ໃນວັນທີ 29 ພະຈິກຜ່ານມາ, ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ ພ້ອມດ້ວຍບັນດາພະແນກການທີ່ກ່ຽວຂ້ອງໄດ້ເຄື່ອນໄຫວຕິດຕາມການປັບປຸງກໍ່ສ້າງເສັ້ນທາງຢູ່ດ່ານສາກົນນາເພົ້າ ເມືອງບົວລະພາ ແລະ ຈຸດຊິງຊັ່ງເພື່ອກວດການໍ້າໜັກລົດບັນທຸກຂົນສົ່ງສິນຄ້າເຂົ້າ-ອອກດ່ານ ລວມເຖິງພື້ນຖານໂຄງລ່າງ, ລະບົບການບໍລິຫານ, ການບໍລິການພາຍໃນດ່ານນາເພົ້າ.
ສຳລັບການປັບປຸງກໍ່ສ້າງເສັ້ນທາງເລກທີ 12 ແຕ່ບ້ານຫຼັງຄັງຂຶ້ນໄປຫາດ່ານນາເພົ້າຊຶ່ງມີຄວາມຍາວທັງໝົດ 18 ກິໂລແມັດໂດຍແມ່ນບໍລິສັດເກດສຸວັນເປັນຜູ້ຮັບເໝົາກໍ່ສ້າງ ຊຶ່ງເປັນເຂດພູສູງຊັນຄົດລ້ຽວ ແລະ ມີການເປ່ເພຫຼາຍໃນເມື່ອກ່ອນເຮັດໃຫ້ການສັນຈອນໄປ-ມາ ແລະ ການຂົນສົ່ງສິນຄ້າເຂົ້າ-ອອກຜ່ານດ່ານສາກົນນາເພົ້າແຂວງຄຳມ່ວນ ສປປ ລາວ ເຊື່ອມຕໍ່ກັບດ່ານຈາຫຼໍແຂວງກວາງບິ່ງ ສສ ຫວຽດນາມ ມີຄວາມຫຍຸ້ງຍາກ ແລະ ຊັກຊ້າມາຮອດປັດຈຸບັນແມ່ນໄດ້ຮັບການປັບປຸງກໍ່ສ້າງເປັນເສັ້ນທາງປູຢາງ 2 ຊັ້ນຄາດວ່າການກໍ່ສ້າງຈະສຳເລັດພາຍໃນກາງເດືອນທັນວາ 2023 ນີ້.
ທ່ານເຈົ້າແຂວງຍັງໄດ້ຮັບຟັງການລາຍງານຈາກຄະນະຄຸ້ມຄອງດ່ານກ່ຽວກັບຂໍ້ສະດວກ ແລະ ຂໍ້ຫຍຸ້ງຍາກໃນການບໍລິການເປັນຕົ້ນບັນຫາໄຟຟ້າບໍ່ປົກກະຕິ, ອາຄານດ່ານມີການເປ່ເພຊຸດໂຊມ, ການກໍ່ສ້າງຫໍພັກຂອງພະນັກງານຍັງບໍ່ທັນສຳເລັດ ລວມເຖິງລະບົບນໍ້າສະອາດ ແລະ ການປັບປຸງພື້ນຖານໂຄງລ່າງອື່ນໆ.
ໂອກາດນີ້, ທ່ານເຈົ້າແຂວງໄດ້ມີຄຳເຫັນຊີ້ນຳຕໍ່ຄະນະຄຸ້ມຄອງດ່ານ ແລະ ພະນັກງານທີ່ປະຈຳຢູ່ດ່ານ ຈົ່ງພ້ອມກັນເອົາໃຈໃສ່ຈັດຕັ້ງປະຕິບັດໜ້າທີ່ຕາມພາລະບົດບາດ ແລະ ຖືກຕ້ອງຕາມລະບຽບການ, ສືບຕໍ່ຍົກລະດັບການບໍລິຫານ, ການບໍລິການໃຫ້ມີຄວາມສະດວກ, ວ່ອງໄວ, ໂປ່ງໃສ ແລະ ເປັນໜ້າເພິ່ງພໍໃຈຂອງຜູ້ມາໃຊ້ບໍລິການ ພ້ອມກັນກວດກາແກ້ໄຂບັນຫາທີ່ເປັນສິ່ງອຸດຕັນ ຄວາມບໍ່ໂລ່ງລ່ຽນໃນການປະຕິບັດວຽກງານ ລວມເຖິງການປັບປຸງລະບົບຊິງຊັ່ງນໍ້າໜັກໃຫ້ທັນສະໄໝ, ມີຄວາມສະດວກ ສາມາດຕິດຕາມ, ກວດກາໄດ້ງ່າຍ ແລະ ການປັບປຸງບູລະນະ, ປະດັບປະດາ, ຮັກສາຄວາມສະອາດໃນບໍລິເວນດ່ານໃຫ້ມີຄວາມສວຍງາມເພື່ອຮອງຮັບໃຫ້ແກ່ການເປີດປີທ່ອງທ່ຽວລາວ 2024 ທີ່ຈະມາເຖິງນີ້. ສ່ວນບັນດາຂໍ້ຫຍຸ້ງຍາກ ແລະ ຂໍ້ສະເໜີຕ່າງໆແມ່ນໃຫ້ປະສານສົມທົບກັບພະແນກການ, ຂະແໜງການທີ່ກ່ຽວຂ້ອງພ້ອມກັນຕິດຕາມ, ກວດກາ ແລະ ຂຶ້ນແຜນສະເໜີຕໍ່ຂັ້ນເທິງເພື່ອຄົ້ນຄວ້າແກ້ໄຂໃນຕໍ່ໜ້າ.
