ຈີນ-ອາເມຣິກາ ບັນລຸຄວາມຮັບຮູ້ທີ່ເປັນເອກະພາບກັນເບື້ອງຕົ້ນກ່ຽວກັບຫົວຂໍ້ຫາລືຈຳນວນໜຶ່ງ
ຂ່າວສານຊີອາໄອລາຍງານວ່າ: ໃນວັນທີ 15 - 16 ມີນານີ້ (ຕາມເວລາທ້ອງຖິ່ນ) ຈີນ-ອາເມຣິກາ ໄດ້ຈັດການເຈລະຈາເສດຖະກິດການຄ້າຢູ່ນະຄອນຫຼວງປາຣີ ຂອງຝຣັ່ງ. ທ່ານ ຫຼີເຊີງກ່າງ ຜູ້ແທນການເຈລະຈາການຄ້າສາກົນ ທັງເປັນຮອງລັດຖະມົນຕີກະຊວງການຄ້າຈີນກ່າວວ່າ: ໃນໜຶ່ງມື້ເຄິ່ງຜ່ານມາ, ຄະນະຜູ້ແທນຂອງທັງສອງຝ່າຍໄດ້ດຳເນີນການເຈລະຈາກົງໄປກົງມາ, ເລິກເຊິ່ງ ແລະ ມີລັກສະນະສ້າງສັນ, ໂດຍໄດ້ບັນລຸຄວາມຮັບຮູ້ທີ່ເປັນເອກະພາບກັນເບື້ອງຕົ້ນກ່ຽວກັບຫົວຂໍ້ຫາລືຈຳນວນໜຶ່ງ. ຕໍ່ໄປ, ສອງຝ່າຍຈະດຳເນີນການເຈລະຈາຕາມຂັ້ນຕອນຕໍ່ໄປ.
ທ່ານ ຫຼີເຊີງກ່າງ ກ່າວຕື່ມວ່າ: ຫົວຂໍ້ທີ່ໄດ້ປຶກສາຫາລືລະຫວ່າງຈີນ-ອາເມຣິການັ້ນລວມທັງລະດັບພາສີສອງຝ່າຍ, ການຂະຫຍາຍເວລາປະຕິບັດການຈັດວາງທີ່ກ່ຽວຂ້ອງກັບພາສີສອງຝ່າຍ ແລະ ມາດຕະການທີ່ບໍ່ແມ່ນພາສີ ພາຍໃຕ້ສະຖານະການໃໝ່ ແລະ ອື່ນໆ. ອາເມຣິກາ ໄດ້ສະເໜີປັບປຸງມາດຕະການພາສີໃໝ່ແລະ ການພິຈາລະນາໃນບາດກ້າວຕໍ່ໄປ, ຈີນໄດ້ສະແດງຄວາມສົນໃຈຕໍ່ຄວາມບໍ່ແນ່ນອນທີ່ຈະເກີດຂຶ້ນຍ້ອນການປັບປຸງດັ່ງກ່າວ. ສອງຝ່າຍເຫັນດີຮ່ວມກັນສຸມກຳລັງເຂົ້າໃນການຮັກສາການພົວພັນດ້ານເສດຖະກິດການຄ້າລະຫວ່າງສອງຝ່າຍໃຫ້ມີຄວາມໝັ້ນທ່ຽງ ແລະ ໄດ້ຫາລືກ່ຽວກັບການສ້າງກົນໄກເຮັດວຽກເພື່ອຊຸກຍູ້ການຮ່ວມມືດ້ານການຄ້າ ແລະ ການລົງທຶນລະຫວ່າງສອງຝ່າຍ.
ຄໍາເຫັນ