 |
ໃນການລົງເຄື່ອນໄຫວຄັ້ງນີ້, ທ່ານເຈົ້າແຂວງ ໄດ້ຮັບຟັງການລາຍງານສະພາບນໍ້າຖ້ວມຈາກຄະນະນໍາຂອງເມືອງ ໃຫ້ຮູ້ວ່າ: ບ້ານທີ່ໄດ້ຮັບຜົນກະທົບ (ນໍ້າຖ້ວມຫຼັງຄາເຮືອນ) ຈໍານວນ 5 ບ້ານ ຄື: ບ້ານທ່າຄໍາເຫຼື້ອມ, ນາຈານໃຫຍ່, ກອງປະທຸມວັນ, ດອນຍາໂນງ ແລະ ບ້ານເມືອງໂຮງ, ມີ 585 ຄອບຄົວ, ມີພົນລະເມືອງ 3,324 ຄົນ ຍິງ 1,748 ຄົນ, ເນື້ອທີ່ນາປີ ໄດ້ຮັບຜົນກະທົບໃນເບື້ອງຕົ້ນ ມີ 30 ບ້ານ, ເນື້ອທີ່ນາຖືກນໍ້າຖ້ວມ: ມີເນື້ອທີ່ນາຫວ່ານ 6,573.76 ເຮັກຕາ, ນາກ້າ (ແນວພັນ) 52 ໂຕນ, ຄອບຄົວໄດ້ຮັບຜົນກະທົບ 4,684 ຄອບຄົວ. ສັດລ້ຽງ ປະພດ ງົວ, ຄວາຍ, ແບ້ ຂອງປະຊາຊົນແມ່ນໄດ້ເຄື່ອນໄປໄວ້ບ່ອນທີ່ສູງ ແລະ ປອດໄພເປັນສ່ວນຫຼາຍ. ໜອງປາຂອງປະຊາຊົນມີ 117 ໜອງ, ໜອງລວມບ້ານ 3 ໜອງ. ຊົນລະປະທານຖືກຖ້ວມ 4 ແຫ່ງ, ໂຮງຮຽນ 4 ແຫ່ງ (ກອງປະທຸມວັນ, ທ່າຄໍາເຫຼື້ອມ, ເມືອງໂຮງ, ນາຈານໃຫຍ່) ແລະ ດ້ານພື້ນຖານໂຄງລ່າງອື່ນໆ ເສຍຫາຍຈໍານວນໜຶ່ງ.
 |
ໂອກາດນີ້, ທ່ານເຈົ້າແຂວງ ໄດ້ມີຄຳເຫັນຊີ້ນຳໃຫ້ຄະນະພັກ - ອົງການປົກຄອງເມືອງ ກໍຄືຄະນະກຳມະການຄຸ້ມຄອງໄພພິບັດແຕ່ລະຂັ້ນຂອງເມືອງເອົາໃຈໃສ່ຕິດຕາມ ແລະ ເຝົ້າລະວັງ ລະດັບນ້້າເຊບັ້ງຫຽງ, ເຊຊັງຊອຍ ພ້ອມທັງ ກະກຽມເຮືອ, ເສື້ອສຸຊີບ ແລະ ກຳນົດຈຸດເຄື່ອນຍ້າຍປະຊາຊົນ, ສັດລ້ຽງ ແລະ ເຄື່ອງເຮືອນໃຫ້ທັນສະພາບການ ແລະ ແຜນການຮັບມືອື່ນໆອີກ, ພາຍຫຼັງນ້ຳບົກແຫ້ງແລ້ວ ມອບໃຫ້ຫ້ອງການກະສິກຳ ແລະ ປ່າໄມ້ເມືອງ ແລະ ພາກສ່ວນທີ່ກ່ຽວຂ້ອງ ສະ ໜອງແນວພັນເຂົ້າ, ແນວພັນອື່ນໆ ແລະ ເກັບກຳຂໍ້ມູນຜົນເສຍຫາຍ. ໂອກາດນີ້, ທ່ານເຈົ້າແຂວງ ກໍໄດ້ມອບໝີ່, ປາກະປ໋ອງ, ນ້ຳດື່ມ ລວມມູນຄ່າ 71,300,000 ກີບ. ໃຫ້ອໍານາດການປົກຄອງເມືອງ ແລະ ບ້ານເມືອງໂຮງ ເພື່ອນໍາໄປແກຢາຍໃຫ້ກັບຄອບຄົວທີ່ໄດ້ຮັບຜົນກະທົບ. ພ້ອມນີ້ພະແນກກະສິກໍາ ແລະ ປ່າໄມ້ແຂວງ ກໍໄດ້ມອບແນວພັນເຂົ້າ ຈໍານວນ 10 ກະສອບ. ໃຫ້ເມືອງເພື່ອນໍາໄປແຈກຢາຍໃຫ້ກັບບ້ານທີ່ໄດ້ຮັບຜົນກະທົບ.
(ແຫຼ່ງຂ່າວ: ແຂວງສະຫວັນນະເຂດ)
ຄໍາເຫັນ