 |
ໃນພິທີ, ໄດ້ມີການລາຍງານຫຍໍ້ ກ່ຽວກັບໂຄງການ ສໍາຫຼວດ-ອອກແບບ ກໍ່ສ້າງເສັ້ນທາງວົງແຫວນອ້ອມຮອບນະຄອນ ຫຼວງພະບາງ - ເມືອງຈອມເພັດ ພ້ອມຂົວຂ້າມນໍ້າຂອງ 1 ແຫ່ງ, ມີລວງຍາວ 80 ກິໂລແມັດ, ເປັນການພັດທະນາເສດຖະກິດ-ສັງຄົມ ຂອງແຂວງຫຼວງພະບາງ, ເຮັດໃຫ້ການຄົມມະນາຄົມຂົນສົ່ງມີຄວາມສະດວກຍິ່ງຂຶ້ນ. ຜ່ານມາຄະນະນຳພະແນກໂຍທາທິການ ແລະ ຂົນສົ່ງແຂວງ ໄດ້ຄົ້ນຄວ້າທາງດ້ານວິຊາການ ເຫັນວ່ານະຄອນ ຫຼວງພະບາງ ມີລະບົບຕາໜ່າງເສັ້ນທາງຂັບແຄບຫຼາຍ, ແຕ່ບໍ່ມີທາງວົງແຫວນ ມີແຕ່ທາງຜ່ານ, ເມື່ອມີລົດຕິດ ບໍ່ສາມາດລະບາຍໄປສູ່ອີກຈຸດອື່ນໄດ້, ຖ້າບໍ່ວາງແຜນ ແລະ ກໍ່ສ້າງຂະຫຍາຍເສັ້ນທາງວົງແຫວນໃນໄລຍະນີ້, ໃນອານາຄົດ 20-50 ປີ, ຕົວເມືອງຫຼວງພະບາງຈະກາຍເປັນເມືອງແອອັດ-ທາງຕັນ ເຖິງຂັ້ນອຳມະພາດດ້ານການຂົນສົ່ງໄດ້. ດ້ານວິຊາການເຫັນວ່າ ຄວນຈະໄດ້ກໍ່ສ້າງເສັ້ນທາງວົງແຫວນ ແລະ ມີຄວາມຈຳເປັນແທ້ໆໃນອານະຄົດ. ສໍາລັບແລວທາງ ຂອງທາງວົງແຫວນໄດ້ສຶກສາແລ້ວ, ເຫັນວ່າມີຄວາມເປັນໄປໄດ້ ເນື່ອງຈາກຫຼາຍຈຸດກໍມີທາງເກົ່າແລ້ວ, ຍັງແຕ່ບາງຈຸດໂດຍສະເພາະຈາກເສັ້ນທາງ 2501 ຫຼວງພະບາງ ຫາ ຕາດກວາງຊີ ເພື່ອເຊື່ອມຕໍ່ກັບທາງ 13 ເໜືອ ແລະ ຂົວຂ້າມນໍ້າຂອງ ອິກ 1 ແຫ່ງ ລວມລວງຍາວຂອງເສັ້ນທາງວົງແຫວນ ນັບທັງເສັ້ນທາງທີ່ມີແລ້ວ ແລະ ຕ້ອງຕັດໃໝ່ ມີທັງໝົດ 80 ກິໂລແມັດ.
ການສຳຫຼວດ-ອອກແບບ ແລະ ສຶກສາຄວາມເປັນໄປໄດ້ມີໄລຍະ 1 ປີ; ໂດຍມອບໃຫ້ ບໍລິສັດລາວສຳພັນພັດທະນາ ຈຳກັດຜູ້ດຽວ ເປັນຜູ້ລົງທືນໃນການສຳຫຼວດ-ອອແບບ, ຄິດໄລ່ປະເມີນມູນຄ່າໂຄງການ, ຂຽນບົດວິພາກເສດຖະກິດ-ເຕັກນິກ, ສຶກສາຜົນກະທົບສິ່ງແວດລ້ອມ-ສັງຄົມ ເສັ້ນທາງວົງແຫວນອ້ອມຮອບນະຄອນ ຫຼວງພະບາງ ແລະ ເມືອງຈອມເພັດ, ສ່ວນຂົວຂ້າມນໍ້າຂອງ ພາຍຫຼັງສຳເລັດການກໍ່ສ້າງເສັ້ນທາງແລ້ວ ອາດຈະນໍາໃຊ້ເຮືອບັກກ່ອນ. ຈາກນັ້ນ, ຂໍການຊ່ວຍເຫຼືອທຶນກູ້ຢືມຈາກແຫຼ່ງທຶນອຶ່ນໆ ຫຼື ອາດໃຫ້ບໍລິສັດເຮັດການລົງທຶນຮູບແບບ BOT ເພື່ອຄວາມຍືນຍົງ.
ການລົງນາມໃນສັນຍາໂດຍແມ່ນ ທ່ານ ບຼົ່ງວ່າງ ຫວ່າງເຈຍຊາ ຫົວໜ້າພະແນກໂຍທາທິການ ແລະ ຂົນສົ່ງແຂວງ ແລະ ທ່ານ ສາຍສຳພັນ ຈັນມະວົງ ປະທານບໍລິສັດລາວສຳພັນພັດທະນາ ຈຳກັດຜູ້ດຽວ ໂດຍມີຜູ້ເຂົ້າຮ່ວມ ເປັນສັກຂີພິຍານ.
(ຂ່າວ: ອາພຸດເດດ ບຸບຜາ, ພາບ: ດາວອນ ມະນີວັນ)
ຄໍາເຫັນ