເຖິງຄວາມທຸກລະທົມຂົມຂື່ນຂອງຊາດທີ່ສູນເສຍເອກະລາດ, ເຂົ້າໃຈເລິກເຊິ່ງເຖິງຄວາມເຈັບຊ້ຳຂອງປະຊາຊົນລາວທີ່ຕົກເປັນຂ້ອຍຂ້າ ອັນໄດ້ເຮັດໃຫ້ປະທານ ມີຄວາມຄຽດແຄ້ນສັດຕູຜູ້ຮຸກຮານ ແລະ ພວກສັກດີນາປະຕິການຂາຍຊາດ, ຈາກຈິດໃຈຮັກຊາດທີ່ໄດ້ຮັບການບົ່ມເພາະມາຕັ້ງແຕ່ເຍົາໄວ ໄດ້ກ້າວໄປສູ່ລັດທິຮັກຊາດ ແລະ ໄດ້ຕັດສິນໃຈເຂົ້າຮ່ວມໃນຖັນແຖວກຳລັງຕໍ່ຕ້ານ ເພື່ອກອບກູ້ເອົາເອກະລາດ, ອິດສະຫຼະພາບມາໃຫ້ປະເທດຊາດ ແລະ ປະຊາຊົນເຮົາ. ນັ້ນເປັນບາດລ້ຽວທີ່ສຳຄັນໃນຊີວິດ, ເປັນຈຸດເລີ່ມຕົ້ນແຫ່ງການເຄື່ອນໄຫວປະຕິວັດຂອງ ປະທານ ຄຳໄຕ ສີພັນດອນ.
ປະທານ ຄໍາໄຕ ສີພັນດອນ ແມ່ນນັກຮັກຊາດທີ່ດູດດື່ມ, ນັກປະຕິວັດທີ່ໂດດເດັ່ນ, ມີຄວາມປີຊາສາມາດ-ອົງອາດກ້າແກ່ນ, ສຸຂຸມຮອບຄອບ ແລະ ໜັກແໜ້ນ ໃນທຸກສະຖານະການ. ເພິ່ນເປັນໜຶ່ງໃນບັນດາການນໍາສູງສຸດຮຸ່ນທໍາອິດ ຜູ້ທີ່ໄດ້ຄຽງບ່າຄຽງໄຫຼ່ກັບປະທານ ໄກສອນ ພົມວິຫານ ແລະ ຜູ້ນໍາອື່ນໆ ນໍາພາການກໍ່ຕັ້ງພັກ ແລະ ກອງທັບປະຕິວັດຢູ່ປະເທດເຮົາ, ຈັດຕັ້ງ-ນໍາພາການຕໍ່ສູ້ປະຕິວັດຂອງປະຊາຊົນ ດ້ວຍຄວາມສະຫຼາດສ່ອງໄສ ແລະ ເດັດຂາດມີໄຊ. ປະທານ ໄດ້ເລີ່ມຕົ້ນຈາກການເປັນນາຍທະຫານປະຈໍາເສນາທິການພາກໃຕ້, ເປັນຜູ້ຕາງໜ້າລັດຖະບານແນວລາວອິດສະຫຼະ, ເປັນປະທານຄະນະກໍາມະການຕໍ່ຕ້ານ ກ້າວສູ່ການເປັນຜູ້ບັນຊາການສູງສຸດຂອງກອງທັບປົດປ່ອຍປະຊາຊົນລາວ, ເປັນລັດ ຖະມົນຕີກະຊວງປ້ອງກັນປະເທດ ຜູ້ທໍາອິດຂອງລະບອບໃໝ່ ຂອງ ສປປ ລາວ, ເປັນນາຍົກລັດຖະມົນຕີ, ເປັນປະທານຄະນະບໍລິຫານງານສູນກາງພັກປະຊາຊົນປະຕິວັດລາວ ແລະ ປະທານປະເທດແຫ່ງ ສປປ ລາວ. 
