 |
ທ່ານ ອາລຸນໄຊ ສູນນະລາດ ມີຄໍາເຫັນວ່າ: ກອງປະຊຸມສະຫຼຸບຕີລາຄາການປະຕິບັດວຽກງານບັ້ນເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V ຄັ້ງນີ້, ແມ່ນມີຄວາມສຳຄັນຫຼາຍ ເພາະວ່າ ຈະໄດ້ພ້ອມກັນລາຄາຄືນການຈັດຕັ້ງປະຕິບັດວຽກງານໃນໄລຍະຜ່ານມາ ຕາມ 4 ບາດກ້າວ ໃຫ້ເລິກເຊິ່ງ, ຖືກກັບຄວາມເປັນຈິງ ແລະ ເອກະພາບສູງ ຕໍ່ກັບໝາກຜົນໆງານທີ່ຍາດມາໄດ້ ເພື່ອສືບຕໍ່ເສີມຂະຫຍາຍ, ຍົກໃຫ້ເຫັນເຖິງດ້ານດີ, ຈຸດອ່ອນ, ຂໍ້ຄົງຄ້າງທີ່ຈະຕ້ອງປັບປຸງແກ້ໄຂ, ຊອກໃຫ້ເຫັນສາເຫດ ແລະ ບົດຮຽນທີ່ຖອດຖອນໄດ້ ເພື່ອຮັບປະກັນໃຫ້ການສະຫຼຸບມີເນື້ອໃນເລິກເຊິ່ງ, ຄົບຖ້ວນ ແລະ ເປັນເອກະພາບ ເພື່ອກະກຽມຄວາມພ້ອມຮອບດ້ານ ໃຫ້ແກ່ການເປີດກອງປະຊຸມຄັ້ງປະຖົມມະລຶກ ຂອງສະພາປະຊາຊົນແຂວງ ຊຸດທີ V ທີ່ຈະເປີດຂຶ້ນໃນຕົ້ນເດືອນເມສາ 2026 ນີ້ ໃຫ້ມີຜົນສໍາເລັດໃໝ່ໃຫຍ່ຫຼວງກວ່າເກົ່າ.
ຕໍ່ມາ, ທ່ານ ທິບພະສອນ ສະມາເລີກ ອະນຸກໍາມະການກອງເລຂານຸການ ກໍໄດ້ຜ່ານຮ່າງບົດສະຫຼຸບການກະກຽມ ແລະ ການດໍາເນີນບັ້ນເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V ຊຶ່ງຍົກໃຫ້ເຫັນສະພາບລວມ, ຕີລາຄາຜົນການຈັດຕັ້ງປະຕິບັດວຽກງານ ບາດກ້າວທີ 1 ຮອດບາດກ້າວທີ 3 ຕົ້ນຕໍແມ່ນວຽກງານເລຂານຸການ, ວຽກງານໂຄງປະກອບ ແລະ ບຸກຄະລາກອນ, ວຽກງານໂຄສະນາ, ປຸກລະດົມຂະບວນການ ແລະ ຍ້ອງຍໍ, ວຽກງານປ້ອງກັນຊາດ-ປ້ອງກັນຄວາມສະຫງົບ, ວຽກບໍລິຫານ, ພິທີການ ແລະ ງົບປະມານ. ພ້ອມນີ້ ຍັງຍົກໃຫ້ເຫັນສະພາບລວມໃນການດໍາເນີນການປ່ອນບັດເລືອກຕັ້ງ, ຜົນໄດ້ຮັບໃນການເລືອກຕັ້ງ ສສຊ - ສສຂ ແລະ ແຜນການຈັດຕັ້ງປະຕິບັດ ໃນບາດກ້າວທີ 4.
ຈາກນັ້ນ, ຜູ້ເຂົ້າຮ່ວມກອງປະຊຸມ ກໍໄດ້ຍົກສູງຄວາມຮັບຜິດຊອບການເມືອງ, ສຸມສະຕິປັນຍາ ແລະ ນຳເອົາບົດຮຽນຕົວຈິງ ຈາກການຊີ້ນຳຢູ່ນະຄອນ, ແຕ່ລະເມືອງ ແລະ ແຕ່ລະອະນຸກຳມະການ ມາປະກອບຄຳເຫັນຢ່າງສ້າງສັນ ແລະ ມີຈຸດສຸມ.
(ຂ່າວ-ພາບ: ທູນທອງໃຈ)
ຄໍາເຫັນ