ຈີນ ຮຽກຮ້ອງໃຫ້ທົບທວນຄືນຄຳໝັ້ນສັນຍາໃນການຊຸກຍູ້ ແລະ ປົກປ້ອງສິດທິມະນຸດ
ຂ່າວສານຊີອາໄອລາຍງານວ່າ: ເມື່ອບໍ່ດົນມານີ້, ກອງປະຊຸມຄັ້ງທີ 61 ຂອງສະພາສິດທິມະນຸດອົງການສະຫະປະຊາຊາດ ໄດ້ຈັດກອງປະຊຸມອະພິປາຍທົ່ວໄປກ່ຽວກັບບັນຫາສິດທິມະນຸດຂອງປະເທດຕ່າງໆ, ທ່ານນາງ ຫຼີຊ້ຽວເມີຍ ຮອງຫົວໜ້າຄະນະຜູ້ແທນຈີນໄດ້ກ່າວຄຳປາໄສໂດຍເນັ້ນໜັກວ່າ: ວັນທີ 15 ມີນາ ແມ່ນວັນຄົບຮອບ 20 ປີທີ່ສະມັດຊາໃຫຍ່ອົງການສະຫະປະຊາຊາດໄດ້ຮັບຮອງເອົາມະຕິວ່າດ້ວຍການສ້າງຕັ້ງສະພາສິດທິມະນຸດ, ແຕ່ປັດຈຸບັນ ລັດທິຫຼາຍຝ່າຍ ແລະ ວຽກງານສິດທິມະນຸດທົ່ວໂລກກຳລັງຜະເຊີນໜ້າກັບສິ່ງທ້າທາຍທີ່ບໍ່ເຄີຍມີມາກ່ອນໃນປະຫວັດສາດ, ສະຖານະການຂອງພາກພື້ນໄດ້ສົ່ງຜົນກະທົບຕໍ່ສັນຕິພາບ ແລະ ຄວາມໝັ້ນຄົງສາກົນຢ່າງເລິກເຊິ່ງ ແລະ ໄດ້ສ້າງໄພພິບັດດ້ານສິດທິມະນຸດ ແລະ ມະນຸດສະທຳ.
ການຫັນເອົາບັນຫາສິດທິມະນຸດໄປໃນທາງການເມືອງ, ໃຊ້ເປັນເຄື່ອງມື ແລະ ສອງມາດຖານນັບມື້ນັບຮຸນແຮງຂຶ້ນ, ກົນໄກສະເພາະປະເທດ 13 ກົນໄກຂອງສະພາສິດທິມະນຸດລ້ວນແຕ່ແນໃສ່ປະເທດທີ່ກຳລັງພັດທະນາ. ຈີນຮຽກຮ້ອງໃຫ້ບັນດາຝ່າຍທົບທວນຄືນຄຳໝັ້ນສັນຍາເດີມໃນການຊຸກຍູ້ ແລະ ປົກປ້ອງສິດທິມະນຸດ, ດຳເນີນການສົນທະນາແລະ ການຮ່ວມມືບົນພື້ນຖານຄວາມສະເໝີພາບກັນ ແລະ ເຄົາລົບຊຶ່ງກັນ ແລະ ກັນ ແລະ ດຳເນີນການຢ່າງເປັນຮູບປະທຳເພື່ອສົ່ງເສີມສິດທິມະນຸດ.
ຄໍາເຫັນ