ວັນທີ 24 ພະຈິກຜ່ານມານີ້, ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ ພ້ອມດ້ວຍການນຳຂອງແຂວງ, ຕາງໜ້າສະພາປະຊາຊົນແຂວງ, ພະແນກການຂັ້ນແຂວງ ໄດ້ລົງພົບປະຢ້ຽມຢາມພໍ່ແມ່ປະຊາຊົນ ບ້ານນາຮີ ເມືອງມະຫາໄຊ, ໂດຍມີທ່ານ ສົມບູນ ແກ້ວວົງສາ ເຈົ້າເມືອງມະຫາໄຊ, ມີການນຳຂອງເມືອງ, ຂະແໜງການທີ່ກ່ຽວຂ້ອງຂັ້ນເມືອງ ແລະ ການຈັດຕັ້ງບ້ານ, ພໍ່ແມ່ປະຊາຊົນບ້ານນາຮີ ພ້ອມດ້ວຍອຳນາດການປົກຄອງບ້ານອ້ອມຂ້າງ ເຊັ່ນ: ບ້ານອີລານ, ນາທານ ແລະ ບ້ານເວີນ ເຂົ້າຮ່ວມ.
ໃນການລົງພົບປະຢ້ຽມຢາມໃນຄັ້ງນີ້ກໍໄດ້ຮັບຟັງການລາຍງານກ່ຽວກັບສະພາບລວມຂອງບ້ານ ຊຶ່ງທັງ 4 ບ້ານແມ່ນຂຶ້ນກັບກຸ່ມ ບ້ານເວີນ-ນາທານ, ອາຊີບຂອງພໍ່ແມ່ປະຊາຊົນສ່ວນຫຼາຍແມ່ນປູກຝັງ-ລ້ຽງສັດ. ສະເພາະບ້ານນາຮີ ເປັນບ້ານທີ່ຕັ້ງຢູ່ຝາກແມ່ນໍ້າ, ມີພຣະທາດເກດແກ້ວ ຊຶ່ງເປັນພຣະທາດທີ່ເກົ່າແກ່ ເປັນບ່ອນສັກລາລະບູຊາ ແລະ ເຕົ້າໂຮມຈິດໃຈຂອງພໍ່ແມ່ປະຊາຊົນ ແຕ່ການເດີນທາງເຂົ້າຫາບ້ານຍັງມີຄວາມຫຍຸ້ງຍາກ ໂດຍສະເພາະໃນລະດູຝົນ ລົດໃຫຍ່ແມ່ນບໍ່ສາມາດເຂົ້າເຖິງໄດ້, ລະບົບພື້ນຖານໂຄງລ່າງຕ່າງໆຍັງບໍ່ທັນຄົບຖ້ວນ ການພັດທະນາບ້ານຈຶ່ງຂ້ອນຂ້າງມີຄວາມຊັກຊ້າ, ແຕ່ດ້ວຍຄວາມເປັນຫ່ວງເປັນໃຍ ແລະ ຄວາມເອົາໃຈໃສ່ຂອງພັກ-ລັດ, ການຈັດຕັ້ງ ກໍຄືການນຳຂັ້ນແຂວງ, ຂັ້ນເມືອງ ຊຶ່ງໃນເມື່ອບໍ່ດົນຜ່ານມານີ້ ຈຶ່ງໄດ້ສ້າງຕາຂ່າຍໄຟຟ້າເຂົ້າຫາບ້ານ ພ້ອມທັງສ້ອມແປງເສັ້ນທາງ, ກໍ່ສ້າງຝາຍນໍ້າລົ້ນ ເພື່ອເກັບນໍ້າໄວ້ໃຊ້ເຂົ້າໃນການຜະລິດກະສິກຳໃນລະດູແລ້ງ. ພ້ອມດຽວກັນນີ້ ອຳນາດການປົກຄອງ ແລະ ພໍ່ແມ່ປະຊາຊົນ ຍັງໄດ້ສະເໜີມາຍັງການນຳຂອງແຂວງເພື່ອຊ່ວຍຄົ້ນຄວ້າໃນການສ້າງພື້ນຖານໂຄງລ່າງຕ່າງໆ ເປັນຕົ້ນການກໍ່ສ້າງຂົວຂ້າມແມ່ນໍ້າ ເພື່ອເຮັດໃຫ້ການເດີນທາງມີຄວາມສະດວກ, ຕິດຕັ້ງລະບົບເຄືອຂ່າຍສັນຍານໂທລະສັບ ໃນເຂດບ້ານນາຮີ, ການສ້ອມແປງເສັ້ນທາງ, ວັດວາອາຮາມ, ໂຮງຮຽນ ລວມເຖິງການສະເໜີແກ້ໄຂບັນຫາໄຟຟ້າບໍ່ພຽງພໍ ແລະ ຄ່າກະແສໄຟຟ້າທີ່ນຳໃຊ້ເຂົ້າໃນຜະລິດນາແຊງສູງ, ການກໍ່ສ້າງລະບົບຊົນລະປະທານ ເພື່ອຕອບສະໜອງໃຫ້ແກ່ການຜະລິດລະດູແລ້ງ ແລະ ການປັບປຸງພື້ນຖານໂຄງລ່າງດ້ານອື່ນໆ.
