 |
ກອງປະຊຸມດັ່ງກ່າວຈັດຂຶ້ນໃນວັນທີ 28 ກັນຍານີ້ ທີ່ ຫ້ອງວ່າການແຂວງໂດຍການເປັນປະທານຂອງ ທ່ານ ສົມສະອາດ ອຸ່ນສີດາ ປະທານຄະນະກຳມະການປົກຄອງແຂວງຄຳມ່ວນ, ມີບັນດາການນຳໃນຄະນະກຳມະການປະຈຳພັກແຂວງ, ກຳມະການພັກແຂວງ, ພະແນກການຂັ້ນແຂວງ, ຄະນະປົກຄອງ 3 ເມືອງ ແລະ ພາກສ່ວນກ່ຽວຂ້ອງເຂົ້າຮ່ວມ.
ກອງປະຊຸມ ໄດ້ຮັບຟັງ ຂໍ້ຕົກລົງແຕ່ງຕັ້ງຄະນະຊີ້ນຳ ແລະ ກອງເລຂາຊ່ວຍວຽກວາລະແຫ່ງຊາດດ້ານການພັດທະນາຊົນນະບົດ ແລະ ແກ້ໄຂຄວາມທຸກຍາກ ຂອງແຂວງຄຳມ່ວນ ໄລຍະ 2027-2030, ພ້ອມທັງລາຍງານກ່ຽວກັບວ່າລະແຫ່ງຊາດ ດ້ານມາດຕະຖານພົ້ນທຸກ ແລະ ມາດຕະຖານພັດທະນາ ຕາມແຜນງານແຫ່ງຊາດ ເຊິ່ງແຜນປະຕິບັດງານແຫ່ງຊາດ ກຳນົດທິດທາງ, ຈຸດປະສົງ, ແຜນງານ, ໂຄງການ, ກິດຈະກຳ ແລະ ມາດຕະການ ເພື່ອຫັນຍຸດທະສາດການພັດທະນາຊົນນະບົດ ແລະ ແກ້ໄຂຄວາມທຸກຍາກໄປສູ່ການຈັດຕັ້ງປະຕິບັດຕົວຈິງ ໂດຍມີເປົ້າໝາຍແກ້ໄຂຄວາມທຸກຍາກຢ່າງຍືນຍົງພາຍໃນປີ 2030.
ສຳລັບແຂວງຄຳມ່ວນ ໄດ້ກຳນົດການແກ້ໄຂຄອບຄົວທຸກຍາກມີ 5,022 ຄອບຄົວ ໃນ 3 ເມືອງທຸກຍາກ ຄື: ເມືອງບົວລະພາ, ນາກາຍ ແລະ ໄຊບົວທອງ, ກວມ 14 ຕາແສງ ແລະ 36ບ້ານເປົ້າໝາຍ ແລະ ສ້າງເມືອງທຸກຍາກໃຫ້ກາຍເປັນເມືອງພົ້ນທຸກ 1 ເມືອງຄື: ເມືອງໄຊບົວທອງ.
ພ້ອມນັ້ນ ກໍານົດ 4 ບ້ານເປັນບ້ານຕົວແບບ ໄດ້ແກ່ ບ້ານໜອງມ້າ ເມືອງບົວລະພາ, ບ້ານໂພນສະຫວັນ ແລະ ບ້ານນາກະດອມ ເມືອງໄຊບົວທອງ ແລະ ບ້ານນາເມີຍ ເມືອງນາກາຍ.
ສຳລັບແນວທາງຫຼັກໃນການດຳເນີນງານ ແມ່ນສຸມໃສ່ການສ້າງອາຊີບ ແລະ ແຫຼ່ງລາຍຮັບ, ສົ່ງເສີມການຜະລິດກະສິກຳຕິດພັນກັບການປຸງແຕ່ງ ແລະ ຕະຫຼາດຈຳໜ່າຍ, ສົ່ງເສີມການຜະລິດສະບຽງອາຫານ-ໂພຊະນາການ, ພັດທະນາການຜະລິດເປັນສິນຄ້າ, ເສີມສ້າງກຸ່ມຜະລິດ ແລະ ສະຫະກອນ, ພ້ອມພັດທະນາໂຄງລ່າງ ແລະ ລະບົບບໍລິການຂັ້ນພື້ນຖານ.
 |
ທ່ານ ສົມສະອາດ ອຸ່ນສີດາ ໄດ້ເນັ້ນໃຫ້ບັນດາພະແນກການ, ຂະແໜງການ ແລະ 3 ເມືອງທຸກຍາກ ຮ່ວມກັນກໍານົດບ້ານ ແລະ ຄອບຄົວເປົ້າໝາຍ, ເກັບກໍາຂໍ້ມູນໃຫ້ຄົບຖ້ວນ ແລະ ສ້າງແຜນງານ-ໂຄງການໃຫ້ລະອຽດ ພ້ອມບົດອອກແບບ ແລະ ຄິດໄລ່ປະເມີນລາຄາ ເພື່ອບັນຈຸເຂົ້າໃນແຜນງົບປະມານວາລະແຫ່ງຊາດ ໄລຍະ 2027-2030. ສະເພາະແຜນງານປີ 2027 ກໍານົດໃຫ້ຮີບຮ້ອນເຮັດບົດສະເໜີໂຄງການ, ອອກແບບ ແລະ ປະເມີນລາຄາ ໃຫ້ສຳເລັດບໍ່ໃຫ້ກາຍວັນທີ 2 ຕຸລາ 2026 ເພື່ອໃຫ້ກອງເລຂາຂັ້ນແຂວງສັງລວມສະເໜີຕໍ່ສູນກາງ, ກ່ອນນຳສະເໜີຕໍ່ກອງປະຊຸມສະພາແຫ່ງຊາດໃນວັນທີ 5 ຕຸລາ 2026 ແລະ ມອບໃຫ້ແຕ່ລະພາກສ່ວນສືບຕໍ່ສຳຫຼວດເກັບກຳຂໍ້ມູນ ແລ້ວສ້າງບົດສະເໜີ ໂຄງການສຳລັບປີ 2028-2030 ໃຫ້ສອດຄ່ອງກັບຈຳນວນ ແລະ ສະພາບຕົວຈິງຂອງແຕ່ລະເປົ້າໝາຍ, ໂດຍສຸມໃສ່ການສ້າງອາຊີບ, ວຽກເຮັດງານທຳ ແລະ ລາຍຮັບທີ່ໝັ້ນຄົງໃຫ້ຄອບຄົວທຸກຍາກ, ໂດຍສະເພາະຊາວໜຸ່ມ ແລະ ຍິງໜຸ່ມ ເພື່ອເຮັດໃຫ້ການແກ້ໄຂຄວາມທຸກຍາກເກີດຜົນເປັນຮູບປະທຳ ແລະ ຍືນຍົງ.
ຂ່າວ : ມະນີວັນ
ຄໍາເຫັນ