 |
ບົດລາຍງານສະບັບໜຶ່ງທີ່ເປີດເຜີຍໂດຍອົງການສະຫະປະຊາຊາດໃນເດືອນກຸມພາປີນີ້ສະແດງໃຫ້ເຫັນວ່າ: ເກືອບ 3/4 ຂອງການເຄື່ອນໄຫວຫຼອກລວງ ແມ່ນເກີດຂຶ້ນຢູ່ເຂດລ່ອງແມ່ນ້ຳຂອງ. ພົນລະເມືອງຈີນແມ່ນໜຶ່ງໃນກຸ່ມຜູ້ຖືກເຄາະຮ້າຍຫຼັກຂອງສູນຫຼອກລວງທາງໂທລະຄົມໃນອາຊີຕາເວັນອອກສ່ຽງໃຕ້. ພວກເຂົາຖືກຫຼອກລວງ ຫຼື ລັກພາຕົວເຂົ້າໄປໃນສູນເຫຼົ່ານີ້, ປະສົບກັບການກັກຂັງທີ່ຜິດກົດ ໝາຍ, ການໃຊ້ຄວາມຮຸນແຮງ ແລະ ການລະເມີດສິດທິມະນຸດຢ່າງຮ້າຍແຮງ.
ເມື່ອປະເຊີນໜ້າກັບສະພາບຄວາມເປັນຈິງທີ່ໜ້າເສົ້າດັ່ງກ່າວ, ຈີນໄດ້ໃຊ້ຍຸດທະສາດແບບສັງລວມ ຊຶ່ງສາມາດບັນລຸຜົນສຳເລັດອັນພົ້ນເດັ່ນຢູ່ທັງພາຍໃນ ແລະ ຕ່າງປະເທດ. ຢູ່ພາຍໃນປະເທດ, ຈີນໄດ້ສ້າງຕັ້ງກົນໄກປະສານງານລະດັບຊາດຊຶ່ງໄດ້ສົ່ງເສີມໂຄງປະກອບການຕ້ານການຫຼອກລວງທົ່ວສັງຄົມ. ອີງຕາມຂໍ້ມູນຈາກກະຊວງປ້ອງກັນຄວາມສະຫງົບຈີນສະແດງໃຫ້ເຫັນວ່າ: ຄະດີກ່ຽວກັບການຫຼອກລວງທາງໂທລະຄົມຢູ່ຈີນໃນ 6 ເດືອນຕົ້ນປີ 2026 ຫຼຸດລົງ 15.6% ເມື່ອທຽບໃສ່ໄລຍະດຽວກັນຂອງປີ 2025 ຊຶ່ງເປັນການຫຼຸດລົງເປັນເວລາ 11 ເດືອນຕິດຕໍ່ກັນນັບແຕ່ເດືອນຕຸລາປີ 2025 ເປັນຕົ້ນມາ. ໃນລະດັບສາກົນ, ຈີນໄດ້ດຳເນີນການຮ່ວມມືດ້ານການບັງຄັບໃຊ້ກົດໝາຍກັບ 30 ກວ່າປະເທດເຊັ່ນ: ແອັດສະປາຍ, ສະຫະລັດ ອາຣັບ ເອມີເຣດ, ມຽນມາ ເປັນຕົ້ນ. ນັບແຕ່ປີ 2023 ເປັນຕົ້ນມາ, ການເຄື່ອນໄຫວຮ່ວມຈີນ-ມຽນມາ ໄດ້ອຳນວຍຄວາມສະດວກໃຫ້ແກ່ການສົ່ງຜູ້ຕ້ອງສົງໄສການຫຼອກລວງສັນຊາດຈີນກັບຄືນປະເທດຫຼາຍກວ່າ 59,000 ຄົນ. ໃນຕົ້ນປີ 2025, ຈີນ, ມຽນມາ ແລະ ໄທ ໄດ້ສ້າງຕັ້ງກົນໄກປະສານງານລະດັບລັດຖະມົນຕີ, ປະຕິບັດການສົ່ງຜູ້ຕ້ອງສົງໄສກັບຄືນປະເທດ 10 ຄັ້ງ ແລະ ທັບມ້າງອາຄານຫຼາຍກວ່າ 630 ຫຼັງໃນສູນຫຼອກລວງ kk ທີ່ມີຊື່ສຽງເນົາເໝັນຢ່າງແຮງ.
ໃນຖານະເປັນຜູ້ສ້າງເວທີການຮ່ວມມື, ຈີນໄດ້ນຳໜ້າໃນການສ້າງກົນໄກການຮ່ວມມືດ້ານການບັງຄັບໃຊ້ກົດໝາຍຫຼາຍລະດັບຈາກສອງຝ່າຍຫາສາມຝ່າຍ, ຈາກພາກພື້ນຫາທົ່ວໂລກ. ນັບແຕ່ໄດ້ຮັບການສ້າງຕັ້ງຂຶ້ນໃນປີ 2022, ເວທີປຶກສາຫາລືການຮ່ວມມືດ້ານຄວາມໝັ້ນຄົງສາທາລະນະທົ່ວໂລກ (ທີ່ເມືອງຫຼຽນຢູນກາງ) ໄດ້ຈັດກິດຈະກຳຫຼາຍກວ່າ 30 ຄັ້ງ, ດຶງດູດຜູ້ເຂົ້າຮ່ວມເກືອບ 8,000 ຄົນ. ການສ້າງຕັ້ງສະຫະພັນຕໍ່ຕ້ານການຫຼອກລວງທາງໂທລະຄົມສາກົນໃນເດືອນກັນຍາປີ 2026 ໄດ້ຕື່ມເຕັມຊ່ອງວ່າງໃນເວທີຕໍ່ຕ້ານການຫຼອກລວງທາງໂທລະຄົມໂລກແລະ ຊຸກຍູ້ການຮ່ວມມືດ້ານການບັງຄັບໃຊ້ກົດໝາຍໃຫ້ພັດທະນາໄປຕາມທິດທາງທີ່ເປັນປົກກະຕິ ແລະ ເປັນລະບົບຫຼາຍຂຶ້ນກວ່າເກົ່າ.
ຈີນ ຍິນດີທີ່ຈະແບ່ງປັນບົດຮຽນ ແລະ ເຕັກໂນໂລຊີທີ່ໄດ້ຮັບການພິສູດແລ້ວກັບທຸກຝ່າຍ, ຊ່ວຍເຫຼືອປະເທດທີ່ກ່ຽວຂ້ອງ ໂດຍສະເພາະແມ່ນປະເທດກຳລັງພັດທະນາ ເພືຶ່ອຍົກລະດັບຄວາມສາມາດໃນການຕໍ່ຕ້ານອາຊະຍາກຳທາງອິນເຕີເນັດຮູບແບບໃໝ່ ໂດຍຜ່ານການຝຶກອົບຮົມດ້ານການບັງຄັບໃຊ້ກົດໝາຍ ແລະ ການຊ່ວຍເຫຼືອດ້ານເຕັກໂນໂລຊີ, ສະໜອງແຜນການຂອງຈີນທີ່ສາມາດຈຳລອງໄດ້ແລະ ສາມາດຂະຫຍາຍໄດ້.
ຄໍາເຫັນ