ປະທານ ຄໍາໄຕ ສີພັນດອນ ແມ່ນນັກຍຸດທະສາດ-ຍຸດໂທບາຍທີ່ເບິ່ງກວ້າງເຫັນໄກ, ຄ່ອງແຄ້ວ, ວ່ອງໄວ ແລະ ມີຄວາມປະດິດສ້າງສູງ. ເພິ່ນ ໄດ້ເປັນເຈົ້າການໄຈ້ແຍກສະພາບການຕ່າງໆ ໂດຍສະເພາະແມ່ນກົນອຸບາຍຂອງສັດຕູທີ່ມີຕໍ່ປະເທດເຮົາໃນສະເພາະໜ້າ ແລະ ຍາວນານ, ປະກອບສ່ວນຢ່າງຕັ້ງໜ້າເຂົ້າໃນການຄົ້ນຄວ້າວາງຍຸດທະສາດ, ກຳນົດຍຸດທະວິທີ, ຍຸດໂທບາຍ, ນໍາໃຊ້ອາວຸດຍຸດໂທປະກອນ ຂອງສົງຄາມປະຊາຊົນປົດປ່ອຍຊາດ ເພື່ອຕີເອົາຊະນະກໍາລັງຂອງພວກຈັກກະພັດຜູ້ຮຸກຮານ ແລະ ປະຕິການຂາຍຊາດ, ເຮັດໃຫ້ການປະຕິວັດລາວເຕີບໃຫຍ່ຂະຫຍາຍຕົວ ແລະ ຍາດໄດ້ໄຊຊະນະນີ້ ຕໍ່ໄຊຊະນະໃໝ່ໃຫຍ່ຫຼວງກວ່າເກົ່າ, ຈົນເຖິງໄຊຊະນະສົມບູນ ປົດປ່ອຍທົ່ວປະເທດ ແລະ ສະຖາປະນາ ສປປ ລາວ ຂຶ້ນໃນວັນທີ 2 ທັນວາ 1975, ເພິ່ນໄດ້ເປັນເຈົ້າການຄົ້ນຄວ້າ ແລະ ນໍາສະເໜີໃຫ້ກົມການເມືອງສູນກາງພັກ ພິຈາລະນາຕົກລົງກ່ຽວກັບການກຳນົດ 2 ໜ້າທີ່ຍຸດທະສາດ ຂອງການປະຕິວັດໃນໄລຍະໃໝ່ ຊຶ່ງໃນນັ້ນຖືເອົາການປົກຮັກສາປະເທດຊາດເປັນໜ້າທີ່ສຳຄັນ ແລະ ຖືເອົາການສ້າງລະບອບໃໝ່ໃຫ້ໝັ້ນຄົງເປັນໜ້າທີ່ຈຳເປັນ, ໂດຍສຸມໃສ່ການຫັນກຳລັງລົງສູ່ຮາກຖານ ເພື່ອກຳແໜ້ນປະຊາຊົນ ເຮັດໃຫ້ເຂົາເຈົ້າເຂົ້າໃຈສະພາບການ, ກຳແໜ້ນແນວທາງນະໂຍບາຍຂອງພັກ ແລະ ອະນາຄົດຂອງປະເທດຊາດ, ອຸ່ນອ່ຽນໃນການດຳລົງຊີວິດ ແລະ ທຳມາຫາກິນພາຍໃຕ້ລະບອບໃໝ່. ພ້ອມກັນນັ້ນ ກໍເປັນເຈົ້າການປັບປຸງອົງການປົກຄອງທ້ອງຖິ່ນ ໃຫ້ມີຄວາມໜັກແໜ້ນເຂັ້ມແຂງ, ຊຸກຍູ້ການເຄື່ອນໄຫວຂອງອົງການແນວລາວຮັກຊາດ ແລະ ບັນດາອົງການຈັດຕັ້ງມະຫາຊົນ, ສົມທົບກັບທະຫານທ້ອງຖິ່ນ, ທະຫານລາດກອງຫຼອນ ໃຫ້ສາມາດເຮັດໜ້າທີ່ປົກປັກຮັກສາຄວາມສະຫງົບສຸກຂອງປະຊາຊົນ ແລະ ຄວາມເປັນລະບຽບຮຽບຮ້ອຍໃນບ້ານຊ່ອງຂອງຕົນ, ຮັດແໜ້ນຄວາມສາມັກຄີລະຫວ່າງກອງທັບ ແລະ ປະຊາຊົນ, ສ້າງທ່າສະໜາມປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ. ດ້ວຍການປະຕິບັດ 2 ໜ້າທີ່ຍຸດທະສາດດັ່ງກ່າວຢ່າງໄດ້ຮັບຜົນດີ ໄດ້ເຮັດໃຫ້ ສປປ ລາວ ພວກເຮົາທີ່ຍັງໜຸ່ມນ້ອຍ ສາມາດຜ່ານຜ່າອຸປະສັກຕ່າງໆນາໆ ແລະ ນັບມື້ກ້າວໄປໜ້າຢ່າງໜັກແໜ້ນ, ພ້ອມນັ້ນ ກອງທັບປະຊາຊົນລາວ ກໍໄດ້ຮັບການປັບປຸງດີຂຶ້ນໃນທຸກດ້ານ ໂດຍສ້າງໃຫ້ເປັນກອງທັບທີ່ມີແບບແຜນ ແລະ ທັນສະໄໝເທື່ອລະກ້າວ.
ປະທານ ຄຳໄຕ ສີພັນດອນ ແມ່ນຜູ້ນຳທີ່ມີແບບແຜນນຳພາແທດຕົວຈິງ, ແມ່ນນັກຈັດຕັ້ງບັນຊາທີ່ມີຄວາມປີຊາສາມາດ, ຮູ້ເລີ່ມຕົ້ນວຽກງານທີ່ຖືກຕ້ອງ, ຮູ້ຈັດວາງກຳລັງທີ່ເໝາະສົມ, ມີຄວາມກ້າແກ່ນ, ທຸ່ນທ່ຽງ ແລະ ເດັດດ່ຽວໜຽວແໜ້ນໃນການຊີ້ນຳ-ບັນຊາ ທັງເປັນເຈົ້າການໃນທຸກກໍລະນີ. ເພີ່ນ ໄດ້ເປັນເຈົ້າການນໍາພາ, ບັນຊາຊີ້ນໍາກໍາລັງປະກອບອາວຸດ ແລະ ທົ່ວປວງຊົນ ປະຕິບັດໜ້າທີ່ຍຸດທະສາດປົກປັກຮັກສາລະບອບໃໝ່ ກໍຄືຄວາມເປັນເອກະລາດແຫ່ງຊາດ, ອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຊາດ, ເຮັດໃຫ້ປະເທດຊາດມີສະຖຽນລະພາບ ແລະ ລະບອບການເມືອງມີຄວາມໝັ້ນຄົງດັ່ງໃນທຸກວັນນີ້. ປະທານ ໄດ້ສືບຕໍ່ປັບປຸງ ແລະ ເສີມຂະຫຍາຍແນວທາງປ່ຽນແປງໃໝ່ຂອງພັກເຮົາ ທີ່ປະທານ ໄກສອນ ພົມວິຫານ ເປັນຜູ້ລິເລີ່ມໃຫ້ມີຄວາມສອດຄ່ອງ ແລະ ສົມບູນຍິ່ງຂຶ້ນ, ພ້ອມທັງໄດ້ຈັດຕັ້ງນຳພາປະຊາຊົນປະຕິບັດຢ່າງມີຜົນສຳເລັດ. ອັນພົ້ນເດັ່ນແມ່ນ ເພິ່ນໄດ້ນໍາພາ-ຊີ້ນໍາ ການສະຫຼຸບຖອດຖອນບົດຮຽນ ຈາກການດໍາເນີນພາລະກິດປ່ຽນແປງໃໝ່ໃນ 10 ປີທໍາອິດ ຊຶ່ງຕໍ່ມາກອງປະຊຸມໃຫຍ່ຄັ້ງທີ VI ຂອງພັກເຮົາ ກໍໄດ້ຮັບຮອງເອົາ 5 ບົດຮຽນໃນການດໍາເນີນພາລະກິດປ່ຽນແປງໃໝ່.
