ຄໍາມ່ວນ ວາງແຜນຄຸ້ມຄອງອະນຸລັກ ແລະ ພັດທະນາອຸທິຍານທໍລະນີຫີນບູນ

ໃນກອງປະຊຸມໄດ້ຮັບຟັງ ແລະ ປຶກສາຫາລືໃນຫຼາຍຫົວຂໍ້ສໍາຄັນ ເປັນຕົ້ນ: ການລາຍງານສະພາບລວມຂອງອຸທິຍານທໍລະນີຫີນບູນ ແລະ ຂັ້ນຕອນໃນການປະກອບເອກະສານ ເພື່ອສະເໜີເຂົ້າເປັນອຸທິຍານທໍລະນີໂລກ ແຫ່ງອົງການຢູເນສໂກ (UNESCO Global Geoparks). ການນໍາສະເໜີລັກສະນະທາງດ້ານທໍລະນີສາດ ແລະ ຄວາມສໍາຄັນຂອງອຸທິຍານທໍລະນີຫີນບູນ, ແຜນການຄຸ້ມຄອງ ແລະ ການພັດທະນາອຸທິຍານທໍລະນີ ຫີນບູນ. ພ້ອມທັງປຶກສາຫາລື ເພື່ອກໍານົດພາລະບົດບາດ ແລະ ຂໍ້ກໍານົດຂອງຄະນະວິທະຍາສາດ ພາຍໃຕ້ຄະນະກໍາມາທິການອຸທິຍານທໍລະນີແຫ່ງຊາດ.

ນອກຈາກນີ້, ກອງປະຊຸມຍັງໄດ້ເນັ້ນໃສ່ການຄົ້ນຄວ້າ ແລະ ປະເມີນຜົນຮອບດ້ານ ກ່ຽວກັບຄຸນຄ່າທາງທໍາມະຊາດ, ກະສິກໍາ, ວັດທະນະທໍາ ແລະ ປະຫວັດສາດ ຂອງອຸທິຍານທໍລະນີຫີນບູນເຊິ່ງໄດ້ຍົກໃຫ້ເຫັນວ່າ ທັດສະນີຍະພາບໃນພື້ນທີ່ອຸທິຍານທໍລະນີຫີນບູນ ເປັນຜົນຜະລິດທາງວັດທະນະທໍາທີ່ຜູກພັນກັບວິຖີຊີວິດຂອງປະຊາຊົນໃນຊຸມຊົນ, ທັງເປັນພື້ນຖານໃຫ້ແກ່ການສະໜັບສະໜູນນະໂຍບາຍການຈັດຜັງ ແລະ ການບໍລິຫານການທ່ອງທ່ຽວນິເວດ ໂດຍອາໄສການມີສ່ວນຮ່ວມຂອງຊາວບ້ານຢ່າງຍືນຍົງ.

ຈຸດທີ່ສໍາຄັນແມ່ນເພື່ອລາຍງານຜົນການຄົ້ນຄວ້າແຫຼ່ງບູຮານວິທະຍາ "ຖ້ຳຝາມື" ບໍລິເວນປະຕູທາງເຂົ້າອຸທິຍານທໍລະນີຫີນບູນ (ໃກ້ບ້ານຄູນເງິນ, ເມືອງຄູນຄໍາ), ພື້ນທີ່ດັ່ງກ່າວ, ເປັນຜາທໍາມະຊາດທີ່ຍັງຄົງປະດັບໄປດ້ວຍຮູບແຕ້ມບູຮານໄວ້ໄດ້ຢ່າງສົມບູນ, ຜົນການສັງເກດການພົບຮູບແຕ້ມເທິງໜ້າຜາຫີນຫຼາຍກວ່າ 285 ຮູບ (ຮູບຮອຍຝາມືປະທັບ ແລະ ສັນຍະລັກຕ່າງໆ) ທີ່ມີໂທນສີຫຼາກຫຼາຍ ເຊິ່ງເປັນຫຼັກຖານຢັ້ງຢືນທາງປະຫວັດສາດເຖິງການເຄື່ອນຍ້າຍ ແລະ ການແລກປ່ຽນທາງວັດທະນະທໍາໃນພູມິພາກຍຸກກ່ອນປະຫວັດສາດ.

ກອງປະຊຸມຄັ້ງນີ້ ຖືເປັນກ້າວສໍາຄັນໃນການຮວບຮວມຂໍ້ມູນທາງວິທະຍາສາດ, ນັກວິຊາການ ແລະ ອົງກອນປົກຄອງທ້ອງຖິ່ນ ເພື່ອຮ່ວມກັນວາງທິດທາງໃນການຄຸ້ມຄອງ, ອະນຸລັກ ແລະ ພັດທະນາອຸທິຍານທໍລະນີຫີນບູນ ໃຫ້ເປັນມໍລະດົກທາງທໍາມະຊາດ ແລະ ວັດທະນະທໍາທີ່ຍືນຍົງຂອງແຂວງຄໍາມ່ວນ ແລະ ຂອງຊາດ ໃນອະນາຄົດ.

ຂ່າວ: ຄຳມ່ວນ