 |
ສະຫາຍ ພົນຈັດຕະວາ ຕີເບດ ສີແພງຄູນ ກ່າວວ່າ: ການເປີດຊຸດຝຶກອົບຮົມຄັ້ງນີ້, ເພື່ອເປັນການປະຕິ ບັດແນວທາງກໍ່ສ້າງພັກໃນໄລຍະໃໝ່, ແນໃສ່ສ້າງພັກໃຫ້ມີຄວາມປອດໃສ ເຂັ້ມແຂງ ໜັກແໜ້ນ, ຍົກສູງຄວາມສາມາດນໍາພາ, ແບບແຜນວິທີເຮັດວຽກ, ຄວາມຮັບຮູ້ທາງດ້ານທິດສະດີ, ຫຼັກການພື້ນຖານ ຂອງວຽກງານຈັດຕັ້ງ-ກໍ່ສ້າງພັກ ໃຫ້ມີການຫັນປ່ຽນອັນໃໝ່, ທັງເປັນການປະຕິບັດຕາມທິດຊີ້ນໍາ ຂອງຄະນະພັກກະຊວງ, ກົມໃຫຍ່ການເມືອງກອງທັບ, ດໍາເນີນການຈັດຕັ້ງຝຶກອົບຮົມຫັດແອບ ແລະ ກວດສອບຄວາມຮູ້ ຄວາມສາມາດ, ແບບແຜນວິທີເຮັດວຽກໃຫ້ຖັນແຖວເລຂາ, ຮອງເລຂາໜ່ວຍພັກ, ໃຫ້ມີຄວາມຊໍານານ ຕໍ່ວຽກງານກໍ່ສ້າງພັກໃຫ້ເປັນເອກະພາບ, ແນໃສ່ເຮັດໃຫ້ການກໍ່ສ້າງພັກໃນກອງທັບ ຖືກຕ້ອງຕາມແນວທາງຂອງພັກ, ສົມເປັນກໍາລັງທີ່ໄວ້ເນື້ອເຊື່ອໃຈຈາກພັກ-ລັດ ແລະ ປະຊາຊົນລາວບັນດາເຜົ່າ, ກາຍເປັນກອງທັບປະຕິວັດທີ່ມີລະບຽບ, ແບບ ແຜນ ແລະ ທັນສະໄໝ.
ການຝຶກອົບຮົມຈະດໍາເນີນໄປເປັນເວລາ 10 ວັນ ຊຶ່ງສໍາມະນາກອນຈະໄດ້ພ້ອມກັນສຸມໃສ່ຄົ້ນຄວ້າບັນດາເນື້ອໃນເອກະສານພາກທິດສະດີ, ພາກປະຕິບັດຕົວຈິງ ແລະ ທົບທວນຄືນບົດຮຽນກໍ່ສ້າງພັກທີ່ຜ່ານມາຂອງກົມກອງຕົນ ເພື່ອພ້ອມກັນກ້າວໄປສູ່ຄວາມເປັນເອກະພາບ, ດ້ານແບບແຜນວິທີເຮັດວຽກຂອງຖັນແຖວເລຂາ, ຮອງເລຂາ.
ໂອກາດນີ້, ສະຫາຍ ຫົວໜ້າຫ້ອງການເມືອງ ກົມໃຫຍ່ພະລາທິການກອງທັບ ໄດ້ຮຽກຮ້ອງມາຍັງບັນດາ ຄະນະພັກຮາກຖານ, ໜ່ວຍພັກທີ່ເຂົ້າຮ່ວມຝຶກອົບຮົມ ຈົ່ງເຊີດຊູຄວາມຮັບຜິດຊອບຂອງຕົນ ສຸມທຸກສະຕິປັນຍາເຂົ້າໃສ່ການຄົ້ນຄວ້າຮໍ່າຮຽນ, ກຳແໜ້ນບັນດາເນື້ອໃນເອກະສານ ແລະ ຍາດແຍ່ງເອົາບົດຮຽນນໍາຄູ-ອາຈານ ເພື່ອໄປໝູນໃຊ້ໃຫ້ແທດເໝາະກັບສະພາບຈຸດພິເສດຂອງກົມກອງຕົນ ແລະ ເຮັດໃຫ້ວຽກງານກໍ່ສ້າງພັກຖືກກັບແນວທາງ, ກົມກອງມີທ່ວງທ່າອັນໃໝ່ ປະກອບສ່ວນອັນສໍາຄັນ, ການຜັນຂະຫຍາຍໝາກຜົນການນໍາພາ-ຊີ້ນໍາ ຂອງຄະນະພັກ, ການເຄື່ອນໄຫວຂອງພະນັກງານແຕ່ລະສະຫາຍ, ສ້າງໄດ້ບຸກຄະລາກອນຮູ້ເຮັດວຽກງານກໍ່ສ້າງພັກ, ພະນັກງານນໍາພາ, ເຮັດໃຫ້ວຽກງານກໍ່ສ້າງພັກ-ກໍ່ສ້າງກໍາລັງຢູ່ຄະນະພັກຮາກຖານ, ໜ່ວຍພັກ ໃຫ້ນັບມື້ໜັກແໜ້ນ, ເຂັ້ມແຂງ, ທັນສະໄໝ ແລະ ກ້າວໜ້າຂຶ້ນຢ່າງບໍ່ຢຸດຢັ້ງ.
ໂດຍ: ຄໍາປະສົງ ລາດຊະວົງ; ພາບໂດຍ: ວິຊາການກົມກອງ.
ຄໍາເຫັນ