 |
ຊຶ່ງມີ 5 ກິດຈະກໍາໃຫຍ່ ຄື: ກິດຈະກໍາສິລະປະບັນເທີງ ແລະ ກິລາ, ການຄົບງັນແມ່ນເລີ່ມແຕ່ວັນທີ 19 - 28 ຕຸລາ 2026, ມີການສະແດງດົນຕີໂຟກຊອງ, ການສະແດງສິລະປະ, ງານຄອນເສີດ ຢູ່ສວນສາທາລະນະແຄມຂອງ, ໜັງປະຫຼັດຕື້, ໝໍລຳເລື້ອງ, ໝໍລຳໃຕ້. ໃນມື້ແຂ່ງເຮືອຈະມີກອງເສັງ ແລະ ວົງດົນຕຣີພື້ນເມືອງ ເສບທີ່ທ່າສາລາຄໍາ. ສ່ວນການແຂ່ງຂັນກິລາຈະເລີ່ມແຕ່ວັນທີ 19 - 26 ຕຸລາ 2026 ລວມມີ 9 ປະເພດ ຄື: ກິລາ ດອກປີກໄກ່, ກະຕໍ້, ບານສົ່ງ, ບານບ້ວງ, ປິງປ່ອງ, ເປຕັງ, ກ໊ອຟ, ສະນຸກເກີ ແລະ ກິລາມວຍ.
ກິດຈະກໍາການປະດັບເອ້ ເຮືອໄຟປະເພນີ ແລະ ວຽນທຽນ, ການສະແດງເຮືອໄຟໂຄກ, ການໄຫຼເຮືອໄຟໜ້ານ້ໍາ, ການວຽນທຽນ ແຕ່ງກາຍດ້ວຍເສື້ອຜ້າອາພອນລາວເດີມ ເພື່ອເປັນການອະນຸລັກຮັກສາວັດທະນະທຳການນຸ່ງຖືຂອງລາວເຮົາ, ມີການປະດັບປະດາຫໍຫຼັກເມືອງ ເສັ້ນທາງບໍລິເວນງານໃຫ້ຮຸ່ງເຮືອງສວຍງາມ; ກິດຈະກໍາງານວັດທະນະທໍາບັນດາເຜົ່າ ເພື່ອຮັກສາຮີດຄອງປະເພນີ ເຂົ້າຮ່ວມງານບຸນປະເພນີຊ່ວງເຮືອ, ວັນທີ 26 ຕຸລາ 2026 ຕອນເຊົ້າເວລາ 7:30 ໂມງ - 9 ໂມງ, ມີພິທີໃສ່ບາດ, ຖວາຍສັງຄະທານ ທີ່ວັດຫຼວງປາກເຊ, ຕອນແລງເລີ່ມແຕ່ເວລາ 17 ໂມງ - 21 ໂມງ ຈະມີພີທີແຫ່ວຽນທຽນເນື່ອງໃນໂອກາດບຸນອອກພັນສາປະວໍລະ ນາ, ໃນນັ້ນ ຈະມີຂະບວນແຫ່ເຮືອໄຟໂຄກ, ຂະບວນແຫ່ຜາສາດເຜິ້ງ, ຂະບວນແຫ່ທຽນໄຊ, ຂະບວນພະສົງ - ເຖົ້າແກ່ແນວໂຮມ, ຂະບວນແຫ່ມວນຊົນ, ພະນັກງານ - ລັດຖະກອນ, ສະຖາບັນການສຶກສາ, ໂຮງຮຽນ, ຂະບວນແຫ່ກຸ່ມທະນາຄານ ແລະ ບໍລິສັດ ລວມທັງໝົດມີ 11 ຂະບວນໃຫຍ່, ປະກອບມີ 54 ກ້ອນກໍາລັງ ຄາດຄະເນຈໍານວນພົນເຂົ້າຮ່ວມຂະບວນແຫ່ທັງໝົດ 4,150 ຄົນ, ພະສົງ 108 ອົງ; ພາຍຫຼັງສໍາເລັດພິທີແຫ່ວຽນທຽນແລ້ວ ກໍມີການໄຫຼເຮືອໄຟໂຄກ, ເຮືອໄຟໜ້ານໍ້າ ແລະ ມີການຄົບງັນຕາມປະເພນີ.
