ເຈົ້າແຂວງຄຳມ່ວນ ຕ້ອນຮັບກຸ່ມບໍລິສັດ THທີ່ມາສະເໜີເຈດຈຳນົງໃນການລົງທຶນຢູ່ແຂວງ

ຕາງໜ້າຄະນະດັ່ງກ່າວ, ໄດ້ສະເໜີເຈດຈຳນົງ ຕໍ່ການນຳຂອງແຂວງຄຳມ່ວນ ຊຶ່ງກຸ່ມບໍລິສັດ TH ແມ່ນມີຄວາມສົນໃຈ ໃນການລົງທຶນພັດທະນາທາງດ້ານກະສິກຳ ທີ່ນຳໃຊ້ເຕັກໂນໂລຊີລະດັບສູງ (ສຳປະທານເນື້ອທີ່ດິນ ເພື່ອປູກອ້ອຍ ແລະ ສ້າງຕັ້ງໂຮງງານຜະລິດນໍ້າຕານ, ປູກໄມ້ສະໝຸນໄພ ແລະ ປູກໄມ້ໃຫ້ໝາກ), ສຳຫຼວດກໍ່ສ້າງໂຮງງານຂຸດຄົ້ນເກືອກາລີ ແລະ ໂຮງງານຜະລິດປຸ໋ຍ, ຜ່ານມາກຸ່ມບໍລິສັດ TH ກໍໄດ້ມາດໍາເນີນການລົງທຶນຢູ່ໃນ ສປປ ລາວ ໃນຫຼາຍໂຄງການ, ຫວັງວ່າທາງການນໍາຂອງແຂວງ ຈະໃຫ້ການສະໜັບສະໜູນ ແລະ ອຳນວຍຄວາມສະດວກໃຫ້ນັກລົງທຶນຂອງຫວຽດນາມ ກໍຄືກຸ່ມບໍລິສັດ TH ໃນການເກັບກຳຂໍ້ມູນເພື່ອລົງທຶນຢູ່ແຂວງຄຳມ່ວນ ເພື່ອເຮັດແນວໃດໃຫ້ການລົງທຶນໄດ້ຮັບການຈັດຕັ້ງປະຕິບັດ ແລະ ດຳເນີນການໂດຍໄວ, ມີຄວາມສະດວກ ແລະ ມີປະສິດທິພາບສູງ,

