ເຈົ້າແຂວງສະຫວັນະເຂດ ເນັ້ນໃຫ້ປະຊາຊົນບ້ານນາໂພ, ບ້ານສົ້ມປ່ອຍປູກພືດຜັກໃຫ້ພຽງພໍກັບຄວາມຕ້ອງການຂອງຕະຫຼາດ.

ຕາມການລາຍງານຂອງນາຍບ້ານນາໂພ ໃຫ້ຮູ້ວ່າ: ບ້ານນາໂພ ມີ 181 ຄອບຄົວ ພົນລະເມືອງ 1,156 ຄົນ ຍິງ 625 ຄົນ, ປະຊາຊົນມີອາຊີບເຮັດນາເປັນຕົ້ນຕໍ ແລະ ປູກພືດຜັກເປັນສຳຮອງ, ໃນລະດູແລ້ງແມ່ນປູກພືດຜັກເພື່ອຂາຍເປັນສິນຄ້າ. ພືດຜັກທີ່ປູກສ່ວນຫຼາຍແມ່ນຫອມປ້ອມ, ຫອມລາບ, ຜັກບົ່ວ, ຜັກບົ້ງ, ສະລັດ, ໝາກເລັ່ນ, ໝາກຖົ່ວ, ໝາກແຕງ ແລະ ອື່ນໆ. ສະເພາະໃນລະດູຝົນແມ່ນມີ 26 ຄອບຄົວ ມີເນື້ອທີ່ 5 ເຮັກຕາກ່ວາ, ແຕ່ຍັງປູກແບບທຳມະຊາດ ບໍທັນສ້າງເຮືອນຮົ່ມ. ຈາກນັ້ນ, ທ່ານເຈົ້າແຂວງ ພ້ອມຄະນະ ກໍໄດ້ໄປພົບປະຢ້ຽມຢາມປະຊາຊົນ ກຸ່ມປູກຜັກ ບ້ານສົ້ມປ່ອຍ, ບ້ານດັ່ງກ່າວ ມີ 187 ຄອບຄົວ 227 ຫຼັງຄາເຮືອນ, ມີພົນລະເມືອງທັງໝົດ 1,070 ຄົນ ຍິງ 547 ຄົນ, ທົ່ວບ້ານມີເນື້ອທີ່ນາປີ 512 ເຮັກຕາ, ເນື້ອທີ່ສວນທົ່ວໄປ 18 ເຮັກຕາ, ເນື້ອທີ່ປູກພືດຜັກ 18 ເຮັກຕາ ສາມາດຜະລິດສົ່ງຂາຍຕະຫຼາດໃນແຕ່ລະວັນ ໄດ້ 1.600 ກິໂລ, ສ່ວນຫຼາຍແມ່ນຜັກບົວລະພາ, ຫອມລາບທົ່ວໄປ, ຫອມປ້ອມ, ຜັກບົ້ງ ແລະ ອື່ນໆ. ໃນລະດູແລ້ງ ປະຊາຊົນກໍປູກພືດຜັກຫຼາຍຂຶ້ນ ເພາະປູກຕາມແຄມແມ່ນ້ຳຂອງ ລວມມີຜັກກາດ ຜັກຊີ, ສາລີ, ໝາກຮຸ່ງ ແລະ ພືດຜັກຕ່າງໆ.

ໂອກາດນີ້, ທ່ານເຈົ້າແຂວງສະຫວັນະເຂດ ໄດ້ຍົກໃຫ້ເຫັນວ່າ: ການລົງມາພົບປະຢ້ຽມຢາມປະຊາຊົນໃນຄັ້ງນີ້ ກໍເພື່ອເປັນການຕິດຕາມເບິ່ງສະພາບການປູກພືດຜັກຂອງປະຊາຊົນ ແລະ ທ່າແຮງ ຂອງບັນດາບ້ານທີ່ຢູ່ອ້ອມຂ້າງເທດສະບານນະຄອນໄກສອນພົມວິຫານ ກໍຄືເທດສະບານແຂວງສະຫວັນະເຂດ. ມາເບິ່ງຕົວຈິງ ການຜະລິດຂອງປະຊາຊົນແຕ່ລະທ້ອງຖິ່ນ ເພື່ອໃຫ້ພຽງພໍກັບຄວາມຕ້ອງການຂອງຕະຫຼາດພາຍໃນ;

ປັດຈຸບັນຢູ່ຕາມທ້ອງຕະຫຼາດ ບາງພືດຜັກກໍຍັງນຳເຂົ້າຈາກແຂວງອ້ອມຂ້າງ ແລະ ຈາກຕ່າງປະເທດເປັນສ່ວນຫຼາຍ, ສະເພາະຜັກທີ່ໃຊ້ປະຈຳວັນ ມີຜັກບົ່ວ, ຫອມປ້ອມ ແມ່ນມີຄວາມຕ້ອງການ 600 ກິໂລຕໍ່ວັນ. ນອກນັ້ນ, ກໍມີໝາກຖົ່ວ, ໝາກແຕງ, ໝາກເຜັດ ແລະ ພືດຜັກອື່ນໆ. ສະເພາະປະຊາຊົນບ້ານນາໂພ ແລະ ບ້ານສົ້ມປ່ອຍ ກໍມີທ່າແຮງຢູ່ແລ້ວ, ມີຫຼາຍຄອບຄົວທີ່ປູກຜັກສົ່ງຂາຍຕະຫຼາດ ແລະ ເພື່ອຕ້ອງການໃຫ້ພຽງພໍກັບຄວາມຕ້ອງການຂອງຕະຫຼາດ ປະຊາຊົນກໍຕ້ອງໄດ້ປູກໃຫ້ຫຼາຍຂຶ້ນຕື່ມ, ພ້ອມກັນສ້າງຕັ້ງເປັນກຸ່ມ ເປັນສະຫະກອນ, ມີການຈັດຕັ້ງ, ມີການແບ່ງງານ ໝູນວຽນກັນປູກ, ໃຫ້ພະແນກກະສິກຳ ແລະ ປ່າໄມ້ ສົມທົບກັບນະຄອນໄກສອນພົມວິຫານ ຊຸກຍູ້ຊ່ວຍດ້ານວິຊາການ ແລະ ການປັບປຸງດິນ, ຄວາມຕ້ອງການກັບການສະໜອງໃຫ້ເປັນລະບົບ, ເປັນຕ່ອງໂສ້, ກ່ຽວກັບການສ້າງຕັ້ງສະຫະກອນ ຈາກກຸ່ມ ຕ້ອງຂະຫຍາຍສະມາຊິກໃຫ້ຫຼາຍຂຶ້ນ ມີການຍົກລະດັບບໍລິຫານ ມີແຜນຜະລິດຮ່ວມກັນ ບົນພື້ນຖານຂອງຕະຫຼາດ, ປູກພືດຜັກໃຫ້ຕໍ່ເນື່ອງ, ໃນລະດູຝົນກໍປູກຜັກແບບເຮືອນຮົ່ມ ໂດຍນຳໃຊ້ດິນກະສິກຳຂອງບ້ານ, ເພື່ອໃຫ້ພຽງພໍກັບຄວາມຕ້ອງການຂອງຕະຫຼາດໃນແຕ່ລະວັນ, ນອກຈາກເປັນສິນຄ້າສົ່ງພາຍໃນ-ຫຼຸດຜ່ອນການນຳເຂົ້າແລ້ວ, ປະຊາຊົນກໍ່ຈະມີວຽກເຮັດງານທຳທີ່ແນ່ນອນ ມີລາຍຮັບເປັນປົກກະຕິ.

(ຂ່າວ: ສະຫວັນ)