ປະທານ ຄໍາໄຕ ສີພັນດອນ ແມ່ນຜູ້ທີ່ມີແບບແຜນເຮັດວຽກທີ່ຕິດແທດມະຫາຊົນ, ເພິ່ນໝັ່ນລົງຮາກຖານຢ້ຽມຢາມຂັ້ນລຸ່ມ ແລະ ພົບປະປະຊາຊົນເປັນປົກກະຕິ ເພື່ອຊອກຮູ້ຄວາມມຸ່ງມາດປາຖະໜາ ແລະ ຄວາມຂັດຂ້ອງສົນໃຈຂອງເຂົາເຈົ້າ, ທັງຊອກຮູ້ຜົນກະທົບດ້ານດີ ແລະ ດ້ານອ່ອນຂອງການປະຕິບັດນະໂຍບາຍດ້ານຕ່າງໆ ແນໃສ່ຜັນຂະຫຍາຍດ້ານດີ, ຈໍາກັດດ້ານຂາດຕົກບົກຜ່ອງໃຫ້ທັນເວລາ. ຍາມໃດເພິ່ນກໍໃຫ້ຄວາມສໍາຄັນຕໍ່ຄວາມຄິດເຫັນຂອງມະຫາຊົນ ເພື່ອເປັນບ່ອນອີງໃຫ້ແກ່ການສະຫຼຸບຕີລາ ຄາ ແລະ ວາງທິດທາງແກ້ໄຂບັນຫາຕ່າງໆ ຊຶ່ງເພິ່ນເຄີຍເຕືອນວ່າ: ທະຫານ, ພະນັກງານເຮົາ ຫາກສາມາດຫຼຸດຜ່ອນພະຍາດອວດເກັ່ງ, ໃນຕົວ ແລະ ອາຍາສິດໄດ້ຫຼາຍເທົ່າໃດ ກໍຈະຊ່ວຍຫຼຸດຜ່ອນຂໍ້ບົກຜ່ອງ ແລະ ຜິດພາດໄດ້ຫຼາຍເທົ່ານັ້ນ. ເພິ່ນຖືວ່າ: ການປະຕິວັດແມ່ນພາລະກິດຂອງມະຫາຊົນ, ມະຫາ ຊົນແມ່ນກໍາລັງແຮງທີ່ມະຫາສານ ແລະ ເປັນກໍາລັງແຮງທີ່ຊະນະເລີດ, ຖ້າຂະບວນການຂອງມະຫາຊົນຫາກໄດ້ຮັບການສຶກສາອົບຮົມ, ມີການຈັດຕັ້ງ ແລະ ນໍາພາເປັນຢ່າງດີແລ້ວ ມະຫາຊົນກໍຈະສາມາດສ້າງປະຫວັດສາດອັນມະຫັດສະຈັນ ຂອງຊາດໄດ້ດີ.
