ທ່ານ ນາງ ວັນມະນີ ພິມມະສານ ຫົວໜ້າພະແນກອຸດສາຫະກຳ ແລະ ການຄ້າ ນະຄອນຫຼວງວຽງຈັນ (ນວ) ໄດ້ກ່າວວ່າ: ການຈຳໜ່າຍສິນຄ້າທັງພາຍໃນ ແລະ ຕ່າງປະເທດໃຫ້ປະຊາຊົນຊາວ ນວ ແລະ ແຂກຕ່າງປະເທດໄດ້ເຫັນ ແລະ ໄດ້ຊົມໃຊ້ສິນຄ້າຢູ່ພາຍໃນງານບຸນນະມັດສະການພະທາດຫຼວງ, ພ້ອມທັງເປັນການແລກປ່ຽນບົດຮຽນ ແລະ ປະສົບການຕ່າງໆຂອງບັນດາຫົວໜ່ວຍທຸລະກິດດ້ວຍກັນ ແລະ ເພື່ອເປັນການສົ່ງເສີມການທ່ອງທ່ຽວປະກອບສ່ວນໃນການຊຸກຍູ້ການຜະລິດພາຍໃນ, ຊົມໃຊ້ສິນຄ້າຜະລິດໄດ້ພາຍໃນໃຫ້ກວ້າງຂວາງ, ສ້າງຈິດໃຈຊາດຊົມໃຊ້ຜະລິດຕະພັນພາຍໃນໃຫ້ຫຼາຍຂຶ້ນ, ທັງເປັນການຊົມເຊີຍຜົນສໍາເລັດຂອງກອງປະຊຸມໃຫຍ່ຄັ້ງທີ VIII ຂອງອົງຄະນະພັກ ນວ ຄະນະຮັບຜິດຊອບໄດ້ກຳນົດການຈັດງານວາງສະແດງລະຫວ່າງວັນທີ 1-5 ພະຈິກ 2025 ຢູ່ທີ່ເດີ່ນສະໜາມຫຼວງພະທາດຫຼວງ ແລະ ລະຫວ່າງວັນທີ 1-9 ພະຈິກ ຢູ່ສູນການຄ້າ ລາວ-ໄອເຕັກ. ພ້ອມທັງໄດ້ກຳນົດເອົາວັນທີ 1 ພະຈິກ 2025 ເປັນພິທີເປີດງານວາງສະແດງ ແລະ ຈໍາໜາຍສິນຄ້າ ເປັນທາງການ.
ທ່ານ ນາງ ວັນມະນີ ພິມມະສານ ຕື່ມວ່າ: ສໍາລັບເຂດສະໜາມຫຼວງ ແລະ ເດີ່ນພະທາດຫຼວງແບ່ງອອກເປັນ 6 ຈຸດຈັດສັນຕາມແຜນຜັງທີ່ໄດ້ຮັບຮອງ ແລະ ຮ້ານວາງສະແດງສິນຄ້າໂອດ໊ອບ, ຄອບຄົວຕົວແບບ, ສິນຄ້າອຸດສາຫະກໍາ, ສິນຄ້າການບໍລິການທີ່ຮູບແບບທັນສະໄໝ, ມີບູດການວາງສະແດງປະຫວັດຄວາມເປັນມາຂອງນະຄອນຫຼວງວຽງຈັນ ຄົບຮອບ 465 ປີ, ວາງສະແດງທາງດ້ານວັດທະນະທໍາເປັນຈຸດເດັ່ນຂອງງານ. (ຢູ່ໃນຈຸດເດີ່ນສະໜາມຫຼວງ); ສໍາລັບຈຸດອື່ນໆ ກໍມີກິດຈະກໍາການຄ້າຂາຍສິນຄ້າ, ການບໍລິການອາຫານ, ເຄືອງຫຼິ້ນສໍາລັບເດັກ ແລະ ກິດຈະກໍາອື່ນໆ ແລະ ສັງລວມແລ້ວ ໃນງານບຸນນະມັດສະການພະທາດຫຼວງປີນີ້ຄາດວ່າຈະມີຈໍານວນຫ້ອງວາງສະແດງ ແລະ ຈໍາໜ່າຍສິນຄ້າຈໍານວນ 2,170 ຫ້ອງ, ສະເພາະເດີ່ນສະໜາມຫຼວງພະທາດຫຼວງ, ພື້ນທີ່ຮອບນອກອ້ອມສະໜາມຫຼວງ ແລະ ພະທາດຫຼວງ.
ສໍາລັບ ພື້ນທີ່ວາງສະແດງສິນຄ້າດ້ານໃນຕຶກເກົ່າສູນການຄ້າລາວ-ໄອເຕັກແມ່ນຂາຍສິນຄ້າຫຼາຍປະເພດ. ຂອງບໍລິສັດ ຂາອອກ-ຂາເຂົ້າ, ສິນຄ້າທົ່ວໄປ, ສິນຄ້າ ໄອທີ, ສິນຄ້າ ODOP ແລະ SME, ສິນຄ້າ ເຟີນິເຈີ, ສິນຄ້າຂອງບັນດາປະເທດອາຊຽນ, ການໂຊລົດຈັກ ແລະ ລົດໃຫຍ່ ແລະ ຈຸດບໍລິການອາຫານສາມາດຮອງຮັບໄດ້ ຈໍານວນ 200 ຮ້ານ, ສໍາລັບພື້ນທີ່ດ້ານນອກຂອງອາຄານລານຈອດລົດດ້ານໜ້າສູນການຄ້າລາວ-ໄອເຕັກ ໄດ້ມີກິດຈະກໍາເຄືອງຫຼິ້ນສໍາລັບເດັກຕ່າງໆ ເພື່ອເປັນສີສັນຂອງງານ. ສໍາລັບເດີ່ນດ້ານນອກອາຄານມີການຕົບແຕ່ງປະຕູໂຂງເຂົ້າງານ ແລະ ກໍານົດຈຸດຖ່າຍຮູບພາຍໃນງານ.
ຄໍາເຫັນ