ເຈົ້າແຂວງສາລະວັນອວຍພອນນາຍ ແລະພົນທະຫານກອງຮ້ອຍທະຫານຊາຍແດນ 512 

ໃນວັນທີ 15ມັງກອນຜ່ານມາ, ທ່ານ ດາວວົງ ພອນແກ້ວ ເຈົ້າແຂວງສາລະວັນປະທານຄະນະກຳມະການປ້ອງກັນຊາດ(ປກຊ)-ປ້ອງກັນຄວາມສະຫງົບ(ປກສ)ຂັ້ນແຂວງ, ມີທ່ານ ທອງດີ ຈັນທະວົງ ເຈົ້າເມືອງລະຄອນເພັງ ພ້ອມດ້ວຍການນໍາແຂວງ, ເມືອງ, ຄະນະພັກ-ຄະນະບັນຊາກອງບັນຊາການປກຊ-ປກສ ແຂວງ ພ້ອມດ້ວຍພະແນກການອ້ອມຂ້າງແຂວງໄດ້ເຄື່ອນໄຫວຢ້ຽມຢາມອວຍພອນນາຍ ແລະພົນທະຫານກອງຮ້ອຍທະຫານຊາຍແດນ 512 ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ.
ໃນໂອກາດດັ່ງກ່າວ, ທ່ານເຈົ້າແຂວງໄດ້ສະແດງຄວາມຢື້ຢາມຖາມຂ່າວ ແລະ ນໍາເອົາຄວາມອົບອຸ່ນມາສູ່ນາຍ ແລະ ພົນທະຫານທີ່ໄດ້ປະຕິບັດໜ້າທີ່ຢູ່ຮາກຖານທ້ອງຖິ່ນ, ອຸທິດເຫື່ອແຮງ, ສະຕິປັນຍາເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຕະຫຼອດໄລຍະຜ່ານມາ, ເຮັດໃຫ້ທົ່ວສັງຄົມມີຄວາມສະຫງົບ, ມີຄວາມເປັນລະບຽບຮຽບຮ້ອຍໂດຍພື້ນຖານ ພ້ອມທັງເນັ້ນໃຫ້ສືບຕໍ່ເອົາໃຈໃສ່ໃນການປະຕິບັດໜ້າທີ່ໆພັກ ແລະ ລັດ ກໍຄືປະຊາຊົນມອບໝາຍໃຫ້ຢ່າງມີຜົນສຳເລັດຍິ່ງໃຫຍ່ກວ່າເກົ່າ, ສຸມໃສ່ໃນການຝຶກຊ້ອມ, ຫັດແອບສີລະປະຍຸດ, ຍຸດທະວິທີ, ວິທະຍາສາດ, ທິດສະດີຕ່າງໆໃຫ້ເຂັ້ມແຂງ, ແຂງແຮງ, ປະຕິບັດໜ້າທີ່ຕາມແຜນງານທີ່ໄດ້ກໍານົດໄວ້, ກໍາໃຫ້ໄດ້ 3 ທາດແທ້, 6 ມູນເຊື້ອອັນສະຫງ່າຂອງກອງທັບປະຊາຊົນລາວ ຄຽງຄູ່ກັບການພັດທະນາກໍາລັງໃຫ້ມີຄວາມເຂັ້ມແຂງ, ທັນສະໄໝ,ສຸມໃສ່ຮັກສາຄວາມເປັນລະບຽບຮຽບຮ້ອຍຂອງສັງຄົມກໍຄືບໍລິເວນຊາຍແດນ ແລະ ວຽກງານອື່ນໆ.
    ຈາກນັ້ນ, ທ່ານເຈົ້າແຂວງສາລະວັນພ້ອມຄະນະໄດ້ລົງເຄື່ອນໄຫວຢູ່ 3 ຈຸດ ທີ່ຂຶ້ນກັບກອງຮ້ອຍທະຫານຊາຍແດນ 512 ເປັນຕົ້ນປ້ອມຫ້ວຍໂດນ, ປ້ອມຫ້ວຍສະນານ ແລະ ກອງຮ້ອຍ. ໂອກາດນີ້ໄດ້ມອບກະຕ່າຂອງຂັວນ, ກ່າວຄໍາອວຍພອນ ແລະ ມອບປັດໃຈຈຳນວນໜຶ່ງ ພ້ອມທັງປະກອບສ່ວນຊາຍ-ແຮ່ ແລະ ປູນ ເພື່ອສ້າງປະຕູເຂົ້າຄ້າຍໃຫ້ກອງຮ້ອຍທະຫານຊາຍແດນ 512 ຕາງໜ້າຮັບໂດຍທ່ານ ຮ້ອຍເອກ ຄໍາມະນີ ພົມມະສຸລິນ ຫົວໜ້າການທະຫານກອງຮ້ອຍທະຫານຊາຍແດນ 512 ພ້ອມດ້ວຍຄະນະ.
ຂ່າວ-ພາບ: ວິໄລວອນ ສິດທິໄຊ