ປະທານ ຄຳໄຕ ສີພັນດອນ ແມ່ນໜຶ່ງໃນບັນດາຜູ້ນຳຂອງພັກເຮົາ ທີ່ກຳຄັນທຸງແຫ່ງຄວາມສາມັກຄີເປັນເອກະພາບຢູ່ພາຍໃນພັກ ແລະ ໃນຖັນແຖວກຳລັງປະຕິວັດ ທັງເປັນສັນຍາລັກແຫ່ງຄວາມສາມັກຄີ ເປັນປຶກແຜ່ນຂອງປວງຊົນລາວທັງຊາດ; ມີຄວາມເຄົາລົບ ແລະ ປະຕິບັດຢ່າງເຂັ້ມງວດຕໍ່ບັນດາຫຼັກການແຫ່ງການຈັດຕັ້ງເຄື່ອນໄຫວຂອງພັກ; ມີຈິດໃຈເອື້ອເຟື້ອເພື່ອແຜ່ຕໍ່ໝູ່ສະຫາຍ ແລະ ຕໍ່ມະຫາຊົນ; ເດັດດ່ຽວຕ້ານທຸກປະກົດການທີ່ຝືນກັບຫຼັກການ ແລະ ລະບຽບວິໄນ ເພື່ອປົກປ້ອງຄວາມປອດໃສຂອງພັກ ແລະ ກໍ່ສ້າງເພື່ອນສະຫາຍ ໃຫ້ມີການປະພຶດປະຕິບັດທີ່ເປັນແບບຢ່າງ.
ສິ່ງລວມຍອດທີ່ສຸດຂອງ ປະທານ ຄຳໄຕ ສີພັນດອນ ແມ່ນຄວາມຈົງຮັກພັກດີ, ຄວາມບໍລິສຸດຜຸດຜ່ອງຕໍ່ພັກ ຕໍ່ປະເທດຊາດ, ເວລາໃດກໍຖືຜົນປະໂຫຍດຂອງພັກ ແລະ ຂອງຊາດເໜືອກວ່າສິ່ງອື່ນໃດ; ແມ່ນນ້ຳໃຈຮັກຊາດ, ຄຽດແຄ້ນສັດຕູ້ຜູ້ຮຸກຮານ, ມີມະໂນທຳ, ມີຄວາມມານະອົດທົນ ແລະ ສູ້ຊົນ ເພື່ອອຸທິດຕົນໃຫ້ພາລະກິດປະຕິວັດ, ທຸ່ນທ່ຽງເຊື່ອໝັ້ນ, ເອົາການເອົາງານ ແລະ ມີໄຫວພິບໃນການຈັດຕັ້ງປະຕິບັດວຽກງານທີ່ຕົນຮັບຜິດຊອບ; ດຳລົງຊີວິດທີ່ປອດໃສຂາວສະອາດ, ກະທັດຮັດ, ປະຢັດມັດທະຍັດ, ໃກ້ຊິດຕິດແທດກັບມະຫາຊົນ, ຈິງໃຈຕໍ່ເພື່ອນສະຫາຍ, ເອື້ອເຟື້ອກັບທຸກຄົນຢູ່ອ້ອມຂ້າງຕົນ; ເຂັ້ມງວດໃນດ້ານຫຼັກການ, ເຄັ່ງຄັດຕໍ່ລະບຽບວິໄນ ແຕ່ມີປະຊາທິປະໄຕໃນໝູ່ຄະນະ.
