ເຈົ້າແຂວງຈຳປາສັກ ຕ້ອນຮັບຫຼາຍພາກສ່ວນ ທີ່ມາຮ່ວມງານບຸນປະວໍຣະນາ ອອກພັນສາ-ຊ່ວງເຮືອປະເພນີ ປະຈໍາປີ
ໃນລະຫວ່າງວັນທີ 7-8 ຕຸລານີ້, ທີ່ຫ້ອງວ່າການແຂວງຈຳປາສັກ, ທ່ານ ອາລຸນໄຊ ສູນນະລາດ ເຈົ້າແຂວງຈຳປາສັກ ພ້ອມດ້ວຍຄະນະ ໄດ້ຕ້ອນຮັບ ບັນດາທ່ານກົງສູນໃຫຍ່ ແລະ ແຂກຜູ້ຕາງໜ້າ ຈາກຫຼາຍປະເທດ ໃນໂອກາດ ທີ່ມາຮ່ວມງານບຸນອອກພັນສາ ປະວໍຣະນາ ແລະ ຊ່ວງເຮືອປະເພນີ ປະຈໍາປີ ພສ 2568, ຄສ 2025 ທີ່ແຂວງຈໍາປາສັກ. ຊຶ່ງປະກອບມີບັນດາທ່ານດັ່ງນີ້: ທ່ານ ຊຳນານ ຊື່ນຕາ ຜູ້ວ່າຣາຊະການຈັງຫວັດອຸບົນຣາຊະທານີ ແຫ່ງຣາຊະອານາຈັກໄທ ພ້ອມດ້ວຍຄະນະ, ທ່ານ ແມນ ກົງ ຮອງເຈົ້າແຂວງຊຽງແຕງ ຣາຊະອານາຈັກກຳປູເຈຍ ພ້ອມຄະນະ, ທ່ານ ນາງ ຕ້າ ເຟືອງ ຍຸງ ກົງສູນໃຫຍ່ແຫ່ງ ສສ ຫວຽດນາມ ປະຈຳ (ພາກໃຕ້) ນະຄອນປາກເຊ, ທ່ານ ກີ ໂມ ນີ ຣ໋ອກ ກົງສູນໃຫຍ່ແຫ່ງ ຣາຊະອານາຈັກກຳປູເຈຍ ປະຈຳນະຄອນປາກເຊ, ທ່ານ ສຸພັນ ຫານດາວເຮືອງ ກົງສູນໃຫຍ່ ແຫ່ງ ສປປ ລາວ ປະຈຳນະຄອນດານັງ ສສ ຫວຽດນາມ, ທ່ານ ພອນສີ ບຸນມີໄຊ ກົງສູນໃຫຍ່ແຫ່ງ ສປປ ລາວ ປະຈຳນະຄອນໂຮ່ຈິມິນ ສສ ຫວຽດນາມ ແລະ ທ່ານ ແກ້ວ ວົງໄຊ ກົງສູນໃຫຍ່ ແຫ່ງ ສປປ ລາວ ປະຈຳແຂວງຊຽງແຕງ ຣາຊະອານາຈັກກຳປູເຈຍ.
ໂອກາດນີ້, ທ່ານເຈົ້າແຂວງ ໄດ້ກ່າວຍິນດີຕ້ອນຮັບ ແລະ ສະແດງຄວາມຂອບໃຈ ມາຍັງ ບັນດາທ່ານກົງສູນໃຫຍ່ ແລະ ແຂກຜູ້ຕາງໜ້າ ຈາກປະເທດເພື້ອນມິດ ທີ່ໃຫ້ກຽດມາຮ່ວມໃນງານບຸນປະວໍຣະນາ ອອກພັນສາ-ຊ່ວງເຮືອປະເພນີ ປະຈໍາປີ ພສ 2568, ຄສ 2025 ທີ່ແຂວງຈໍາປາສັກ ເທື່ອນີ້. ເປັນການເພີ່ມທະວີປະກອບສ່ວນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງ ແຂວງຈຳປາສັກ ກັບ ບັນດາປະເທດເພື່ອນມິດ, ຊຶ່ງເປັນຂີດໝາຍອັນດີໃນການຊຸກຍູ້ການຮ່ວມມື ທາງດ້ານວັດທະນະທຳ, ທ່ອງທ່ຽວ ລວມທັງການລົງທຶນຮ່ວມກັນ. ງານບຸນຊ່ວງເຮືອປະເພນີທີ່ນະຄອນປາກເຊ ປີ2025 ໄດ້ຈັດຂຶ້ນຢ່າງຄຶກຄື້ນ ຕິດພັນກັບການເສີມຂະຫຍາຍວັດທະນະທໍາ-ຮີດຄອງປະເພນີອັນດີງາມຂອງຊາດ ດ້ວຍການລວມເອົາຫຼາຍກວ່າ 10 ກິດຈະກໍາ ໃຫຍ່ໆໄວ້ໃນງານດຽວ ເປັນການຕ້ອນຮັບລະດູການເກັບກ່ຽວຜົນຜະລິດ ແລະ ການທ່ອງທ່ຽວ.
(ຂ່າວ: ທັດຊະນະ)
ຄໍາເຫັນ