ເຈົ້າແຂວງຜົ້ງສາລີ ລົງເຄື່ອນໄຫວ ແລະ ແນະນຳວຽກ ຢູ່ເມືອງໃໝ່

ໂອກາດນີ້, ທ່ານ ພອນທະວີ ໄຊມົນຕີ ກຳມະການພັກແຂວງ ເລຂາຄະນະບໍລິການງານພັກເມືອງໆໃໝ່ ໄດ້ລາຍງານວ່າ: ໃນໄລຍະ 6 ຜ່ານມາເສດຖະກິດຂອງເມືອງຂະຫຍາຍຕົວສະເລ່ຍ 5.50%, ລວມຍອດຜະລິດຕະພັນພາຍໃນເມືອງບັນລຸ 243.37 ຕື້ກີບ ທຽບໃສ່ແຜນການ ປະຕິບັດໄດ້ 70.30% ສະເລ່ຍຕໍໍ່ຫົວຄົນບັນລຸ 391 ໂດລາສະຫະລັດຕໍ່ຄົນຕໍ່ປີ ຫຼື 8,480,000 ກີບ, ຂະແໜງກະສິກໍາ: ຂະຫຍາຍເພີ່ມຂຶ້ນ 28.65% ສ້າງມູນຄ່າເພີ່ມຕາມລາຄາໃນປັດຈຸບັນໄດ້ 180.98 ຕື້ ກີບ ກວມເອົາ 74.36% ຂອງມູນຄ່າ, ຂະແໜງອຸດສາຫະກໍາ ແລະ ບໍ່ແຮ່: ສາມາດສ້າງມູນຄ່າເພີ່ມຕາມລາຄາໃນປັດຈຸບັນໄດ້ 13.73 ຕື້ກີບ, ກວມເອົາ 5.64% ຂອງມູນຄ່າ, ຂະແໜງການບໍລິການ: ສາມາດສ້າງມູນຄ່າເພີ່ມຕາມລາຄາໃນປັດຈຸບັນໄດ້ 48.65 ຕື້ກີບ ກວມເອົາ 19.99% ຂອງມູນຄ່າ.

