ທ່ານ ສະເຕຟານ ດູຈາຣຣິກ ໂຄສົກເລຂາທິການ UN ກ່າວໃນກອງປະຊຸມຂ່າວປະຈຳວັນວ່າ: ຂໍ້ມູນຂອງ IOM ລະບຸວ່າເສັ້ນທາງທະເລຍັງຄົງເປັນໜຶ່ງໃນເສັ້ນທາງທີ່ອັນຕະລາຍທີ່ສຸດ, ໂດຍມີຜູ້ເສຍຊີວິດ ຫຼື ຫາຍສາບສູນໃນທະເລເມດີແຕຣາເນ ຈຳນວນ 2,185 ຄົນ ແລະ ອີກ 1,214 ຄົນ ໃນເສັ້ນທາງອາຟຣິກາຕາເວັນຕົກ/ມະຫາສະໝຸດອັດລັງຕິກ ໄປສູ່ໝູ່ເກາະຄານາຣີ.
ທ່ານ ດູຈາຣຣິກ ກ່າວວ່າ: ໃນຂະນະທີ່ໂຕເລກຫຼຸດລົງໃນແຕ່ລະປີ, ແຕ່ຈຳນວນຜູ້ເສຍຊີວິດທີ່ແທ້ຈິງອາດຈະສູງກວ່ານີ້ຫຼາຍ. ໂດຍໂຕເລກຂອງ IOM ສະແດງໃຫ້ເຫັນວ່າ ຈຳນວນຜູ້ເສຍຊີວິດໃນປີ 2025 ຕໍ່າກວ່າປີ 2024 ຊຶ່ງມີການບັນທຶກໄວ້ເກືອບ 9,200 ຄົນ.
ທ່ານ ເອມີ ໂປບ ຜູ້ອຳນວຍການໃຫຍ່ IOM ກ່າວໃນຖະແຫຼງການທີ່ເຜີຍແຜ່ຫວ່າງມໍ່ໆມານີ້ວ່າ: “ການເສຍຊີວິດຢ່າງຕໍ່ເນື່ອງໃນເສັ້ນທາງການເຄື່ອນຍ້າຍຖິ່ນຖານແມ່ນຄວາມລົ້ມເຫຼວທົ່ວໂລກທີ່ພວກເຮົາບໍ່ສາມາດຍອມຮັບໄດ້ວ່າເປັນເລື່ອງປົກກະຕິ.”
ທ່ານ ໂປບ ກ່າວຕື່ມວ່າ: ການເສຍຊີວິດເຫຼົ່ານີ້ບໍ່ແມ່ນເລື່ອງທີ່ຫຼີກລ່ຽງບໍ່ໄດ້ ຖ້າຫາກເສັ້ນທາງທີ່ປອດໄພບໍ່ສາມາດເຂົ້າເຖິງໄດ້, ຜູ້ຄົນຈະຖືກບັງຄັບໃຫ້ເລືອກເສັ້ນທາງທີ່ອັນຕະລາຍ ແລະ ຕົກຢູ່ໃນມືຂອງພວກຄ້າມະນຸດ. ພວກເຮົາຕ້ອງດຳເນີນການຂະຫຍາຍເສັ້ນທາງທີ່ປອດໄພ ແລະ ຖືກກົດໝາຍ ແລະ ຮັບປະກັນວ່າຜູ້ທີ່ຕົກທຸກໄດ້ຍາກຈະໄດ້ຮັບການປົກປ້ອງ, ໂດຍບໍ່ຄຳນຶງເຖິງສະຖານະພາບຂອງເຂົາເຈົ້າ.
IOM ລາຍງານຕື່ມອີກວ່າ: ທ່າອ່ຽງດັ່ງກ່າວຍັງຈະສືບຕໍ່ໄປໃນປີ 2026, ມາຮອດວັນທີ 24 ກຸມພາ ຜ່ານມາ ມີຈຳນວນຜູ້ເສຍຊີວິດຈາກການເຄື່ອນຍ້າຍໃນທະເລເມດີແຕຣາເນສູງເຖິງ 606 ຄົນ.
ຄໍາເຫັນ