 |
ກິດຈະກໍາວາງສະແດງ - ຈໍາໜ່າຍສິນຄ້າ ແລະ ຜົນງານປະດິດສ້າງ ຈະໄດ້ເປີດງານຢ່າງເປັນທາງການ ໃນວັນທີ 25 ຕຸລາ 2026 ທີ່ບໍລິເວນເດີ່ນຝາມໄຊ ສາລາຄໍາ, ພາຍໃນງານຈະມີສິນຄ້າໂອດັອບ 9 ຕົວເມືອງ, 1 ນະຄອນ ຕິດພັນກັບເສດຖະກິດເອກະລາດເປັນເຈົ້າຕົນເອງ (ສອຈ); ແຕ່ງກາຍຊຸດຊົນເຜົ່າຕ່າງໆ ຊຶ່ງໄດ້ມີການຈັດເປັນເຂດສະແດງຜົນງານປະດິດສ້າງ, ໂຮງຮຽນວິຊາຊີບ, ຮ້ານວາງສະແດງພາກສ່ວນຂອງລັດ, ພະ ແນກການ, ກົມກອງອ້ອມຂ້າງແຂວງ; ປີນີ້ ຄາດວ່າຈະເຊີນຕ່າງແຂວງນໍາເອົາສິນຄ້າມາຮ່ວມວາງສະແດງ ແລະ ຈໍາໜ່າຍ, ຊຶ່ງມີຮ້ານວາງສະແດງທ່ອງທ່ຽວ, ອາຫານພື້ນເມືອງ, ອາຫານຂອງພາກສ່ວນຜູ້ຈັດງານ ແລະ ການ ສະແດງດົນຕຣີໂຟກຊອງ. ຢູ່ບໍລິເວນອ້ອມຮອບບໍລິເວນງານບຸນຊ່ວງເຮືອຍັງມີຮ້ານຂາຍເຄື່ອງອື່ນໆຕື່ມອີກ.
ສຳລັບກິດຈະກໍາແຂ່ງຂັນຊ່ວງເຮືອຈະໄດ້ຈັດຂຶ້ນເປັນເວລາ 3 ວັນຄື: ວັນທີ 26 - 28 ຕຸລາ 2026. ໃນ ວັນທີ 26 ຕຸລາ 2026 ຈະມີການແຂ່ງຂັນຊ່ວງເຮືອກິລາ 12 ສີພາຍ (ຊາຍ), ເຮືອປະເພນີ 24 ສີພາຍ (ຊາຍ), ວັນທີ 27 ຕຸລາ 2026 ແຂ່ງຂັນ 3 ປະເພດ ແລະ ຊິງຊະນະເລີດທຸກປະເພດ ຄື: ເຮືອປະເພນີ 33 ສີຟາຍ (ຍິງ), ເຮືອກິລາ-ເຮືອສູດ 33 ສີພາຍ (ຊາຍ) ແລະ ຊ່ວງເຮືອປະເພນີ 55 ສີພາຍ (ຊາຍ) ແລະ ມີເຮືອເຊີ້ງໜ້ານ້ໍາ. ວັນທີ 28 ຕຸລາ 2026 ແມ່ນການແຂ່ງຂັນຊ່ວງເຮືອມິດຕະພາບ ລາວ, ໄທ, ກໍາປູເຈຍ ປະເພດເຮືອສູດ 55 ສີພາຍ ຊິງຂັນທ່ານນາຍົກລັດຖະມົນຕີ..
ການຈັດງານບຸນອອກພັນສາປະວໍລະນາ ຕິດພັນກັບບຸນຊ່ວງເຮືອປະເພນີ ທີ່ນະຄອນປາກເຊ ແຂວງຈຳປາສັກ ປີ 2026 ນີ້ໄດ້ຮັບການສະໜັບສະໜູນຈາກຫຼາຍພາກສ່ວນ ມາຮອດປັດຈຸບັນ ການຫ້າງຫາກະກຽມ ຈັດງານບຸນໄດ້ສໍາເລັດໄປສ່ວນໜຶ່ງແລ້ວ ແລະ ຈະໄດ້ສືບຕໍ່ຈັດຕັ້ງປະຕິບັດໃຫ້ໄດ້ຮັບຜົນສໍາເລັດຕາມລະດັບຄາດໝາຍ, ຮຽກຮ້ອງມາຍັງປະຊາຊົນ, ພະນັກງານ, ທະຫານ, ຕຳຫຼວດ, ຜູ້ປະກອບການທຸລະກິດ, ຜູ້ຈັດການ-ຜູ້ບໍລິການດ້ານຕ່າງໆ ທີ່ເຄື່ອນໄຫວຢູ່ນະຄອນປາກເຊ ກໍຄືແຂວງຈຳປາສັກ ຈົ່ງຮ່ວມແຮງ ຮ່ວມໃຈກັນເປັນເຈົ້າພາບ ເພື່ອເຮັດໃຫ້ການຈັດງານບຸນໃນຄັ້ງນີ້ສໍາເລັດຕາມແຜນການ, ມີຄວາມສະຫງົບ, ຄວາມເປັນລະບຽບຮຽບຮ້ອຍ, ສະອາດ ແລະ ຮັກສາສິ່ງແວດລ້ອມ. ຂ່າວ-ພາບ: ທູນທອງໃຈ
ຄໍາເຫັນ