ທ່ານ ພົນຕີ ສົມພອນ ມິດຕະພອນ ກໍໄດ້ໃຫ້ກຽດໂອ້ລົມ ເຊິ່ງທ່ານໄດ້ສະແດງຄວາມຊົມເຊີຍ ຕໍ່ຄະນະພັກ ພະນັກງານທຸກຂັ້ນ ທີ່ໄດ້ເອົາໃຈໃສ່ໃນການຈັດຕັ້ງປະຕິບັດ ວຽກງານຂອງຕົນຢ່າງຕັ້ງໜ້າ ເຖິງແມ່ນວ່າສະພາບເສດຖະກິດຂອງປະເທດ ພວມພົບກັບຄວາມຫຍຸ້ງຍາກ ແຕ່ສາມາດຜ່ານຜ່າປະຕິບັດວຽກງານ ສໍາເລັດ ໄດ້ແຕ່ຄຽງຄູ່ກັບຜົນສໍາເລັດ ແລະ ຜົນງານທີ່ຍາດມາໄດ້ນັ້ນ ກໍຍັງມີບັນຫາຄົງຄ້າງ ທີ່ຈະຕ້ອງໄດ້ສືບຕໍ່ເອົາໃຈໃສ່ແກ້ໄຂໃນຕໍ່ໜ້າ ເປັນຕົ້ນ: ສືບຕໍ່ຕັ້ງໜ້າປະຕິບັດແນວທາງຍຸດທະສາດປ້ອງກັນຊາດ-ປ້ອງກັນຄວາມສະຫງົບ, ປັບປຸງ, ກໍ່ສ້າງກໍາລັງ ປກສ-ປກຊ ໃຫ້ກະທັດຮັດ, ມີຄຸນນະພາບ, ຮັບປະກັນຄວາມເຂັ້ມແຂງດ້ານການຈັດຕັ້ງ, ມີລະບຽບວິໄນ, ຍົກສູງຄວາມສາມາດໃນການສະກັດກັ້ນ ແລະ ແກ້ໄຂປະກົດການຫຍໍ້ທໍ້, ເພື່ອຮັບປະກັນໃຫ້ເມືອງ ແລະ ຮາກຖານ ມີສະຖຽນລະພາບດ້ານການເມືອງ, ມີຄວາມສະຫງົບ ແລະ ປອດໄພ ໃນສັງຄົມ ເພື່ອເຮັດໃຫ້ການຈັດຕັ້ງປະຕິບັດແຜນພັດທະນາເສດຖະ ກິດ-ສັງຄົມ ຂອງເມືອງ ຂະຫຍາຍຕົວຢ່າງຕໍ່ເນື່ອງ; ເດັດດ່ຽວແກ້ໄຂບັນດາປະກົດການຫຍໍ້ທໍ້ ທາງດ້ານສັງຄົມໃຫ້ຫຼຸດລົງ; ຕ້ອງເພີ່ມທະວີການຄຸ້ມຄອງ ແລະ ແກ້ໄຂສື່ສັງຄົມອອນລາຍ, ການຕອບໂຕ້, ການແກ້ໄຂເປົ້າໝາຍ ທີ່ກໍຄວາມບໍ່ສະຫງົບ; ຊຸກຍູ້ສົ່ງເສີມການຜະລິດເປັນສິນຄ້າ ແລະ ບໍລິການພາຍໃນໃຫ້ເຂັ້ມແຂງ, ຮັບປະກັນການພັດທະນາແບບຍືນຍົງ; ຈັດຕັ້ງຜັນຂະຫຍາຍທິດຊີ້ນຳຂອງພັກ ໃນການສ້າງເສດຖະກິດເອກະລາດ ເປັນເຈົ້າຕົນເອງ, ເອົາໃຈໃສ່ສົ່ງເສີມການສຶກສາ ໂດຍສະເພາະ ການຮຽນ-ການສອນ; ເປັນເຈົ້າການຜັນຂະຫຍາຍ ໂດຍໃຫ້ສຸມໃສ່ຂຸດຄົ້ນທ່າແຮງບົ່ມຊ້ອນ ພາຍໃນເມືອງ ເພື່ອມາພັດທະນາເສດຖະກິດຂອງເມືອງ ໂດຍສະເພາະ ພື້ນຖານໂຄງລ່າງການຄົມມະນາຄົມຂົນສົ່ງ ໃຫ້ມີຄວາມສະດວກ ພ້ອມທັງເອົາໃຈໃສ່ແກ້ໄຂຄວາມທຸກຍາກຂອງປະຊາຊົນບັນດາເຜົ່າໃຫ້ຫຼຸດໜ້ອຍຖອຍລົງ, ສືບຕໍ່ສຸມໃສຈັດຕັ້ງປະຕິບັດ 2 ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ຢ່າງແຂງແຮງ ແລະ ແທດເຖິງຕາມແຜນການ, ໂຄງການທີ່ກໍານົດໄວ້. ເຕົ້າໂຮມຄວາມສາມັກຄີ ໃຫ້ເປັນປຶກແຜ່ນ ໄປພ້ອມກັບການໂຄສະນາເຜີຍແຜ່ ແນວທາງ ນະໂຍບາຍຂອງພັກ, ລະບຽບກົດໝາຍຂອງລັດ, ກຳແໜ້ນເຊື່ອມຊຶມ ແລະ ຮັບຮູ້ຢ່າງເລິກເຊິ່ງ, ເຊື່ອໝັ້ນຕໍ່ການນໍາພາຂອງພັກ-ລັດ ແລະ ປະກອບສ່ວນໜ້າທີ່ສໍາຄັນເຂົ້າໃນການພັດທະນາປະເທດຊາດ ກໍຄືເມືອງ ໃຫ້ມີຄວາມຈະເລີນ ກ້າວໜ້າ ແລະ ຫຼຸດພົ້ນຈາກຄວາມທຸກຍາກເທື່ອລະກ້າວ.

(ພາບ ຂ່າວ ວັນນວິໄລ)