ເຈົ້າແຂວງຫຼວງພະບາງ ລົງຊຸກຍູ້ການປູກກາເຟ ຢູ່ບ້ານຫ້ວຍທອງ

ອາທິດຜ່ານມານີ້, ທ່ານ ຄໍາຂັນ ຈັນທະວີສຸກ ເຈົ້າແຂວງຫຼວງພະບາງ ພ້ອມດ້ວຍທີມງານ ຂອງແຂວງ-ຂອງເມືອງ ໄດ້ລົງຕິດຕາມ, ຊູກຍູ້ການປູກກາເຟໃນຮົ່ມໄມ້ທໍາມະຊາດ ຂອງປະຊາຊົນຢູ່ບ້ານຫ້ວຍທອງເມືອງວຽງຄໍາ. 
ໂອກາດນີ້, ທ່ານ ບຸນເພັງ ນາຍບ້ານຫ້ວຍທອງ ໄດ້ລາຍງານໂດຍຫຍໍ້ວ່າ: ບ້ານຫ້ວຍທອງ ມີ 109 ຄອບຄົວ, ພົນລະເມືອງ 866 ຄົນ ຍິງ 317 ຄົນ ເປັນເຜົ່າມົ້ງ 100% ປະຊາຊົນຢຶດຖືອາຊີບ ປູກຝັງ-ລ້ຽງສັດ ເປັນຕົ້ນຕໍ, ພິເສດແມ່ນການປູກກາເຟໃຕ້ຮົ່ມໄມ້ທໍາມະຊາດ ເປັນອີກໜຶ່ງອາຊີບຂອງປະຊາຊົນພາຍໃນບ້ານ ຊຶ່ງໄດ້ເລີ່ມປູກໃນປີ 2019 ໂດຍການສະໜັບສະໜູນ ຂອງໂຄງການສ້າງຄວາມເຂັ້ມແຂງ ແລະ ພັດທະນາ ກາເຟລາວ ທັງໄດ້ຮັບການຕິດຕາມຊຸກຍູ້ຢ່າງໃກ້ຊິດ ຈາກວິຊາການຂອງຫ້ອງການສິກໍາ ແລະ ປ່າໄມ້ເມືອງ ມາຮອດປັດຈຸບັນ ມີຄອບຄົວປູກກາເຟໃນຮົ່ມໄມ້ທໍາມະຊາດ 17 ຄອບຄົວ, ມີ 2 ໝື່ນ 1 ພັນກວ່າຕົ້ນ, ເນື້ອທີ່ຫຼາຍກວ່າ 8 ເຮັກຕາ, ໃຫ້ໝາກແລ້ວ 2 ເຮັກຕາເຄິ່ງ ຄາດວ່າຈະໄດ້ຮັບຜົນຜະລິດໝາກແດງ ໃນປີນີ້ ຈໍານວນ 1 ໂຕນ, ເພື່ອເປັນການແກ້ໄຂຄວາມທຸກຍາກ, ສ້າງລາຍຮັບທີ່ໝັ້ນຄົງ ອົງການປົກຄອງບ້ານ ມີແຜນການຈະຂະຫຍາຍເນື້ອທີ່ປູກກາເຟໃຫ້ໄດ້ 50 ເຮັກຕາ, ຜະລິດກາເຟໝາກແດງໃຫ້ໄດ້ 100 ໂຕນ ແລະ ສ້າງສູນປຸງແຕ່ງກາເຟ ເພື່ອສ້າງມູນຄ່າເພີ່ມໃຫ້ໄດ້ 1 ສູນ. 
ໂອກາດນີ້ ທ່ານເຈົ້າແຂວງ ໄດ້ຍ້ອງຍໍຊົມເຊີຍຕໍ່ການນໍາພາ-ຊີ້ນໍາ ຂອງອົງການປົກຄອງບ້ານ ພ້ອມທັງມີຄໍາເຫັນຊີ້ນໍາ ໃຫ້ສືບຕໍ່ເສີມຂະຫຍາຍມູນເຊື້ອຜະລິດເປັນສິນຄ້າ ຕິດພັນກັບການຮັກສາປ່າໄມ້ທໍາມະຊາດ ແນໃສ່ເຮັດໃຫ້ປະຊາຊົນ ຫຼຸດພົ້ນອອກຈາກຄວາມທຸກຍາກໄດ້ເທື່ອລະກ້າວ. 
(ຂ່າວ-ພາບ: ບຸນທັນ ໄຊຍະວົງ)