ຈາກ​ເຂົ້າ​ຂອງ​ເຄື່ອງ​ໃຊ້​ສຳ​ລັບ​ບຸນ​ກຸດ​ຈີນ​ຂອງ​ປະ​ຊາ​ຊົນ​ເຫັນ​ໄດ້​ເຖິງຄວາມ​ໂອບ​ເອື້ອ​ອາ​ລີ​ ແລະ ຄວາມ​ປາ​ຖະ​ໜາ​ອັນ​ແຮງ​ກ້າ​ທີ່​ສຸດ ຂອງ​ທ່ານ​ ສີ​ຈິ້ນ​ຜິງ

“ມື້ນີ້ແມ່ນບຸນສ້ຽວນຽນຂອງພາກເໜືອ, ຂ້າພະເຈົ້າມາສະຫຼອງບຸນສ້ຽວນຽນເພື່ອຕ້ອນຮັບປີໃໝ່ຮ່ວມກັບບັນດາສະຫາຍເປັນການສະເພາະ. ເມື່ອໄດ້ເຫັນວ່າມີຄົນມາທ່ຽວທີ່ແຫ່ງນີ້ຢ່າງຄັບຄາໜາແໜ້ນທ່າມກາງບັນຍາດສະຫຼອງບຸນປີໃໝ່ຢ່າງເບີກບານມ່ວນຊື່ນ, ສິນຄ້າສຳລັບບຸນກຸດຈີນມີການສະໜອງຢ່າງພຽງພໍ, ຮູ້ສຶກດີໃຈຫຼາຍ.”

ສ້ຽວນຽນ ເປັນວັນບຸນປະເພນີພື້ນເມືອງທີ່ຊາວຈີນເລີ່ມກຽມສະຫຼອງປີໃໝ່.

ວັນທີ 10 ກຸມພາ 2026 ພໍດີກົງກັບມື້ແຮມ 8 ຄ່ຳເດືອນ 12 ເປັນບຸນສ້ຽວນຽນຕາມຈັນທະຄະຕິຈີນ, ຕະຫຼາດນັດບຸນກຸດຈີນຢູ່ຕໍ່ໜ້າຕຶກໂຫຼງຟູເຂດຖະໜົນວັດໂຫຼງຟູນະຄອນຫຼວງປັກກິ່ງ ໄດ້ດຶງດູດຊາວເມືອງ ແລະ ນັກທ່ອງທ່ຽວມາທ່ຽວເປັນຈຳນວນຫຼວງຫຼາຍ. ທ່ານ ສີຈິ້ນຜິງ ໄດ້ກວດເບິ່ງຫ້າງຮ້ານຂາຍສິນຄ້າສຳລັບບຸນກຸດຈີນປະເພດຕ່າງໆດ້ວຍຄວາມສົນໃຈ ພ້ອມທັງໂອ້ລົມສົນທະນາກັບປະຊາຊົນຢ່າງສະໜິດສະໜົມ. ເພິ່ນໄດ້ເລົ່າສູ່ຟັງເລື່ອງຕົນມາທ່ຽວວັດໂຫຼງຟູຫຼາຍເທື່ອໃນເຍົາໄວ ແລະ ຍັງໄດ້ຊື້ອາຫານທີ່ມີເອກະລັກພິເສດ ແລະ ຜະລິດຕະພັນນະວັດຕະກຳວັດທະນະທຳຈຳນວນໜຶ່ງໃນຕະຫຼາດນັດດັ່ງກ່າວ.

ການກະກຽມເຂົ້າຂອງເຄື່ອງໃຊ້ສຳລັບບຸນກຸດຈີນ ເປັນສິ່ງສຳຄັນຫຼາຍສຳລັບຄົນຈີນສະຫຼອງບຸນປີໃໝ່. ໃນການລົງເຄື່ອນໄຫວຢ້ຽມຢາມທ້ອງຖິ່ນກ່ອນບຸນກຸດຈີນໃກ້ຈະວຽນມາເຖິງໃນແຕ່ລະປີ, ສະພາບການສະໜອງສິນຄ້າບໍລິໂພກສະຫຼອງບຸນກຸດຈີນເປັນສິ່ງທີ່ທ່ານ ສີຈິ້ນຜິງ ໄດ້ເອົາໃຈໃສ່ຕິດຕາມເລື້ອຍໆ.