ຂ່າວ-ພາບ: ກອງຄຳ
ສຳລັບການປັບປຸງກໍ່ສ້າງເສັ້ນທາງເລກທີ 12 ແຕ່ບ້ານຫຼັງຄັງຂຶ້ນໄປຫາດ່ານນາເພົ້າຊຶ່ງມີຄວາມຍາວທັງໝົດ 18 ກິໂລແມັດໂດຍແມ່ນບໍລິສັດເກດສຸວັນເປັນຜູ້ຮັບເໝົາກໍ່ສ້າງ ຊຶ່ງເປັນເຂດພູສູງຊັນຄົດລ້ຽວ ແລະ ມີການເປ່ເພຫຼາຍໃນເມື່ອກ່ອນເຮັດໃຫ້ການສັນຈອນໄປ-ມາ ແລະ ການຂົນສົ່ງສິນຄ້າເຂົ້າ-ອອກຜ່ານດ່ານສາກົນນາເພົ້າແຂວງຄຳມ່ວນ ສປປ ລາວ ເຊື່ອມຕໍ່ກັບດ່ານຈາຫຼໍແຂວງກວາງບິ່ງ ສສ ຫວຽດນາມ ມີຄວາມຫຍຸ້ງຍາກ ແລະ ຊັກຊ້າມາຮອດປັດຈຸບັນແມ່ນໄດ້ຮັບການປັບປຸງກໍ່ສ້າງເປັນເສັ້ນທາງປູຢາງ 2 ຊັ້ນຄາດວ່າການກໍ່ສ້າງຈະສຳເລັດພາຍໃນກາງເດືອນທັນວາ 2023 ນີ້.
ທ່ານເຈົ້າແຂວງຍັງໄດ້ຮັບຟັງການລາຍງານຈາກຄະນະຄຸ້ມຄອງດ່ານກ່ຽວກັບຂໍ້ສະດວກ ແລະ ຂໍ້ຫຍຸ້ງຍາກໃນການບໍລິການເປັນຕົ້ນບັນຫາໄຟຟ້າບໍ່ປົກກະຕິ, ອາຄານດ່ານມີການເປ່ເພຊຸດໂຊມ, ການກໍ່ສ້າງຫໍພັກຂອງພະນັກງານຍັງບໍ່ທັນສຳເລັດ ລວມເຖິງລະບົບນໍ້າສະອາດ ແລະ ການປັບປຸງພື້ນຖານໂຄງລ່າງອື່ນໆ.
ໂອກາດນີ້, ທ່ານເຈົ້າແຂວງໄດ້ມີຄຳເຫັນຊີ້ນຳຕໍ່ຄະນະຄຸ້ມຄອງດ່ານ ແລະ ພະນັກງານທີ່ປະຈຳຢູ່ດ່ານ ຈົ່ງພ້ອມກັນເອົາໃຈໃສ່ຈັດຕັ້ງປະຕິບັດໜ້າທີ່ຕາມພາລະບົດບາດ ແລະ ຖືກຕ້ອງຕາມລະບຽບການ, ສືບຕໍ່ຍົກລະດັບການບໍລິຫານ, ການບໍລິການໃຫ້ມີຄວາມສະດວກ, ວ່ອງໄວ, ໂປ່ງໃສ ແລະ ເປັນໜ້າເພິ່ງພໍໃຈຂອງຜູ້ມາໃຊ້ບໍລິການ ພ້ອມກັນກວດກາແກ້ໄຂບັນຫາທີ່ເປັນສິ່ງອຸດຕັນ ຄວາມບໍ່ໂລ່ງລ່ຽນໃນການປະຕິບັດວຽກງານ ລວມເຖິງການປັບປຸງລະບົບຊິງຊັ່ງນໍ້າໜັກໃຫ້ທັນສະໄໝ, ມີຄວາມສະດວກ ສາມາດຕິດຕາມ, ກວດກາໄດ້ງ່າຍ ແລະ ການປັບປຸງບູລະນະ, ປະດັບປະດາ, ຮັກສາຄວາມສະອາດໃນບໍລິເວນດ່ານໃຫ້ມີຄວາມສວຍງາມເພື່ອຮອງຮັບໃຫ້ແກ່ການເປີດປີທ່ອງທ່ຽວລາວ 2024 ທີ່ຈະມາເຖິງນີ້. ສ່ວນບັນດາຂໍ້ຫຍຸ້ງຍາກ ແລະ ຂໍ້ສະເໜີຕ່າງໆແມ່ນໃຫ້ປະສານສົມທົບກັບພະແນກການ, ຂະແໜງການທີ່ກ່ຽວຂ້ອງພ້ອມກັນຕິດຕາມ, ກວດກາ ແລະ ຂຶ້ນແຜນສະເໜີຕໍ່ຂັ້ນເທິງເພື່ອຄົ້ນຄວ້າແກ້ໄຂໃນຕໍ່ໜ້າ.
ຂ່າວ-ພາບ: ກອງຄຳ
ຄໍາເຫັນ