ປະທານ ຄຳໄຕ ສີພັນດອນ ແມ່ນນັກເຄື່ອນໄຫວຕ່າງປະເທດທີ່ສ້າງສັນ, ເປັນຜູ້ສືບຕໍ່ຊີ້ນຳການປະຕິບັດແນວທາງນະໂຍບາຍການຕ່າງປະເທດຂອງພັກ ແລະ ລັດຢ່າງມີປະສິດທິຜົນ ຊຶ່ງເວລາໃດປະທານກໍໄດ້ຊີ້ນໍາວ່າ: ເຮັດວຽກງານພົວພັນຕ່າງປະເທດຕ້ອງກໍາແໜ້ນແນວທາງການຕ່າງປະເທດຂອງພັກ ແມ່ນເພື່ອສັນຕິພາບ, ເອກະລາດ, ມິດຕະພາບ ແລະ ການຮ່ວມມືຢ່າງສະເໝີຕົ້ນສະເໝີປາຍ; ໜັກແໜ້ນທາງດ້ານຍຸດທະສາດ, ມີໄຫວພິບຄ່ອງແຄ້ວທາງດ້ານຍຸດໂທບາຍ; ປະຕິບັດຕາມທິດເພີ່ມມິດ-ຜ່ອນສັດຕູ,  ໃນນັ້ນ ຕ້ອງເພີ່ມທະວີຮັດແໜ້ນຄວາມສາມັກຄີແບບພິເສດ ແລະ ການຮ່ວມມືຮອບດ້ານກັບ ສສ. ຫວຽດນາມ, ການເປັນຄູ່ຮ່ວມສະຕາກໍາກັບ ສປ ຈີນ. ພ້ອມກັນນັ້ນ ຕ້ອງເປີດກວ້າງການພົວພັນຮ່ວມມື ກັບພາຍນອກອື່ນໆ ບົນຈິດໃຈຮັບປະກັນຄວາມເປັນເອກະລາດ, ເປັນເຈົ້າຕົນເອງທາງດ້ານການເມືອງ ແລະ ເສີມຂະຫຍາຍທ່າແຮງຂອງຕົນທາງດ້ານເສດຖະກິດ ເພື່ອບໍ່ໃຫ້ຕ່າງປະເທດດູໝິ່ນປະໝາດພວກເຮົາ; ຕ້ອງກໍາແໜ້ນ ແລະ ຍຶດໝັ້ນໃນຈຸດໝາຍທີ່ວ່າ ວຽກງານການຕ່າງປະເທດຂອງພວກເຮົາ ແມ່ນເພື່ອສ້າງສະພາບແວດລ້ອມອໍານວຍໃຫ້ແກ່ການປົກປັກຮັກສາ-ສ້າງສາພັດທະນາລະບອບໃໝ່ ແລະ ເພີ່ມກໍາລັງແຮງໃຫ້ປະເທດຊາດ,ເຮັດໃຫ້ຊີວິດການເປັນຢູ່ຂອງປະຊາຊົນບັນດາເຜົ່ານັບມື້ດີຂຶ້ນເປັນ ກ້າວໆ, ຕ້ານການຫັນປ່ຽນມ້າງເພຂອງບັນດາອິດທິກໍາລັງປໍລະປັກ ເພື່ອປະກອບສ່ວນກັບບັນດາປະຊາຊາດໃນພາລະກິດສັນຕິພາບ, ເອກະລາດແຫ່ງຊາດ, ປະຊາທິປະໄຕ ແລະ ຄວາມກ້າວໜ້າທາງສັງຄົມ.
ບັນດາສະຫາຍ, ເພື່ອນມິດທີ່ຮັກແພງ!
ຕະຫຼອດໄລຍະຂອງການປະຕິວັດ, ປະທານ ຄຳໄຕ ສີພັນດອນ ໄດ້ຮ່ວມກັບໝູ່ສະຫາຍ ເປັນເຈົ້າການນຳພາ, ບັນຊາກໍາລັງປະກອບອາວຸດ ແລະ ປະຊາຊົນບັນດາເຜົ່າດໍາເນີນການຕໍ່ສູ້ ເພື່ອປົດປ່ອຍປະເທດຊາດ, ປະຕິບັດ 2 ໜ້າທີ່ຍຸດທະສາດ ຢ່າງເດັດດ່ຽວໜຽວແໜ້ນ, ນໍາພາປະເທດຊາດຜ່ານຜ່າຄວາມຫຍຸ້ງຍາກ, ທັບມ້າງສິ່ງກີດຂວາງຕ່າງໆ ແລະ ກ້າວຂຶ້ນຕາມເສັ້ນທາງທີ່ພັກເຮົາໄດ້ກໍານົດໄວ້ຢ່າງມີໄຊ.
