 |
ເມື່ອສັງເກດເບິ່ງລາຍຊື່ສະປອນເຊີທົ່ວໂລກຂອງງານແຂ່ງຂັນບານເຕະຄັ້ງນີ້ແລ້ວເຫັນວ່າ: ຍີ່ຫໍ້ຈີນ ໄດ້ຄອງຖານະສຳຄັນຍິ່ງ. ໃນບັນດາສະປອນເຊີຊັ້ນຍອດທົ່ວໂລກ 16 ແຫ່ງຂອງງານແຂ່ງຂັນຄັ້ງນີ້, ມີວິສາຫະກິດຈີນ 4 ແຫ່ງຄື: Lenovo, Hisense, Mengniu ແລະ Wanda, ມູນຄ່າການສະໜັບສະໜູນຂອງວິສາຫະກິດຈີນກວມເອົາເກືອບ 20% ຂອງຍອດມູນຄ່າການສະໜັບສະໜູນທັງໝົດຂອງສະຫະພັນບານເຕະສາກົນ ຫຼື FIFA, Lenovo ຍິ່ງເປັນຄູ່ຮ່ວມຊັ້ນຍອດຂອງ FIFA. ຕຸກກະຕາ LABUBU ຂອງບໍລິສັດ POP-Mart ໄດ້ປະກົດຕົວໃນພິທີເປີດງານປີນີ້ ຊຶ່ງໄດ້ກາຍເປັນສັນຍະາລັກສຳຄັນວັດທະນະທຳຈີນທີ່ດຶງດູດສາຍຕາຂອງຜູ້ຊົມທົ່ວໂລກ.
 |
ນອກຈາກການສະໜັບສະໜູນແລ້ວ, ການຜະລິດອັດສະລິຍະຂອງຈີນທີ່ໄດ້ເສີມຂະຫຍາຍບົດບາດຫຼາຍຢ່າງໃນງານຍິ່ງໄດ້ດຶງດູດສາຍຕາຂອງຜູ້ຊົມທັງຫຼາຍ. ງານແຂ່ງຂັນຄັ້ງນີ້ຖືກເອີ້ນວ່າເປັນ “ງານແຂ່ງຂັນບານເຕະຊີງແຊັມໂລກ AI” ຄັ້ງປະຖົມມະລືກ, ເຕັກໂນໂລຊີສຳຄັນຫຼາຍຢ່າງທີ່ຄ້ຳຊູການແຂ່ງຂັນແບບອັດສະລິຍະໃນງານຄັ້ງນີ້ລ້ວນແຕ່ເປັນຂອງວິສາຫະກິດຈີນ. ບໍລິສັດ Lenovo ໄດ້ສ້າງຕັ້ງສູນຖ່າຍທອດຂະໜາດໃຫຍ່ຢູ່ນະຄອນດັລລາສຂອງອາເມຣິກາ ເພື່ອຄຸ້ມຄອງເນື້ອໃນການຖ່າຍທອດທັງໝົດໃນ 16 ຕົວເມືອງທີ່ເປັນເຈົ້າພາບຈັດການແຂ່ງຂັນ ຊຶ່ງໄດ້ຮັບປະກັນການສົ່ງສັນຍານຖ່າຍທອດການແຂ່ງຂັນໄປສູ່ທົ່ວໂລກຢ່າງໝັ້ນທ່ຽງໂດຍອີງໃສ່ອຸປະກອນຂະໜາດໃຫຍ່.
