ເຈົ້າແຂວງຜົ້ງສາລີ ລົງຊຸກຍູ້ສົ່ງເສີມການພັດທະນາເສດຖະກິດ-ສັງຄົມ ບໍລິສັດ ພູຜາໄພສານການຄ້າ.

ໃນວັນທີ 29 ກຸມພາຜ່ານມາ, ທ່ານ ຄໍາຜອຍ ວັນນະສານ ເຈົ້າແຂວງຜົ້ງສາລີ ພ້ອມດ້ວຍຂະແໜງການທີ່ກ່ຽວຂ້ອງ ໄດ້ລົງພົບປະ ແລະ ຊຸກຍູ້ສົ່ງເສີມ ບໍລິສັດ ພູຜາໄພສານການຄ້າຂາເຂົ້າ-ຂາອອກຈໍາກັດຜູ້ດຽວ ໃນການພັດທະນາເສດຖະກິດ-ສັງຄົມຂອງແຂວງຢູ່ເມືອງຂວາ. ໂດຍມີທ່ານ ພອນທະວີ ໄຊມົນຕີ ເຈົ້າເມືອງໆຂວາ ພ້ອມດ້ວຍການນຳເມືອງໃຫ້ການຕ້ອນຮັບ.

ໂອກາດນີ້, ທ່ານ ສຸກຖາວອນ ຈັນທະລັງສີ ຮອງອຳນວຍການບໍລິສັດ ໄດ້ລາຍງານໃຫ້ຮູ້ວ່າ: ບໍລິສັດດັ່ງກ່າວໄດ້ສົ່ງເສີມປະຊາຊົນປູກພືດເປັນສີນຄ້າ: ປີ 2023 ໄດ້ສົ່ງເສີມປູກໝາກງາ ຢູ່ເມືອງຂວາ ມີ 5 ບ້ານ, 45 ຄອບຄົວ, ມີ 14 ເຮັກຕາ, ໄດ້ຜົນຜະລິດທັງໝົດ 28 ໂຕນ ລວມມູນຄ່າທັງໝົດ 336 ລ້ານກີບ. ວຽກງານລ້ຽງສັດ ບໍລິສັດໄດ້ສົ່ງເສີມການລ້ຽງງົວໃຫ້ແກ່ປະຊາຊົນບ້ານ ລາດຊາງ ມີ 7 ຄອບຄົວ, ມີ 12 ແຮງງານ, ມີເນື້ອທີ່ 50 ເຮັກຕ້າ, ມີ ງົວ 50 ໂຕ ລວມມູນຄ່າ 450 ລ້ານກີບ, ຄວາຍ 15 ໂຕ ມີມູນຄ່າ 225 ລ້ານກີບ. ປັດຈຸບັນບໍລິສັດ ໄດ້ປູກຢາງພາລາ 2 ສວນ ຂາຍຢາພາລາ 2 ຄັ້ງ/ເດຶອນ ລວມນໍ້າໜັກ 2,5-3 ໂຕນ. ນອກນັ້ນ, ຍັງໄດ້ສົ່ງເສີມ ກາເຟ, ໂຮງງານດິນບລອກ, ເກັບຊື້ເຄື່ອງປ່າຂອງດົງ ແລະ ສົ່ງເສີມກິດຈະກໍາອື່ນໆ ສ້າງລາຍຮັບໃຫ້ບໍລິສັດ ແລະ ປະຊາຊົນ ຢ່າງເໜາະສົມ.. 

ໂອກາດນີ້, ທ່ານ ເຈົ້າແຂວງ ໄດ້ສະແດງຄວາມຊົມເຊີຍ ຕໍ່ທາງບໍລິສັດ ທີ່ຈັດຕັ້ງປະຕິບັດຫຼາຍຈິດຈະກຳ ຊຶ່ງມັນໄດ້ປະກອນສ່ວນອັນສຳຄັນໃນການພັດທະນາເສດຖະກິດສັງຄົມຂອງແຂວງ, ເມືອງ ກໍຄືຂອງຄອບຄົວ ໃຫ້ມີລາຍຮັບເປັນປົກກະຕິ ທັງໄດ້ສ້າງວຽກງານເຮັດງານທຳໃຫ້ແກ່ປະຊາຊົນເຂດດັ່ງກ່າວຕື່ມອີກ ພ້ອມກັ້ນນັ້ນທ່ານໄດ້ເນັ້ນໃຫ້ ອົງການປົກຄອງເມືອງຕ້ອງໃຫ້ຄວາມໃກ້ສິດ ແລະ ອໍານວຍຄວາມສະດວກທາງດ້ານຕ່າງໆໃນການຈັດຕັ້ງປະຕິບັດ ຕໍ່ກັບບໍລິສັດໃຫ້ໃຫ້ສືບຕໍ່ຮັກສາອາຊີບ, ທຸລະກິດທີ່ມີຢູ່ແລ້ວ ແລະ ສືບຕໍ່ເພີ້ມອາຊີບທີ່ເຫັນວ່າຍັງມີທ່າແຮງເປັນຕົ້ນການລ້ຽງໝູ ແລະ ປາເປັນສິ້ນຄ້າ, ຊ່ວຍສົ່ງເສີມປະຊາຊົນເຂດດັ່ງກ່າວມີວຽກເຮັດງານທຳ, ເພື່ອໃຫ້ເຂົາເຈົ້າມີອາຊີບທີ່ໜັ້ນຄົງ ແລະ ຖາວອນ, ສາມາດສ້າງລາຍຮັບເຂົ້າສູ່ຄອບຄົວເປັນປົກະຕິ ຫຼຸດພົ້ນອອກຈາກຄວາມທຸກຍາກເທື່ອລະກ້າວ.

(ພາບ-ຂ່າວ: ແສງຄຳ ສາລີວັນ)