ປັດຈຸບັນ ເຖິງວ່າເພິ່ນຈະມີອາຍຸສູງ ແຕ່ເພິ່ນກໍຍັງມີຄວາມເປັນຫ່ວງເປັນໃຍ ແລະ ເອົາໃຈໃສ່ຕິດຕາມຢ່າງຈົດຈໍ່ ຕໍ່ການນໍາພາ ຂອງພັກ, ການຄຸ້ມຄອງ-ບໍລິຫານ ຂອງລັດ, ຍາມໃດເພິ່ນກໍບໍ່ລົດລະໃນການໃຫ້ຄຳແນະນຳທີ່ເປັນປະໂຫຍດແກ່ປະເທດຊາດ, ແກ່ພັກ, ແກ່ການປະຕິວັດ ແລະ ຄວາມຢູ່ດີກິນດີ ຂອງປະຊາຊົນລາວບັນດາເຜົ່າ.
ເນື່ອງໃນໂອກາດວັນເກີດ ປະທານ ຄຳໄຕ ສີພັນດອນ ຄົບຮອບ 100 ປີນີ້, ພັກ-ລັດ ແລະ ປວງຊົນລາວທັງຊາດ ຂໍສັນລະເສີນ ແລະ ເຊີດຊູກຽດຕິຄຸນ,ຈົດຈໍາຄຸນງາມຄວາມດີອັນໃຫຍ່ຫຼວງ, ການ ອຸທິດຕົນ ແລະ ຄວາມເສຍສະຫຼະທຸກສິ່ງທຸກຢ່າງ ເພື່ອປະເທດຊາດ ກໍຄືພາລະກິດປະຕິວັດ ຂອງພັກເຮົາ; ທົ່ວພັກ, ທົ່ວລັດ, ທົ່ວກໍາລັງປະກອບອາວຸດ ແລະ ທົ່ວປວງຊົນລາວທັງຊາດ ເຫັນແຈ້ງ ຕໍ່ໜ້າທີ່ ແລະ ຄວາມຮັບຜິດຊອບການເມືອງ ຂອງຕົນ, ຈະເພີ່ມທະວີຄວາມສາມັກຄີກັນ ເປັນປຶກແຜ່ນ ແໜ້ນໜາ ໃນທົ່ວພັກ ແລະ ທົ່ວປວງຊົນທັງຊາດ, ຕັ້ງໜ້າຮ່ຳຮຽນເອົາຄຸນສົມບັດສິນທໍາປະຕິວັດ, ແບບແຜນເຮັດວຽກ-ແບບແຜນດໍາລົງຊີວິດ, ແນວຄິດຊີ້ນຳ ຂອງປະທານ ຄໍາໄຕ ສີພັນດອນ ເຂົ້າໃນການສືບທອດ ແລະ ເສີມຂະຫຍາຍ ພາລະກິດປະຕິວັດ ຂອງເພິ່ນ ກໍຄື ຂອງພັກປະຊາຊົນປະຕິວັດລາວ ທີ່ມີກຽດສະຫງ່າ ໃຫ້ໄດ້ຮັບໝາກຜົນສູງຂຶ້ນເລື້ອຍໆ!
ຂໍອວຍພອນໄຊ ແດ່ປະທານ ຄໍາໄຕ ສີພັນດອນ ຈົ່ງມີສຸຂະພາບແຂງແຮງ, ມີອາຍຸໝັ້ນຂວັນຍືນ, ເປັນຮົ່ມໂພຮົ່ມໄຊ ໃຫ້ປະເທດຊາດບ້ານເມືອງ ຂອງພວກເຮົາຕໍ່ໆໄປ.
ອວຍພອນບັນດາທ່ານ ບັນດາສະຫາຍທັງຫຼາຍ ຈົ່ງມີພະລານາໄມສົມບູນ ແລະ ມີຜົນສຳເຫຼັດໃນໜ້າທີ່ການງານຂອງຕົນ. (ຂໍຂອບໃຈ)