ເຈົ້າໜ້າທີ່ແຂວງຄຳມ່ວນ ລົງກວດກາການກໍ່ສ້າງອຸໂມງຂອງບໍລິສັດ ຊີໂນ-ອາກຣີ ໂປຕາສ ຈໍາກັດ

ທ່ານ ຄໍາປ່ຽນມະນີຄໍາ ຮອງຫົວໜ້າພະແນກ ພະລັງງານ ແລະ ບໍ່ແຮ່ ແຂວງຄໍາມ່ວນ ພ້ອມດ້ວຍພາກສ່ວນທີ່ກ່ຽວຂ້ອງຂອງແຂວງ ລົງກວດກາການຂຸດເຈາະ ເພື່ອກໍ່ສ້າງອຸໂມງຂຸດຄົ້ນແຮ່ທາດແຫ່ງໃໝ່ ຂອງບໍລິສັດ ຊີໂນ-ອາກຣີ ໂປຕາສ ຈໍາກັດ ຢູ່ບ້ານດົງໃຕ້ເມືອງທ່າແຂກ ແຂວງຄໍາມ່ວນ ໃນວັນທີ 6 ພະຈິກ ຜ່ານມາ, ເພື່ອເກັບກໍາຂໍ້ມູນຢູ່ພາກສະໜາມຕົວຈິງ ກ່ຽວກັບເຫດການ ທີ່ມີນໍ້າໄຫຼເຂົ້າໃນອຸໂມງ ໃນຕອນເຊົ້າຂອງວັນທີ 3 ພະຈິກຜ່ານມາ ໂດຍໄດ້ມີຄົນງານຢູ່ໃນເຫດການຕື່ນຕົກໃຈ, ກະວົນກະວາຍ ແລະໄດ້ຖ່າຍຄລິບວິດີໂອລົງສື່ອອນລາຍ ເຮັດໃຫ້ສັງຄົມແຕກຕື່ນ.
ທ່ານ ຈາງ ເຫຼີຍ ຜູ້ຈັດການໂຄງການ ກໍ່ສ້າງອຸໂມງເນີ້ງເບີ 03 ຂອງບໍລິສັດ ຊີໂນ-ອາກຣີ ໂປຕາສ ຈໍາກັດ ໄດ້ລາຍງານວ່າ: ການກໍ່ສ້າງອຸໂມງເນີ້ງຫຼັກ (ອຸໂມງສາຍພານ) ເບີ 03 ຂອງໂຄງການຂຸດຄົ້ນ ແລະ ປຸງແຕ່ງເກືອໂປຕາສ ໄດ້ຊຸກຍູ້ການກໍ່ສ້າງຂະຫຍາຍໂຄງການຝຸ່ນໂປຕາສ ຢ່າງເປັນລະບົບ ຕາມຂັ້ນຕອນ ຊຶ່ງໃນນັ້ນໂຄງການກໍ່ສ້າງອຸໂມງເນີ້ງຫຼັກເບີ 03 ແມ່ນໜຶ່ງໃນໂຄງການວິສະກໍາກໍ່ສ້າງບໍ່ແຮ່ ພາກຂະຫຍາຍໂຄງການຂອງບໍລິສັດ, ປັດຈຸບັນ ພວມຢູ່ໃນໄລຍະການກໍ່ສ້າງອຸໂມງ. ເນື່ອງຈາກລັກສະນະພິເສດ ດ້ານໂຄງສ້າງທໍລະນີສາດ ຂອງປະເທດລາວ ໃນໂຄງການກໍ່ສ້າງອຸໂມງແຫ່ງດັ່ງກ່າວນີ້ ມີນໍ້າໄຫຼເຂົ້າໃນອຸໂມງ ແມ່ນເປັນປະກົດການປົກກະຕິທົ່ວໄປ. ໃນຕອນເຊົ້າຂອງວັນທີ 3 ພະຈິກ 2023 ໃນການກໍ່ສ້າງອຸໂມງເນີ້ງຫຼັກເບີ 03 ມີສະພາບນໍ້າໄຫຼເຂົ້າໃນອຸໂມງ ຍ້ອນການຂຸດເຈາະສ້າງອຸໂມງ ໄດ້ພົບຊັ້ນຫີນດິນດານ-ຫີນຕົມອ່ອນທີ່ມີນໍ້າ ແລະ ແຖບໂຄງສ້າງທໍລະນີສາດຜຸພັງ-ແຕກຫັກ ທີ່ເປັນຜົ້ງນໍ້າໃຕ້ດິນ, ການເຈາະສ້າງອຸມົງຜ່ານຊັ້ນດັ່ງກ່າວ ໂຄງສ້າງທໍລະນີສາດມີການປ່ຽນແປງແບບສະໝໍ່າສະເໝີ, ຜ່ານການຂຸດເຈາະຢ່າງຕໍ່ເນື່ອງ ຈຶ່ງເຮັດໃຫ້ມີນໍ້າໄຫຼເຂົ້າໃນອຸໂມງ. ໃນໄລຍະ 5 ນາທີເບື້ອງຕົ້ນ ມີປະລິມານນ້ຳໄຫຼອອກເຖິງ 140 ແມັດກ້ອນ/ຊົ່ວໂມງ, ພາຍຫຼັງເລີ່ມຄົງທີ່ແລ້ວ, ໄລຍະ 10 ນາທີ ປະລິມານນໍ້າຫຼຸດລົງເຫຼືອພຽງ 10-15 ແມັດກ້ອນ/ຊົ່ວໂມງ, ຜ່ານການລະບາຍນ້ຳເປັນເວລາ 3 ຊົ່ວໂມງ ໜ້າງານໄດ້ກັບສູ່ສະພາບເດີມ. ປັດຈຸບັນ ພວມຂຸ້ນຂ້ຽວເລັ່ງຈັດຕັ້ງມາດຕະການແກ້ໄຂ, ຫຼັງຈາກແກ້ໄຂໄລຍະດັ່ງກ່າວນີ້ສໍາເລັດແລ້ວ ຈະສືບຕໍ່ຂຸດເຈາະສ້າງອຸໂມງຊ່ວງຕໍ່ໄປ.
ທ່ານ ຈາງ ເຫຼີຍ ກ່າວຕື່ມວ່າ: ໃນຂະບວນການກໍ່ສ້າງບໍ່ແຮ່ກ່ອນໜ້ານີ້, ບໍລິສັດ ຊີໂນ-ອາກຣີ ໂປຕາສ ກໍເຄີຍໄດ້ພົບກໍລະນີທີ່ຄ້າຍໆກັນນີ້ຫຼາຍຄັ້ງ ຊຶ່ງບໍ່ໄດ້ສ້າງຜົນເສຍຫາຍຕໍ່ຊັບສິນ ແລະ ຊີວິດຄົນງານຂອງບໍລິສັດ. ມີຫຼາຍໜ່ວຍງານການກໍ່ສ້າງລະດັບມືອາຊີບ ແລະ ອາວຸໂສ ເຄີຍນໍາໃຊ້ເຕັກນິກວີທີການແກ້ໄຂ ແບບທົ່ວໄປ ແບບດັ່ງເດີມ ຄືເມື່ອກ່ອນແມ່ນບໍ່ສາມາດແກ້ໄຂໄດ້, ຍິ່ງເຮັດໃຫ້ບັນຫານ້ຳໄຫຼເຂົ້າໜັກຂຶ້ນ. ສະນັ້ນ, ຕໍ່ບັນຫາດັ່ງກ່າວນີ້ ຜ່ານມາບໍລິສັດໄດ້ສົມທົບກັບຊ່ຽວຊານເຮັດການສຶກສາ, ຄົ້ນຄວ້າເຕັກນິກວິທີການແກ້ໄຂ, ປະຕິບັດຕົວຈິງ ແລະ ສະຫຼຸບປະສົບການ ການປະຕິບັດຕົວຈິງ ແລະ ໄດ້ປະດິດສ້າງມາດຕະການແກ້ໄຂ ບັນຫານ້ຳໄຫຼເຂົ້າອຸໂມງ ທີ່ແທດເໝາະກັບບໍ່ແຮ່ເກືອໂປຕາສ ຢູ່ລາວ. ປັດຈຸບັນນີ້, ບໍລິສັດມີອຸໂມງເນີ້ງທີ່ເປີດນໍາໃຊ້ແລ້ວຈໍານວນ 3 ອຸໂມງ ແລະ ພວມດໍາເນີນການກໍ່ສ້າງອຸໂມງເນີ້ງທີ 04. 