 |
ຮູບຈຳລອງອັດສະລິຍະບານເຕະ ທີ່ບໍລິສັດ Lenovo ຄົ້ນຄວ້າເອງໄດ້ໃຫ້ການວິເຄາະຂໍ້ມູນແບບມືອາຊີບໃຫ້ແກ່ 48 ທີມທີ່ເຂົ້າຮ່ວມການແຂ່ງຂັນ, ຮູບຈຳລອງນັກກິລາດີຈີຕອນສາມາດຊ່ວຍກຳມະການຕັດສິນການລ້ຳໜ້າຂອງນັກກິລາຢ່າງຖືກຕ້ອງແມ່ນຢຳ, ການຖ່າຍທອດການແຂ່ງຂັນ, ສະຖິຕິຂໍ້ມູນ ແລະ ການຕັດສິນໃນສະໜາມແຂ່ງຂັນລ້ວນແຕ່ປາສະຈາກການສະໜັບສະໜູນດ້ານເຕັກໂນໂລຊີຂອງຈີນບໍ່ໄດ້. ບໍລິສັດ Hisense ໄດ້ໃຫ້ການບໍລິການແກ່ລະບົບກຳມະການວີດີໂອດ້ວຍອຸປະກອນສະແດງຜົນໜ້າຈໍທີ່ມີຄຸນນະພາບສູງ ເພື່ອຊ່ວຍກຳມະການຕັດສິນຢ່າງຍຸຕິທຳດ້ວຍຄຸນນະພາບໜ້າຈໍທີ່ມີຄວາມຊັດເຈນສູງ. ຈາກອຸປະກອນເຖິງວິທີປະມວນຜົນອັດສະລິຍະ, ວິທະຍາສາດເຕັກໂນໂລຊີຈີນໄດ້ເປັນພື້ນຖານທີ່ສຳຄັນໃຫ້ແກ່ການຮັບປະກັນໃຫ້ງານແຂ່ງຂັນບານເຕະໂລກຄັ້ງນີ້ດຳເນີນໄປດ້ວຍດີ.
ການມີສ່ວນຮ່ວມຢ່າງເລິກເຊິ່ງຂອງວິສາຫະກິດຈີນໃນງານແຂ່ງຂັນບານເຕະຊີງແຊັມໂລກ ໄດ້ທັບມ້າງຖ້ອຍຄວາມທີ່ວ່າ: “ຕັດການພົວພັນດ້ານເສດຖະກິດ, ຫຼຸດຄວາມສ່ຽງ” ແລະ ອື່ນໆ. ໃນຊຸມປີຜ່ານມາ, ອິດທິກຳລັງພາຍນອກສ່ວນໜຶ່ງໄດ້ຕັ້ງຂໍ້ຈຳກັດໃຫ້ແກ່ວິສາຫະກິດຈີນເລື້ອຍໆ, ເຈດຕະນາຈຳກັດບໍ່ໃຫ້ການຜະລິດຂອງຈີນ ແລະ ເຕັກໂນໂລຊີຂອງຈີນມີສ່ວນຮ່ວມໃນຕ່ອງໂສ້ການສະໜອງຂອງໂລກ. ຢ່າງໃດກໍຕາມ, ໃນການແຂ່ງຂັນລະດັບໂລກຄັ້ງນີ້, ຝ່າຍເຈົ້າພາບຈະບໍ່ສາມາດຈັດງານໄດ້ຖ້າຫາກປາສະຈາກເຕັກໂນໂລຊີຈີນທີ່ຄົບວົງຈອນ ແລະ ເຊື່ອຖືໄດ້. ຖ້າບໍ່ນຳໃຊ້ເຕັກໂນໂລຊີຈີນໃນດ້ານການຖ່າຍທອດ, ວິທີປະມວນຜົນ ແລະ ອຸປະກອນຕັດສິນການແຂ່ງຂັນຈະເຮັດໃຫ້ບໍ່ພຽງແຕ່ມີຕົ້ນທຶນສູງ, ການຄົ້ນຄວ້າຜະລິດກໍຈະບໍ່ທັນກັບເວລາຈັດງານແຂ່ງຂັນອີກດ້ວຍ. ຕະຫຼາດປະຕິບັດຕາມຫຼັກການການຮ່ວມມືທີ່ຕິດແທດຕົວຈິງຢ່າງສະເໝີຕົ້ນສະເໝີປາຍ, ຄຳຂວັນການເມືອງພູມີພາກ ຈະບໍ່ສາມາດຢຸດຢັ້ງທ່າອຽງໃຫຍ່ທີ່ອຸດສາຫະກຳທົ່ວໂລກເຊື່ອມໂຍງເຂົ້າກັນຢ່າງເລິກເຊິ່ງ.