ໃນຫຼາຍປີຜ່ານມານີ້, ທ່ານ ສີຈິ້ນຜິງ ເຄີຍໄປເຄື່ອນໄຫວຢ້ຽມຢາມງານວາງສະແດງສິນຄ້າບຸນກຸດຈີນຕາມເຂດຖະໜົນນະຄອນຄຸນມິງ ແຂວງຢູນນານ, ຮ້ານຊັບພະສິນຄ້າອາຫານສົດເຫີລີ້ ເມືອງກ່ວນຊ່ານຫູ ນະຄອນກຸ້ຍຢາງ ແຂວງກຸ້ຍໂຈ່ວ, ຮ້ານຂາຍສິນຄ້າເອກະລັກພິເສດຂອງເມືອງບູຮານຜິງຢາວແຂວງຊ່ານຊີ່ ແລະແຫ່ງອື່ນໆ, ການສະໜອງ ແລະ ການຈຳໜ່າຍສິນຄ້າສຳລັບບຸນກຸດຈີນ, ລາຄາສິນຄ້າ, ຄວາມປອດໄພຂອງອາຫານ ແລະ ອື່ນໆ ລ້ວນແຕ່ເປັນສິ່ງທີ່ທ່ານ ສີຈິ້ນຜິງ ໄດ້ເອົາໃຈໃສ່ເປັນພິເສດໃນການຢ້ຽມຢາມທ້ອງຖິ່ນ. ເພີ່ນມີຄຳຊີ້ນຳວ່າ: “ກະຕ່າຜັກຊີ້ນ’, ຖົງເຂົ້າ, ຈານໝາກໄມ້ ລ້ວນແຕ່ເປັນສິ່ງສຳຄັນທີ່ຕິດພັນກັບຊີວິດການເປັນຢູ່ຂອງປະຊາຊົນ.” “ຕ້ອງເອົາໃຈໃສ່ຄວາມສະອາດຂອງອາຫານ, ຕິດເວລາການຜະລິດຢ່າງຈະແຈ້ງ, ບໍ່ໃຫ້ຂາຍຜະລິດຕະພັນອາຫານທີ່ໝົດອາຍຸ.” “ປັດຈຸບັນ, ສິນຄ້າຕ່າງໆມີຢ່າງອຸດົມສົມບູນ, ການກິນເຂົ້າສາມັກຄີສະຫຼອງບຸນກຸດຈີນຍິ່ງຄວນເຮັດໃຫ້ທຸກຄົນກິນດີ ແລະ ກິນຢ່າງມີສຸຂະພາບແຂງແຮງ”…

ເມື່ອທົບທວນຄືນການເຄື່ອນໄຫວຢ້ຽມຢາມທ້ອງຖິ່ນຂອງທ່ານ ສີຈິ້ນຜິງ ໃນໄລຍະບຸນກຸດຈີນຫຼາຍປີຜ່ານມາ ຈະເຫັນໄດ້ວ່າບໍ່ວ່າຈະໄປຮອດບ່ອນໃດ, ເພິ່ນໄດ້ມີຄວາມຫ່ວງໃຍຕະຫຼອດວ່າ: ຊີວິດການເປັນຢູ່ຂອງປະຊາຊົນເປັນຄືແນວໃດ? ເຂົ້າຂອງເຄື່ອງໃຊ້ສຳລັບສະຫຼອງບຸນປີໃໝ່ໄດ້ຈັດຊື້ໃຫ້ຄົບແລ້ວບໍ່? ເຂົາເຈົ້າຈະສາມາດສະຫຼອງບຸນປີໃໝ່ເປັນຢ່າງດີໄດ້ ຫຼື ບໍ່?