ບໍລິສັດ ຊີໂນ-ອາກຣີ ໂປຕາສ ມີຄວາມເຂັ້ມແຂງທາງດ້ານທຶນຮອນ, ເຕັກນິກ ແລະ ທີມງານວິຊາການ ຊຶ່ງຜ່ານມາສາມາດປະສົບຜົນສໍາເລັດສູງ ໃນການຂະຫຍາຍກໍາລັງການຜະລິດ 1 ລ້ານໂຕນທຸກໆປີ. ບໍລິສັດມີຄວາມພ້ອມທຸກດ້ານ ໃນການແກ້ໄຂບັນຫາທີ່ພົບພໍ້ ໃນການກໍ່ສ້າງອຸໂມງແຫ່ງດັ່ງກ່າວນີ້ ແລະ ຮັບປະກັນໃຫ້ໂຄງການກໍ່ສ້າງດັ່ງກ່າວ ສໍາເລັດຕາມແຜນໂດຍຮັບປະກັນດ້ານຄວາມປອດໄພ, ມີປະສິດທິພາບສູງ ແລະ ມີຄຸນນະພາບສູງ.
ໃນການລົງໄປກວດກາຂອງຄະນະຄັ້ງນີ້ ໄດ້ຄວາມຮ່ວມມືກັບບໍລິສັດ ເກັບກໍາຂໍ້ມູນຢູ່ພາກສະໜາມຕົວຈິງ ແລະ ໄດ້ສອບຖາມຄົນງານຢູ່ໃນເຫດການ ແລະ ຜູ້ຖ່າຍຄລິບວິດີໂອລົງສື່ອອນລາຍ ພ້ອມທັງໄດ້ແລກປ່ຽນຄໍາຄິດເຫັນທາງດ້ານວິຊາການຊຶ່ງກັນ ແລະ ກັນຢ່າງກົງໄປກົງມາ. ຜ່ານການກວດກາ ແລະ ເກັບກໍາຂໍ້ມູນພາກສະໜາມ ເຫັນວ່າເຫດການທີ່ເກີດຂຶ້ນ ແມ່ນສອດຄ່ອງຕາມທີ່ບໍລິສັດໄດ້ລາຍງານຂ້າງເທິງ ແລະ ຍ້ອນຄົນງານບໍລິສັດ ຮັບເໝົາກໍ່ສ້າງ ມີຄວາມຮັບຮູ້ຈຳກັດ ຕໍ່ຂະບວນການກໍ່ສ້າງອຸໂມງຂຸດຄົ້ນແຮ່ໃຕ້ດິນ ແລະ ປະກົດການທີ່ຈະພົບພໍ້ໃນການກໍ່ສ້າງອຸໂມງໃຕ້ດິນ ຈຶ່ງເຮັດໃຫ້ມີສະພາບການຕື່ນຕົກໃຈ, ກະວົນກະວາຍ ແລະ ເຮັດໃຫ້ວິດີໂອເຜີຍແຜ່ອອກສູ່ພາຍນອກ.
(ຂ່າວ-ພາບ: ຂປລ)