ໂອກາດນີ້ທ່ານເຈົ້າແຂວງຄຳມ່ວນ ກໍໄດ້ຖາມເຖິງຄວາມທຸກ-ສຸກ ຂອງພໍ່ແມ່ປະຊາຊົນດ້ວຍຄວາມເປັນຫ່ວງເປັນໃຍ ແລະ ໄດ້ມີຄໍາເຫັນໂອ້ລົມຕໍ່ອຳນາດການປົກຄອງ ແລະ ພໍ່ແມ່ປະຊາຊົນ ໃຫ້ສືບຕໍ່ເອົາໃຈໃສ່ປັບປຸງດ້ານພື້ນຖານໂຄງລ່າງໃນດ້ານຕ່າງໆຂອງບ້ານ ເພື່ອເປັນເງື່ອນໄຂສ້າງລາຍຮັບທີ່ໝັ້ນຄົງ, ພ້ອມກັນຄິດຄົ້ນ, ຊອກຫາ ແລະ ພັດທະນາທ່າແຮງຂອງບ້ານທີ່ມີຢູ່ແລ້ວ ບໍ່ວ່າຈະເປັນທ່າແຮງທາງດ້ານການຜະລິດ ປູກຝັງ-ລ້ຽງສັດ ໃຫ້ສາມາດກຸ້ມຢູ່ກຸ້ມກິນ ແລະ ກາຍເປັນສິນຄ້າໃຫ້ຫຼາຍຂຶ້ນ, ສືບຕໍ່ເອົາໃຈໃສ່ວຽກງານປ້ອງກັນຊາດ-ປ້ອງກັນຄວາມສະຫງົບ, ສຶກສາອົບຮົມລູກຫຼາຍບໍ່ໃຫ້ມີການພົວກັບກັບຢາເສບຕິດ, ເອົາໃຈໃສ່ຕ້ານປະກົດການຫຍໍ້ທໍ້ໃນສັງຄົມ ພ້ອມນັ້ນກໍໃຫ້ມີຄວາມສາມັກຄີຊ່ວຍເຫຼືອຊຶ່ງກັນ ແລະ ກັນ ເພື່ອພ້ອມກັນພັດທະນາບ້ານໃຫ້ມີກາຍຂະຫຍາຍຕົວ ແນໃສ່ເຮັດໃຫ້ປະຊາຊົນມີກິນມີໃຊ້, ມີຊີວິດການເປັນຢູ່ທີ່ດີຂຶ້ນ.
ສຳລັບຄຳສະເໜີຂອງພໍ່ແມ່ປະຊາຊົນ ແມ່ນມອບໃຫ້ພະແນກການ, ຂະແໜງການທີ່ກ່ຽວຂ້ອງລົງເກັບກຳຂໍ້ມູນ ເພື່ອຄິດໄລ່ອອກແບບ ແລະ ສ້າງເປັນແຜນອັນລະອຽດ ນຳສະເໜີຕໍ່ຂັ້ນເທິງ ແລະ ໃນບາງຄຳສະເໜີແມ່ນຈະໄດ້ນຳໄປຄົ້ນຄວ້າໃນຄະນະນຳຂັ້ນແຂວງເພື່ອຄົ້ນຄວ້າແກ້ໄຂໃນຕໍ່ໜ້າ.
ຂ່າວ-ພາບ: ກອງຄຳ
ຄໍາເຫັນ