ເຈົ້າແຂວງຄຳມ່ວນລົງເບິ່ງເສັ້ນທາງທີ່ຮັບຜົນກະທົບໃນໄລຍະລະດູຝົນຜ່ານມາ

ໃນໄລຍະຕົ້ນເດືອນສິງຫາຜ່ານມາ ເກີດມີສະພາບຝົນຕົກໜັກຕິດຕໍ່ກັນຫຼາຍວັນ ເຮັດໃຫ້ເກີດມີສະພາບນໍ້າຖ້ວມຢູ່ຫຼາຍພື້ນທີ່, ດ້ານພື້ນຖານໂຄງລ່າງ, ເຮືອນຊານບ້ານຊ່ອງ, ເນື້ອທີ່ທຳການຜະລິດ, ລະບົບໄຟຟ້າ, ລະບົບຄົມມະນາຄົມຈຳນວນຫຼາຍໄດ້ຮັບຜົນກະທົບ ໂດຍສະເພາະບັນດາເສັ້ນທາງເຊື່ອມຕໍ່ລະຫວ່າງແຂວງໄປຫາເມືອງ, ລະຫວ່າງເມືອງ ແລະ ບ້ານຕໍ່ບ້ານ ເຮັດໃຫ້ການສັນຈອນໄປ-ມາ, ການຂົນສົ່ງແລກປ່ຽນຊື້-ຂາຍສິນຄ້າ ຂອງພໍ່ແມ່ປະຊາຊົນມີຄວາມຫຍຸ້ງຍາກ.
     ໃນວັນທີ 27 ກັນຍານີ້, ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ ພ້ອມດ້ວຍພະແນກການທີ່ກ່ຽວຂ້ອງຂັ້ນແຂວງ ໄດ້ລົງຕິດຕາມເບິ່ງສະພາບເສັ້ນທາງ, ຂົວ ລວມເຖິງຕາຝັ່ງແມ່ນໍ້າຂອງ ທີ່ໄດ້ຮັບຜົນກະທົບເປ່ເພ, ເຊາະເຈື່ອນ ໃນນັ້ນແມ່ນໄດ້ລົງຕິດຕາມເສັ້ນທາງ ເລກທີ 11 ແຕ່ຈຸດເມືອງທ່າແຂກ ຫາ ບ້ານດ່ານປາກເຊ ເມືອງໜອງບົກ ຊຶ່ງມີໄລຍະທາງ 50 ກວ່າກິໂລແມັດ ແລະ ເສັ້ນທາງ ເລກທີ 1Fແຕ່ເມືອງມະຫາໄຊ ຫາ ເມືອງໄຊບົວທອງ ລວມມີໄລຍະທາງ 40 ກວ່າກິໂລແມັດ ຊຶ່ງໃນຈຳນວນ 2 ເສັ້ນທາງດັ່ງກ່າວແມ່ນນອນຢູ່ໃນເສັ້ນທາງຫຼວງແຫ່ງຊາດ ທີ່ໄດ້ຮັບຜົນກະທົບຢ່າງໜັກໜ່ວງ ຊຶ່ງພະແນກໂຍທາທິການ ແລະ ຂົນສົ່ງແຂວງຄຳມ່ວນ ໄດ້ສົມທົບກັບ ກະຊວງ ແລະ ກົມ ທີ່ກ່ຽວຂ້ອງ ໄດ້ລົງສຳຫຼວດ ແລະ ສັງລວມຄືນ ກ່ຽວກັບສະພາບຜົນເສຍຫາຍ ລວມເຖິງການເກັບກຳຂໍ້ມູນ ແລະ ກຳນົດບັນດາໜ້າວຽກ ເພື່ອດຳເນີນການຟື້ນຟູສ້ອມແປງ. 
ໃນປັດຈຸບັນແມ່ນຍັງຢູ່ໃນຂັ້ນຕອນການຄິດໄລ່ ແລະ ປະເມີນມູນຄ່າ ຊຶ່ງພາຍຫຼັງສຳເລັດຂັ້ນຕອນດັ່ງກ່າວແມ່ນຈະໄດ້ຈັດກອງປະຊຸມ ຮ່ວມກັບ ບັນດາພະແນກການ, ຂະແໜງການທີ່ກ່ຽວຂ້ອງປຶກສາຫາລື ເພື່ອຄວາມເປັນເອກະພາບໃນການຈັດຕັ້ງປະຕິບັດ ແລະ ຄາດວ່າຈະໄດ້ເລີ່ມລົງມືຈັດຕັ້ງປະຕິບັດຟື້ນຟູສ້ອມແປງພາຍໃນທ້າຍປີ 2023 ນີ້.
(ຂ່າວ-ພາບ: ກອງຄຳ)