ຍົກຕົວຢ່າງ: ຕອນເພິ່ນເມືອຢາມບ້ານຫຼຽງເຈ່ຍເຫີ ທາງພາກເໜືອແຂວງສ້ານຊີ່ ຊຶ່ງເປັນບ່ອນທີ່ຕົນເຄີຍລົງພື້ນຖານດຳລົງຊີວິດ ແລະ ອອກແຮງງານເປັນເວລາ 7 ປີຕອນເປັນໄວໜຸ່ມ, ທ່ານ ສີຈິ້ນຜິງ ໄດ້ມອບເຂົ້າຂອງເຄື່ອງໃຊ້ສຳລັບບຸນກຸດຈີນທີ່ຈັດຊື້ດ້ວຍເງິນຂອງຕົນເອງນັ້ນໃຫ້ຊາວບ້ານທັງຫຼາຍ; ຢູ່ບ້ານເສີນຊ່ານເມືອງຈິງກ່າງຊ່ານ ແຂວງຈ່ຽງຊີ, ເພິ່ນໄດ້ສົ່ງເຄື່ອງບໍລິໂພກສຳລັບບຸນກຸດຈີນໄປໃຫ້ຜູ້ທຸກຍາກ, ມອບກະເປົາໜັງສືໃຫ້ລູກຫຼານຊາວບ້ານທັງຫຼາຍ, ພ້ອມທັງອອຍພອນໃຫ້ຊາວບ້ານທຸກໆຄອບຄົວຈົ່ງສະຫຼອງບຸນປີໃໝ່ດ້ວຍດີ; ໃນເວລາຢ້ຽມຢາມເຮືອນຊາວບ້ານຜູ້ທຸກຍາກຂອງບ້ານເຕີເຊີ້ງ ເມືອງຈ່າງເປີຍ ນະຄອນຈ່າງເຈ່ຍໂຂ້ວແຂວງເຫີເປີຍ, ເພິ່ນໄດ້ຊິມ “ເຂົ້າໜົມອ້າປາກ” ທີ່ຈືນດ້ວຍນ້ຳມັນພ້ອມທັງຍ້ອງວ່າແຊບຫຼາຍ…

ວັນທີ 26 ມັງກອນ 2022, ທ່າມກາງຫິມະ ແລະ ລົມໜາວເຢັນ, ທ່ານ ສີຈິ້ນຜິງ ໄດ້ເດີນທາງໄປເຖິງບ້ານເຝີງນານຢວນ ຕາແສງຊືຈ່ວງ ເມືອງໂຮ້ໂຈ່ວ ນະຄອນຫຼິນເຝິນ ແຂວງຊ່ານຊີທາງພາກເໜືອຂອງຈີນ, ເພື່ອສຳຫຼວດກວດເບິ່ງສະພາບການສ້າງສາຄືນໃໝ່ຫຼັງໄພນ້ຳຖ້ວມທີ່ເກີດຂຶ້ນໃນລະດູໃບໄມ້ຫຼົ່ນປີຜ່ານມາ.

ຢູ່ເຮືອນຂອງລຸງ ຊືຫົງປິ່ງຊາວບ້ານບ້ານເຝີງນານຢວນ, ທ່ານ ສີຈິ້ນຜິງ ໄດ້ກວດກາເບິ່ງສະພາບການກະກຽມເຂົ້າຂອງເຄື່ອງໃຊ້ສຳລັບບຸນກຸດຈີນຢູ່ຫ້ອງມ້ຽນເຄື່ອງ, ເຮືອນຄົວ ແລະແຫ່ງຕ່າງໆ, ເມື່ອເປີດຕູ້ເຢັນໄດ້ເຫັນຜັກ, ໄກ່, ຊີ້ນຕ່າງໆເຕັມຕູ້, ເປີດຝາອັດໝໍ້ໄດ້ເຫັນເຂົ້າໜົມປີໃໝ່ທີ່ສົດໆຮ້ອນໆຫາກໍ່ໜຶ້ງໃໝ່ໆ ເຊິ່ງເປັນອາຫານພື້ນເມືອງສຳລັບກຽມສະຫຼອງປີໃໝ່ຂອງທ້ອງຖິ່ນ.

