ບຸນຊ່ວງເຮືອ ນະຄອນຫຼວງພະບາງປີນີ້ ຈະແບ່ງເປັນສອງສາຍ ເຮືອປະເພນີ ແລະ ເຮືອກິລາ

ສຳລັບປີນີ້, ຈະໄດ້ຈັດງານຢ່າງຍິ່ງໃຫຍ່ເຕັມຮູບແບບ ໂດຍເນັ້ນເຖິງຄວາມເປັນວັດທະນະທຳ, ເອກະລັກສະເພາະ ແລະ ປະເພນີອັນດີງາມ ຂອງຊາວນະຄອນ ຫຼວງພະບາງ ຄາດວ່າຈະແບ່ງການແຂ່ງຂັນ ເຮືອອອກເປັນສອງປະເພດຄື: ເຮືອປະເພນີ ຄາດວ່າຈະມີ 14 ລໍາ, ເຮືອກິລາ ຄາດວ່າຈະມີ 17 ລໍາ ຊຶ່ງມາຈາກບັນດາບ້ານ, ຕາແສງ, ເມືອງ, ແຂວງອ້ອມຂ້າງ, ຫົວໜ່ວຍທຸລະກິດພາຍໃນ ແລະຕ່າງແຂວງ ເຂົ້າຮ່ວມການແຂ່ງຂັນ. ປັດຈຸບັນ ຄະນະຮັບຜິດຊອບໄດ້ກຳນົດລາຍການເຄື່ອນໄຫວບຸນ ແຕ່ວັນທີ 1 ຫາ 11 ກັນຍາ 2026, ໃນນັ້ນ ວັນທີ 1 ກັນຍາ ຈະມີງານຕະຫຼາດນັດວາງສະແດງສິນຄ້າ ທີ່ເດີ່ນທາດຫຼວງ, ວັນທີ 5 ຈັດບຸນຊ່ວງເຮືອ ປະເພດ 12 ສີພາຍ ທີ່ຍື່ງຄານ ບ້ານຫາດຮ່ຽນ, ວັນທີ 9 ກັນຍາ ຈັດບຸນຊ່ວງເຮືອ ປະເພດ 12 ສີພາຍ ທີ່ຍື່ງດົງ ບ້ານສັງຄະໂລກ, ວັນທີ 10 ກັນຍາ ຕອນເຊົ້າ ຈະມີການໂລະລາດ ຫຼື ລົງຕະຫຼາດນັດແບບມວນຊົນ ຕາມເສັ້ນທາງສີສະຫວ່າງວົງ ເລີ້ມແຕ່ສາມແຍກບ້ານຈູມຄ້ອງ ຫາ ເດີ່ນທາດຫຼວງ, ວັນທີ 11 ກັນຍາ ຕອນເຊົ້າ ຈັດພິທີໃສ່ບາດແດ່ພະສົງ-ສາມະເນນ ເພື່ອເປັນສິລິມຸງຄຸນ ຢູ່ຕາມວັດ, ຈາກນັ້ນ ຈະເຕົ້າໂຮມການນໍາພັກ - ລັດ, ແຂກຮັບເຊີນທັງພາຍໃນ ແລະຕ່າງປະເທດ, ຕະຫຼອດຮອດປະຊາຊົນບັນດາເຜົ່າ ຢູ່ສອງຝາກຝັ່ງຍື່ງຄານ ເພື່ອຊົມການແຂ່ງຂັນ ຊ່ວງເຮືອຕາມຮີດຄອງປະເພນີ ຈົນສຳເລັດການແຂ່ງຂັນ; ໂອກາດນີ້ ທ່ານໄດ້ເຊີນຊວນ ບັນດານັກທ່ອງທ່ຽວ, ປະຊາຊົນບັນດາເຜົ່າທັງພາຍໃນ ແລະຕ່າງປະເທດ, ທຸກຊັ້ນຄົນໃນສັງຄົມ ພ້ອມກັນເຂົ້າຮ່ວມ ແລະມີສ່ວນຮ່ວມ ໃນງານບຸນຫໍ່ເຂົ້າປະດັບດິນ ຊ່ວງເຮືອເດືອນເກົ້າ ປະຈຳປີ ພສ 2569, ຄສ 2026 ທີ່ນະຄອນ ຫຼວງພະບາງ ເມືອງມໍລະດົກໂລກ, ທັງຮຽກຮ້ອງໃຫ້ປະຊາຊົນ ບັນດາເຜົ່າ ແລະທຸກພາກສ່ວນ ພາຍໃນນະຄອນ ຫຼວງພະບາງ ຈົ່ງພ້ອມກັນເປັນເຈົ້າພາບ-ເປັນເຈົ້າການທີ່ດີ, ຮັກສາຄວາມສະຫງົບ, ຄວາມເປັນລະບຽບຮຽບຮ້ອຍ ໃນທົ່ວສັງຄົມ, ເປັນເຈົ້າການທາງດ້ານການບໍລິການ, ການຮັກສາຄວາມສະອາດ ແລະຖືໂອກາດນີ້ສະແດງຄວາມຂອບໃຈລ່ວງໜ້າ ຕໍ່ການມີສ່ວນຮ່ວມ ໃນການປະກອບສ່ວນ ທາງດ້ານເຮື່ອແຮງ, ທຶນຮອນ, ວັດຖຸປັດໃຈຂອງທຸກພາກສ່ວນ ເຂົ້າໃນການຈັດງານບຸນຫໍ່ເຂົ້າປະດັບດິນ ຊ່ວງເຮືອເດືອນເກົ້າໃນຄັ້ງນີ້ ໃຫ້ປະສົບຜົນສຳເລັດຢ່າງຈົບງາມ.

ຂ່າວ-ພາບ: ອາພຸດເດດ ບຸບຜາ