ກາເຟ ແມ່ນພືດເສດຖະກິດທີ່ມີຕະຫຼາດກວ້າງ ແລະ ສາມາດນໍາໄປເຮັດເປັນສິນຄ້າຕ່າງໆໄດ້ຫຼາຍຮູບແບບເພື່ອສ້າງລາຍຮັບທີ່ໝັ້ນຄົງ ເພາະເຫັນໄດ້ວ່າທ່າແຮງ ດ້ານດີນຟ້າອາກາດເໝາະສົມ ຊຶ່ງສາມາດເປັນການສ້າງອາຊີບທີ່ຄົງທີ່ ໃຫ້ພໍ່ແມ່ປະຊາຊົນ. ທ່ານເຈົ້າແຂວງ ແລະ ຊ່ຽວຊານດ້ານການປູກກາເຟສະເພາະ ຈາກບໍລິສັດ ບໍ່ຄຳວັງຕັດ ໄດ້ນຳເອົາບົດຮຽນ ແລະ ເຕັກນິກ ດ້ານການປູກ, ການບົວລະບັດຮັກສາ ນັບທັງການໃຊ້ຝຸ່ນຄອກ ຊຶ່ງເປັນຄວາມຮູ້ພື້ນຖານ ແລະ ໄດ້ຍົກໃຫ້ພໍ່ແມ່ປະຊາຊົນໄດ້ຮັບຮູ້, ເຂົ້າໃຈ ເຖິງຄວາມສຳຄັນໃນການດໍາເນີນງານຢ່າງມີວິໄສທັດ ແລະ ມີພື້ນຖານທີ່ແຂງແຮງ ເພາະການນໍາເອົາບົດຮຽນ ແລະ ເຕັກນິກດ້ານການປູກ, ການບໍລິຫານການຜະລິດ, ການໃຊ້ຝຸ່ນຄອກອິນຊີນັ້ນ ແມ່ນສ່ວນສໍາຄັນທີ່ເຮັດໃຫ້ການປູກກາເຟມີປະສິດທິພາບ ແລະ ຍືນຍົງ.
ໂອກາດນີ້, ທ່ານເຈົ້າແຂວງ ພ້ອມຄະນະ ຍັງໄດ້ລົງສຳຫຼວດພື້ນທີ່ຕົວຈິງ ເພື່ອກະກຽມຈັດສັນໃຫ້ປະຊາຊົນຊາວເມືອງຊານໄຊ ໂດຍສະເພາະແມ່ນເຂດວັງຕັດ ໄດ້ເຮັດການຜະລິດ ປູກກາເຟ ແລະ ໄມ້ໃຫ້ໝາກອື່ນໆ ຢ່າງເປັນລະບົບ ເພື່ອເປັນສີນຄ້າສົ່ງອອກພາຍໃນ ແລະ ຕ່າງປະເທດ ຢ່າງແຂງແຮງ.
ທ່ານເຈົ້າແຂວງ ຍັງໄດ້ຮຽກຮ້ອງມາຍັງພໍ່ແມ່ປະຊາຊົນ ຈົ່ງມີຄວາມສະໝານສາມັກຄີ ຮັກສາມູນເຊື້ອອັນດີງາມ ຊ່ວຍເຫຼືອເຊິ່ງກັນ ແລະ ກັນ ແບ່ງປັນປະສົບການຄວາມຮູ້ໃຫ້ກັນ ແລະ ຈົ່ງສ້າງທຸກເງື່ອນໄຂໃຫ້ລູກຫຼານໄດ້ຮັບການສຶກສາຢ່າງທົ່ວເຖິງ, ຮ່ວມກັນປົກປັກຮັກສາ ແລະ ພັດທະນາບ້ານເມືອງ ໂດຍເລີ່ມຈາກການພັດທະນາຄອບຄົວ, ພັດທະນາດ້ານການຜະລິດກະສິກຳເປັນສີນຄ້າ ຕາມແຜນນະໂຍບາຍຂອງພັກ-ລັດ ໃຫ້ເກີດຜົນເປັນຈິງ.
(ຂ່າວ-ພາບ: ວິໄລສັກ ແກ້ວຫຼວງໂຄດ)
ຄໍາເຫັນ