ຕອນອອກຈາກເດີ່ນບ້ານຂອງລຸງຊືຫົງປິ່ງ, ທ່ານ ສີຈິ້ນຜິງ ໄດ້ເວົ້າກັບຊາວບ້ານທີ່ຍ່າງອ້ອມເຂົ້າມາວ່າ: “ເມື່ອໄດ້ເຫັນເຮືອນສ້າງໃໝ່ຢູ່ໃນບ້ານພວກສະຫາຍມີຄຸນນະພາບດີຫຼາຍ, ເງິນອຸດໜູນກໍໄດ້ແຈກຢາຍໃຫ້ຊາວບ້ານຢ່າງທົ່ວເຖິງ, ປະຊາຊົນທຸກຄົວເຮືອນກຽມເຄື່ອງບໍລິໂພກສະຫຼອງບຸນກຸດຈີນໄດ້ຢ່າງພຽງພໍການສະຫຼອງບຸນປີໃໝ່ມີບັນຍາກາດອັນເຂັ້ມຂຸ້ນ, ຂ້າພະເຈົ້າຮູ້ສຶກພູມໃຈຫຼາຍ.”

ທ່ານ ສີຈິ້ນຜິງ ເຄີຍກ່າວຢ່າງດູດດື່ມຕໍ່ປະຊາຊົນໃນເວລາລົງເຄື່ອນໄຫວຢ້ຽມຢາມທ້ອງຖິ່ນວ່າ: “ຄວາມປາຖະໜາອັນແຮງກ້າທີ່ສຸດຂອງຂ້າພະເຈົ້າກໍຄື ໃຫ້ທຸກຄົນສາມາດສະຫຼອງບຸນປີໃໝ່ຢ່າງເບີກບານມ່ວນຊື່ນ.”ເທື່ອນີ້, ຢູ່ເຂດຖະໜົນວັດໂຫຼງຟູນະຄອນຫຼວງປັກກິ່ງ, ເພິ່ນໄດ້ໃຫ້ຄຳຊີ້ນຳວ່າ: “ການສະຫຼອງບຸນປີໃໝ່ເວົ້າສຳລັບປະຊາຊົນແລ້ວແມ່ນເລື່ອງສຳຄັນຫຼາຍ, ຄະນະພັກ ແລະ ອົງການປົກຄອງທຸກຂັ້ນຕ້ອງເຮັດວຽກການຮັບປະກັນຊີວິດການເປັນຢູ່ຂອງປະຊາຊົນ ແລະ ການຜະລິດຢ່າງປອດໄພໃຫ້ດີຢ່າງແທ້ຈິງ ເພື່ອຮັບປະກັນໃຫ້ປະຊາຊົນທັງຫຼາຍສະຫຼອງບຸນປີໃໝ່ຢ່າງເບີກບານມ່ວນຊື່ນ.”

ກ່ອນບຸນກຸດຈີນໃກ້ຈະໝູນວຽນມາເຖິງ, ທ່ານ ສີຈິ້ນຜິງ ລົງເຄື່ອນໄຫວສຳຫຼວດຕະຫຼາດນັດບຸນກຸດຈີນ, ເອົາໃຈໃສ່ນຳການຂາຍສິນຄ້າສຳລັບບຸນກຸດຈີນຂອງປະຊາຊົນ ຊຶ່ງສະແດງໃຫ້ເຫັນເຖິງຄວາມຫ່ວງໃຍຂອງເພິ່ນທີ່ມີຕໍ່ຄວາມຜາສຸກຂອງປະຊາຊົນ ແລະ ການມີຄວາມຮູ້ສຶກວ່າໄດ້ຮັບຜົນປະໂຫຍດແລະມີຄວາມສຸກຂອງປະຊາຊົນນັບເປັນລ້ານຄອບຄົວ.

ໂດຍ: ຊີອາໄອ