 |
ການມີສ່ວນຮ່ວມຢ່າງເລິກເຊິ່ງໃນງານແຂ່ງຂັນລະດັບສາກົນຕ່າງໆ ເຊັ່ນ: ງານແຂ່ງຂັນບານເຕະຊີງແຊັມໂລກ ແລະ ງານກິລາໂອແລັມປິກເປັນຕົ້ນໄດ້ສະແດງໃຫ້ເຫັນເຖິງການເຕີບໂຕຂອງຍຸດທະສາດເຜີຍແຜ່ຍີ່ຫໍ້ຂອງວິສາຫະກິດຈີນໃນຂອບເຂດທົ່ວໂລກທີ່ສຸກງອມ. ໃນຊຸມປີຜ່ານມາ, ວິສາຫະກິດຈີນໄດ້ພັດທະນາຕົນເອງຈາກການສົ່ງອອກຜະລິດຕະພັນແບບງ່າຍດາຍໄປສູ່ຜູ້ໃຫ້ບໍລິການດ້ານເຕັກໂນໂລຊີ ແລະ ການເຜີຍແຜ່ວັດທະນະທຳໄປພ້ອມກັນ, ໄດ້ຍົກຊື່ສຽງຂອງຕົນໃນເວທີສາກົນໂດຍຜ່ານເວທີກິລາສາກົນ ເພື່ອເຮັດໃຫ້ໂລກໄດ້ເຫັນພາບພົດວິສາຫະກິດຈີນທີ່ໄດ້ຮັບການພັດທະນາຢ່າງຮອບດ້ານ.
ງານແຂ່ງຂັນບານເຕະຊີງແຊັມໂລກປັດຈຸບັນຈະບໍ່ພຽງແຕ່ເປັນເວທີການແຂ່ງຂັນບານເຕະເທົ່ານັ້ນ, ຍິ່ງແມ່ນເວທີການແລກປ່ຽນດ້ານເສດຖະກິດ, ວິທະຍາສາດເຕັກໂນໂລຊີ ແລະ ວັດທະນະທຳອີກດ້ວຍ. ວິສາຫະກິດຈີນບໍ່ພຽງແຕ່ເປັນຜູ້ຊົມການແຂ່ງຂັນເທົ່ານັ້ນ, ຫາກແມ່ນຜູ້ມີສ່ວນຮ່ວມຢ່າງເລິກເຊິ່ງອີກດ້ວຍ. ວິສາຫະກິດຈີນມີສ່ວນຮ່ວມຢ່າງຮອບດ້ານໃນງານແຂ່ງຂັນບານເຕະຊີງແຊັມໂລກໃນຄັ້ງນີ້, ໄດ້ສະແດງໃຫ້ເຫັນວ່າຈີນໄດ້ຍົກລະດັບອຸດສາຫະກຳ ແລະ ກຳລັງສັງລວມຂອງຕົນສູງຂຶ້ນເລື້ອຍໆ. ໃນອະນາຄົດ, ຍ່ອມຈະມີຍີ່ຫໍ້ຈີນ, ເຕັກໂນໂລຊີຈີນ ແລະ ວັດທະນະທຳຈີນກ້າວໄປສູ່ລະດັບໂລກຫຼາຍກວ່າເກົ່າ ແລະ ປະກອບສ່ວນຫຼາຍກວ່າເກົ່າໃນເວທີສາກົນ.
ບົດໂດຍ: ວິທະຍຸໂທລະພາບສູນກາງຈີນ (CMG)
ຄໍາເຫັນ