ທ່ານເຈົ້າແຂວງຄໍາມ່ວນ ໄດ້ກ່າວສະແດງຄວາມຂອບໃຈ ຕໍ່ຄະນະທີ່ໄດ້ສະເໜີຈຸດປະສົງ ໃນການລົງມາເຄື່ອນໄຫວເຮັດວຽກຢູ່ແຂວງຄຳມ່ວນ ແລະ ໄດ້ໃຫ້ຂໍ້ມູນ ຈະດຳເນີນການລົງທຶນ ຢູ່ໃນ ສປປ ລາວ, ຊຶ່ງວ່າ ສປປ ລາວ ແລະ ສສ ຫວຽດນາມ ແມ່ນເປັນປະເທດເພື່ອນມິດຍຸດທະສາດ ມາແຕ່ດົນນານ, ສຳລັບຢູ່ຂັ້ນທ້ອງຖິ່ນ ໃນໄລຍະຜ່ານມາກໍໄດ້ປະຕິບັດບົນຈິດໃຈການຕົກລົງຂອງສອງກົມການເມືອງ ກໍຄືສອງລັດຖະບານ ໃນການພົວພັນຮ່ວມມື ໃນທຸກຂົງເຂດວຽກງານ, ທາງດ້ານຂົງເຂດເສດຖະກິດ ແຂວງຄຳມ່ວນ ກໍໄດ້ເອົາໃຈໃສ່ໃນການໂຄສະນາດຶງດູດການລົງທຶນຈາກເພື່ອນມິດຍຸດທະສາດ ໂດຍສະເພາະແມ່ນບັນດາແຂວງໃກ້ຄຽງ ທີ່ມີຊາຍແດນຕິດຈອດກັນ ແລະ ບັນດາແຂວງອື່ນໆ ຂອງ ສສ ຫວຽດນາມ. ປັດຈຸບັນນີ້,ກໍມີພາກທຸລະກິດຂອງຫວຽດນາມ ທີ່ມາດຳເນີນທຸລະກິດຢູ່ພາຍໃນແຂວງຄຳມ່ວນ ໃນຫຼາຍໂຄງການ, ສຳລັບເຈດຈຳນົງຂອງທາງກຸ່ມບໍລິສັດTH ທີ່ໄດ້ສະເໜີໃນຄັ້ງນີ້ ແມ່ນສອດຄ່ອງກັບ 3 ທ່າແຮງຫຼັກໃນການພັດທະນາເສດຖະກິດ-ສັງຄົມຂອງແຂວງຄຳມ່ວນ ກໍຄື: ທ່າແຮງດ້ານກະສິກຳ, ທ່າແຮງດ້ານອຸດສາຫະກຳ, ພະລັງງານ-ບໍ່ແຮ່ ແລະ ທ່າແຮງດ້ານການບໍລິການ-ການທ່ອງທ່ຽວ, ໃນນາມຕາງໜ້າການນຳຂອງແຂວງຄໍາມ່ວນ ແມ່ນມີຄວາມຍິນດີຕ້ອນຮັບ ທາງກຸ່ມບໍລິສັດ TH ທີ່ມີຈຸດປະສົງຢາກມາສຶກສາຄົ້ນຄວ້າຄວາມເປັນໄປໄດ້ໃນການລົງທຶນດ້ານຕ່າງໆຢູ່ແຂວງຄໍາມ່ວນ.ໃນນັ້ນ, ການສ້າງຕັ້ງໂຮງງານຜະລິດປຸ໋ຍ ແມ່ນສອດຄ່ອງກັບແນວຄວາມຄິດຂອງລັດຖະບານ ສປປ ລາວ ທີ່ຈະໃຫ້ແຂວງຄຳມ່ວນເປັນຈຸດສ້າງຕັ້ງໂຮງງານ ເນື່ອງຈາກ ສປປ ລາວ ເປັນປະເທດກະສິກຳ, ປັດໄຈການຜະລິດ ໂດຍສະເພາະ ປຸ໋ຍ ແມ່ນຍັງນໍາເຂົ້າຈາກຕ່າງປະເທດເປັນສ່ວນຫຼາຍ ຊຶ່ງເປັນບັນຫາກະທົບຕໍ່ການຜະລິດທາງດ້ານຕົ້ນທຶນສູງ, ຖ້າມີການລົງທຶນໃນການຜະລິດປຸ໋ຍຢູ່ພາຍໃນ ເພື່ອຕອບສະໜອງໃຫ້ແກ່ພາຍໃນ ຈະເປັນການດີ ເພື່ອສ້າງສິ່ງອຳນວຍຄວາມສະດວກໃຫ້ແກ່ປະຊາຊົນ ກໍຄືກຸ່ມຜູ້ຜະລິດຢູ່ພາຍໃນ, ສຳລັບຂໍ້ສະເໜີ ກໍຄືເຈດຈຳນົງ ຂອງກຸ່ມບໍລິສັດ TH ທີ່ໄດ້ສະເໜີໃນຄັ້ງນີ້ ການນຳແຂວງຈະຮັບເອົາ ແລະ ມອບໃຫ້ຂະແໜງການກ່ຽວຂ້ອງມາພົວພັນ ແລະ ສຶກສາຄົ້ນຄວ້າລົງເລິກລາຍລະອຽດ ເຖິງຄວາມເປັນໄປໄດ້ໃນຂັ້ນຕໍ່ໄປ.

(ຂ່າວ-ພາບ: ກອງຄໍາ)